Turab Rzayev: "Vasitəçilərin ortadan çıxarılması birbaşa sülh müqaviləsinə dəstək olacaq"
Prezident İlham Əliyev yerli televiziya kanallarına müsahibəsində deyib ki, sülh müqaviləsinin imzalanması üçün əsas şərtlər indi yaradılıb:
"Ermənistan istəyir ki, bu sülh müqaviləsinin zəmanətçiləri olsun, ancaq biz hesab edirik ki, buna heç bir ehtiyac yoxdur". Bunun iki suveren dövlət arasında imzalanacaq sülh müqaviləsi olacağını vurğulayan dövlətimizin başçısı deyib: "Biz orada heç bir zəmanətçilərə ehtiyac duymuruq və əgər bu, ikitərəfli formatda imzalanacaqsa, imzalanmalıdır. Əgər kimsə kömək etmək istəyirsə, biz buna da etiraz etmirik. Ancaq bu kömək elə olmalıdır ki, məcburi olmasın".
Prezidentin fikirləri Paşinyanın "sülhə beynəlxalq zəmanət" bəhanəsini kəsmək baxımından nə dərəcədə önəmlidir?
Politoloq Turab Rzayev "Bakı-Xəbər"ə açıqlamasında bildirdi ki, ölkə başçısının bu mövqeyi təqdirəlayiqdir: "Burda əsil məsələ ondan ibarətdir ki, Ermənistan tərəfi öz təhlükəsizliyinin zəmanəti adı altında ortaya vasitəçiləri daxil edir. Necə ki, 30 il ərzində ATƏT - in Minsk qrupu həmsədrlərinin heç biri müsbət irəliləyişə nail ola bilmədilər. Biz bunu təkcə Azərbaycanda deyil, fərqli ölkələrdə də görə bilərik. Ukrayna, Almaniya və digər ölkələri misal göstərə bilərik. Belə qruplaşmalar heç bir halda münaqişənin sülh yolu ilə həllinə töhvə vermirlər. Ortaya yenə vasitəçilərin salınmasını istəyirlər. Bu şəkildə Fransanı, Almaniyanı prosesə daxil etməyə çalışırlar. Azərbaycan da buna açıq şəkildə qarşı çıxır. Bundan əvvəl də Brüssel formatının Moldova görüşü ilə əvəz edilməsi haqqında da söhbət olmuşdu. Azərbaycan dövləti ortaya belə bir mövqe qoydu ki, biz Moldova görüşünə qatılırıq, ancaq heç bir halda Almaniyanın, Fransanın əlavə edildiyi beşli formatın Brüssel formatını əvəz etməsini istəmirik. Ancaq, Ermənistanla, Avropa bunu Qranada formatına çevirdilər və Azərbaycan bundan imtina etdi. Azərbaycan olmadan müqavilə imzaladılar. Bizdə isə açıq şəkildə bunu tanımadılar. Bir mövqe ortaya qoyuldu. Biz Fransanın, Almaniyanın, əlavə ölkələrin vasitəçi olmasını istəmədiyimizi bildirdik. Belə olan halda biz də Türkiyənin olmasını istəyəcəyimizi dedik. Bu da o deməkdir ki, hər tərəfdən vasitəçilər daxil olacaq. Sonda da heç bir dəyişiklik olmayacaq. Ən ideal variant odur ki, iki ölkə rəhbəri - Azərbaycan və Ermənistan oturub özləri danışsınlar. Əlavə vasitəçilər sadəcə sülhü sabotaj edəcək. Məsələ, eyni zamanda ondan ibarətdir ki, hər daxil olan zəmanətçinin öz agenturası var. Fransa öz maraqlarını, Rusiya öz maraqlarını güdür. Hətta, qardaş Türkiyənin belə öz siyasi maraqları var. Bunun nəticəsində də Azərbaycanla Ermənistan arasında sülh müqaviləsi uzun illər uzana bilər. Düşünürəm ki, vasitəçilərin ortadan çıxarılması birbaşa sülh müqaviləsinə dəstək olacaq".
Məhəmmədəli QƏRİBLİ
