İbrahim Rüstəmli: "ABŞ-ın seysmik zonada yerləşən Ermənistanda yeni nüvə reaktoru yaratması bütün region və regionumuza yaxın ölkələr üçün böyük təhlükədir"
Yayılan məlumatlara görə, ABŞ Ermənistanda yeni nüvə reaktoru yaradır. Bununla da onsuz da bütün region üçün böyük təhlükə kəsb edən Metsamoru daha da gücləndirir. Bu halda nə Ermənistanın seysmik zonada yerləşməsi, nə nüvə qaçaqmalçılığı kimi problemlər nəzərə alınır.
"Bu, Azərbaycan üçün xüsusilə böyük təhlükə yaradır, bu baxımdan onun bölgəyə yaxşı heç nə vəd etmədiyi qənaətindəyəm"
ABŞ-ın Ermənistanda nüvə reaktoru tikməsinin region üçün böyük təhlükə olduğunu deyən hərbi ekspert İbrahim Rüstəmli "Bakı-Xəbər"ə şərhində "Hazırda ABŞ-ı regionun taleyi qətiyyən maraqlandırmır. Yəni Amerika üçün nə azərbaycanlıların, nə gürcülərin, nə ermənilərin, nə rusların, nə də bölgəyə yaxın olan farsların, Güney azərbaycanlıların taleyi qətiyyən maraqlı deyil. Bölgə üzərində nüfuz davası gedir. Yəni hər bir ölkə Cənubi Qafqazda, Cənubi Qafqazın timsalında isə Rusiyaya yaxın ərazilərdə daha etibarlı, daha strateji mövqelər tutmağa çalışır. Bu gün Cənubi Qafqazın ən zəif bəndi Ermənistandır. Ermənistan Rusiya ilə münasibətdə, eyni zamanda 44 günlük Vətən savaşından sonra çox düşük vəziyyətə düşüb. Həddindən artıq xəyal qırıqlığına uğrayıb. Bilirsiz ki, onların Rusiyadan çox ciddi gözləntiləri vardı. Birinci Qarabağ savaşında ruslar onlara fundamental dəstək göstərdi, milyonlarla dollarlıq hərbi silah-sursatı təmənnasız olaraq verdi. Amma sonradan yeni geosiyasi reallıqlar yarandı, nəhayət Rusiya və Ermənistan arasında münasibətlərin kəskin dəyişməsi baş verdi, hakimiyyətə Paşinyanın gəlməsi və sair çox ciddi dəyişiklər yaratdı. Görün vəziyyət nə hala gəlib çatıb ki, dünənə kimi Rusiyanın müttəfiqi sayılan Ermənistan bu gün Cənubi Qafqazda Amerikanın, Amerikanın simasında isə bir çox Qərb və Avropa dövlətlərinin, o cümlədən də Fransanın ən yaxın müttəfiqi sayılır. Yəni belə bir vaxtda təhlükə Cənubi Qafqaz və Cənubi Qafqaza yaxın bölgələr və qonşu dövlətlər üçün yaranır"-deyə bildirdi.
İ.Rüstəmli qeyd etdi ki, bu gün ABŞ-ın da, Fransanın da, bölgədə maraqları toqquşan digər dövlətlərin də əsas məqsədi Cənubi Qafqazda zəif bəndin, yəni Ermənistanın vasitəsilə möhkəmlənmək və Rusiyaya baxmaqdır. "Biri var dağların o başından baxasan, biri də var üzbəüz baxasan. ABŞ həmsərhəd bölgədə öz mövqeyini möhkəmlətmək, burada taktiki və strateji dayaq nöqtələrini artırmaq niyyətini ortaya qoyur. Bunun kökündə Rusiyaya qarşı bir nüfuz savaşı dayanır, ümumiyyətlə müharibə dayanır. Ukrayna-Rusiya savaşı fonunda ABŞ-ın atdığı analoji addım bölgədə də təkrarlanır. Bilirsiz ki, Corc Soros Fondunun əsas dəstəyi ilə hakimiyyətə gələn Baş nazir Paşinyan bu gün onların bütün diqtə etdiklərini yerinə yetirməlidir.
Sözümün canı odur ki, ABŞ-ın seysmik zonada yerləşən Ermənistanda yeni nüvə reaktoru yaratması bütün region və regionumuza yaxın ölkələr üçün böyük təhlükədir. Onsuz da bölgəmiz Metsamordan kifayət qədər zərər çəkir. Bu baxımdan, yeni nüvə reaktorunun da yaradılması bölgəmiz üçün böyük təhdiddir. Bu, Azərbaycan üçün xüsusilə böyük təhlükə yaradır, bu baxımdan onun bölgəyə yaxşı heç nə vəd etmədiyi qənaətindəyəm"-deyə İ.Rüstəmli vurğuladı.
İradə SARIYEVA
