Ermənistana ABŞ ordusunun gəlişinə İran hələ susur - 5 aprel görüşünə də bu cür "dözmüşdü"...
Daşdəmir Əliyev: "Tehranın budəfəki susqunluğu onun ənənəvi mövqeyindən çox fərqlənir"
Ermənistanda "Eagle Partner 2024" adlı Ermənistan-ABŞ birgə təlimlərinə start verilib. Ermənistanın Müdafiə Nazirliyinin yaydığı məlumata görə, təlimin açılış mərasimində Ermənistanın müdafiə naziri Suren Papikyan və ABŞ səfiri Kristina Kuin və başqaları iştirak edib.
Təlimlərdə Ermənistan Silahlı Qüvvələrinin sülhməramlı briqadasının, ABŞ-nin Avropa və Afrikadakı ordusunun və Kanzas Milli Qvardiyasının hərbçiləri iştirak edir.
Qeyd edək ki, ötən ilin sentyabrında "Eagle Partner" təliminin birincisi keçirilib, bu isə artıq ikincidir. Şübhəsiz ki, məqsəd qısa müddətdə böyük hərbi uğur əldə etmək yox, ABŞ-Ermənistan siyasi birliyini, Vaşinqtonun bölgədəki fiziki varlığını göstərməkdir. Təlim ABŞ-ın Rusiya və İrana Ermənistandan əzələ nümayişi, barmaq silkələməsi kimi də qiymətləndirilir.
Məlum olduğu kimi, bu il aprelin 5-də Ermənistan baş naziri Nikol Paşinyan, Avropa Komissiyasının sədri Ursula fon der Lyayen və ABŞ dövlət katibi Entoni Blinken Brüsseldə görüşdülər. Sözügedən görüş Cənubi Qafqazda siyasi tarazlığa ciddi şəkildə təsir kimi dəyərləndirildi.
Çünki Vaşinqton görüşün "Bakı və İrəvan arasında sülh danışıqlarına aid" olduğunu, rəsmi İrəvan isə "üçüncü tərəfə qarşı olmadığını" desə də, Brüsseldə Ermənistanın "təhlükəsizliyinin gücləndirilməsi" adı altında hərbi paktın əldə edilməsinin planlaşdırıldığı haqda məlumatlar var idi.
Buna həm Azərbaycan, həm də Türkiyə kəskin etiraz etdi. Maraqlıdır ki, ABŞ və Qərblə potensial düşmən olan İran Ermənistanın bütün bu şıltaqlıqlarına göz yumur.
İranın bu mövqeyini necə anlamaq olar?
Hərbi-siyasi şərhçi, ehtiyatda olan polkovnik-leytenant Daşdəmir Əliyev "Bakı-Xəbər"ə açıqlamasında bildirdi ki, Avropa Sülh Fondu çərçivəsində Ermənistana hərbi yardımın göstərilməsi planları və aprelin 5-də keçiriləcək toplantının hərbi komponentləri nəzərdə tutduğuna dair məlumatlar əlavə narahatlıq doğurdu: "Rəsmi Bakı bunu regionda sülh quruculuğu səylərinə xələl gətirirmək kimi dəyərləndirdi. Bu xüsusda Prezident İlham Əliyev də qeyd etdi ki, onda olan məlumata görə, üçtərəfli görüşə hazırlıq prosesində Ermənistana hərbi dəstək və birgə hərbi təlimlərin keçirilməsi, Azərbaycanla sərhədyanı ərazilərdə hərbi infrastrukturun yaradılması, Avropa İttifaqının Avropa sülh mexanizmi xətti ilə və ABŞ büdcəsi hesabına Ermənistanın silahlandırılması kimi məsələlər də müzakirə olunub. Dövlət başçısı anti-Azərbaycan mahiyyəti daşıyan bu kimi addımların, o cümlədən Fransa tərəfindən də Ermənistanın silahlandırılması siyasətinin regionda silah yarışına rəvac verdiyini və təxribatlara gətirib çıxaracağını vurğuladı.
Rusiya Xarici İşlər Nazirliyinin rəsmi nümayəndəsi Mariya Zaxarova 15-24 iyulda keçiriləcək Ermənistan-ABŞ birgə hərbi təlimlərinə münasibət bildirərkən deyib ki, amerikalıların Cənubi Qafqazda peyda olması regionda münaqişə potensialını gücləndirəcək və yeni ayırıcı xətlər yaradır
Onun sözlərinə görə, Qərb bütün gücü ilə İrəvanı regionda və onun ətrafında müxtəlif qarşılıqlı fəaliyyət formatlarına cəlb edir və bunlar ilk növbədə Rusiya və İrana qarşı yönəlib. Göründüyü kimi, hətta Rusiya öz etirazında bu təlimlərin ABŞ-a qarşı yönəldiyini deyir, ancaq İrandan reaksiya yoxdur. Maraqlıdır ki, bundan əvvəl keçirilən hərbi təlimlər zamanı İran XİN rəhbəri Mirzoyanla telefon danışığında Ermənistan və ABŞ arasında keçirilən hərbi təlimlərə toxunaraq, regionda hər hansı xarici qüvvələrin mövcudluğunu regionda vəziyyəti gərginləşdirən amil kimi qiymətləndirmişdi. Tehranın budəfəki susqunluğu onun ənənəvi mövqeyindən çox fərqlənir".
Məhəmmədəli QƏRİBLİ
