Fatimə Hacıbəyli: "...Makronun baş naziri və xarici işlər naziri ilə əl tutub görüşməzlər"Faiq Ələkbərli: "...Məsafəli davranacaqlar"Sədrəddin Soltan: "Axsaq atın kor nalbəndi..."
Fransada qalmaqallı "immiqrasiya qanunu" qərarından sonra təzyiqlərə tab gətirə bilməyən Elisabeth Borne və hökumətinin istefasından sonra Baş nazir vəzifəsinə təyin edilən ölkə tarixinin ən gənc və ilk gey baş naziri Qabriel Attal hökumətin yeni tərkibini açıqlayıb.
34 yaşlı Attal biabırçı bir qərar qəbul edərək keçmiş "əri" Stefan Sejourneni də Xarici İşlər naziri təyin edib. Onu da vurğulayaq ki, Attalla və Sejournenin uzun müddət "vətəndaş nikah"ında yaşadıqları bildirilir.
Makronun birdən-birə sevgili olan bir cüt cinsi azlığı yüksək vəzifəyə gətirməsi dünyada ciddi müzakirə olunur. Bütün əxlaqi dəyərlərin çökdüyü və çürüdüyü Fransada belə mühüm postlara cinsi azlıqların təyin edilməsi narazılıq doğurmaya bilmir.
Hətta bəzi ekspertlər deyirlər ki, heç bir türk və müsəlman lideri Attalla və Sejourneni ilə əl tutub salamlaşmayacaq. Bəzi müşahidəçilər deyir ki, xristian ölkələri arasında da Makronun "yavruları"nı qəbul etməyənlər var.
Müsəlman ölkələrinin, türkdilli dövlətlərin dövlət adamları Fransanın yeni təyin olunmuş baş naziri və xarici işlər naziri ilə əl verib görüşməyi özlərinə rəva görəcəklərmi?
"Vəfa" Sosial İctimai Birliyinin sədri Fatimə Hacıbəyli baki-xeber.com-a "onlarla nəinki əl verib görüşmək, heç bir stolda oturmaq da qəbul edilməzdir. Mənə elə gəlir ki, türk və müsəlman dünyasının liderləri Makronun baş naziri və xarici işlər nazir ilə əl tutub görüşməzlər" - deyə bildirdi.
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini Faiq Ələkbərli bildirdi ki, son dövrlər Qərbdə, Avropada bir sıra dəyişikliklərin olduğunu görürük. "Bu onların baxışına görə, insani dəyərləri ehtiva edir, ancaq hər halda insani dəyərin də müəyyən bir həddi, çərçivəsi olmalıdır. Şübhəsiz ki, bəzi Qərb ölkələrində cinsini dəyişənlər, eyni cinslilərin nikahı, münasibəti kimi məsələlər müsbət qarşılanır. Biz keçmişə baxsaq, Qərbdə əvvəllər də belə halların olduğunu bilirik. Hansı dövrdə ki, bu kimi məsələlər cəmiyyətdə adiləşmişdi həmin cəmiyyətlər tarixin səhnəsindən silinib gedib. Bəzi cəmiyyətlər Tanrının və təbiətin yaratdıqlarını dəyişməyə çalışır. Bu dəyərlərin itirilməsi və yeni "dəyərlər"in "formalaşması" ilə özünü biruzə verir. Belə ölkələrdən biri Fransadır. Baş nazirin Tanrının yaratdığının əksinə həyat tərzi sürməsi, özü kimi birini də yüksək vəzifəyə təyin etməsi tərəfimizdən normal qarşılanmır. Məqsədləri bu qeyri-ənənəvi nəsnəni yayğınlaşdırmaqdır, istəyirlər ki, bütün dünyada belələri çoxalsın.
Düşünürəm ki, Türkiyə, Azərbaycan, Qırğızıstan, Qazaxıstan, Pakistan və digər türk, müsəlman dövlətlərinin liderləri bu məsələdə məsafəli davranacaqlar. Hesab edirəm ki, türk və müsəlman liderləri Fransanın baş naziri və xarici işlər naziri ilə əl tutmamağa çalışacaqlar. Çünki onlar kimiləri bizim cəmiyyətlər üçün qəbul edilməzdir" - deyə F.Ələkbərli qeyd etdi.
O, vurğuladı ki, Fransa, Kanada, Hollandiya və başqa bu kimi ölkələrdə cinsi oriyentasiyası ənənəvi olmayan şəxslərin dövlət vəzifələrinə təyin edilməsi, birinci şəxs vəzifəsinə gətirilməsi müşahidə olunur, amma bu qəbuledilməzdir.
Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan "Axsaq atın kor nalbəndi olar. Makronun kabineti belə olar" - deyə bildirdi.
S.Soltanın sözlərinə görə, Fransa liberal ölkədir və bu ölkənin daxili siyasəti liberal əsaslarda, xarici siyasəti isə fransız şovinizmi əsasında qurulub.
"Odur ki, bu tip oriyentasiyalı insanların Fransada hakimiyyətə gəlməsi, yaxud hakimiyyətdən getməsi Fransa cəmiyyəti üçün adi haldır. Bu tip məsələlərdə onlarda əxlaqi dəyər ölçüsü yoxdur. Emmanuel Makron özü şəxsi həyatı ilə bağlı bir sıra rekordlara "imza" atıb. Özündən 24 yaş böyük qadınla evlənməklə, öz müəlliməsi ilə ailə qurmaqla, sosial məsələlərlə bağlı çox saylı etiraz aksiyaları keçirməklə, Fransada özünü islahatçı prezident göstərməklə yadda qalır. Eləcə də o, kabinetində fərqli cinsi oriyentasiyalı insanların hökumətinə və xarici siyasət idarəsinə rəhbərlik etməsi ilə Fransa tarixinə düşür. Avropada cinsi azlığın nümayəndələrinin hakimiyyətdə təmsil olunması halları çoxdur. Bu Avropa cəmiyyəti üçün qeyri-adi deyil. Onlar artıq ona öyrəşiblər. Fransada eyni cinslilərin ailə qurması məsələsi də adi hal alıb. Bu baxımdan, Fransa hökumətində bu sayaq addımların atılması da bizim üçün qeyri-adi olmaz. Makron həm də Fransanı dünyanın bir sıra ölkələrindən qovulması ilə tarixə düşəcək. Məsələn, Afrika ölkələrindən Fransa sıxışdırılmaqdadır, keçmiş müstəmləkə ərazilərində Fransa mərkəzi hakimiyyətinə qarşı etirazlar var. Nəhayətdə, Cənubi Qafqazda Makron hakimiyyətinin yürütdüyü siyasət də Fransanın imicinə, onun nüfuzuna heç də müsbət təsir edən hadisə deyil. Onun Cənubi Qafqazda Ermənistanı birmənalı müdafiə edib Azərbaycana qarşı ondan istifadə etməsi təbii ki, Fransa hakimiyyətinin regiondakı mövqeyinə mənfi təsir göstərməkdədir. Makron Fransa tarixinə qəribə və heç də ölkənin nüfuzunu artıran prezident kimi düşməyəcək. O, daha çox cinsi azlıqların prezidenti kimi düşəcək" - deyə S.Soltan bildirdi.
Əli TURABOV
