Qabil Hüseynli: "Həmin mesajların ən əsas qayəsi bu oldu ki, biz sülh istəyirik, ancaq kənar qüvvələrin də prosesə müdaxiləsinə qarşıyıq"
Prezident İlham Əliyev yanvarın 10-da yerli televiziya kanallarına 2 saat yarımlıq müsahibəsində ad çəkmədən Ermənistan rəsmilərinin bu və ya başqa iddialarına cavab verib, yeni ismarışlar göndərib.
Dövlət başçısı 2023-cü il sentyabr ayında həyata keçirilən antiterror tədbirlərindən sonra həm BMT-də, həm də Avropa İttifaqında Azərbaycana qarşı sanksiyalar tətbiq ediləcəyinə, Bakının böyük təzyiqlər altına düşəcəyinə dair Ermənistana vədlər verildiyini qeyd edərək deyib: "Bu əməliyyat, bütün bu kommunikasiyalar Ermənistanda əminlik yaratdı ki, onlar sülh müqaviləsini istədiyi kimi tərtib edə bilərlər və bizə də kimsə təzyiq edib bizi də razı sala bilərlər. Məhz buna görə 70 gün ərzində bizim təklifimizə, - çünki burada təkliflər mübadiləsi 5-6 dəfə gedib, mətnlər göndərilir şərhlərlə, - cavab vermirdi".
İlham Əliyevin müsahibəsinin dünyaya ümumi mesajı mahiyyəti daşıdığı bildirilir. Müsahibənin Azərbaycanın geosiyasi gücə çevrildiyini və onun təsirlərinin bölgəmizdən çox kənarlara yayıldığının təqdimatı baxımından nə kimi əhəmiyyətə malikdir?
Politoloq Qabil Hüseynli "Bakı-Xəbər"ə açıqlamasında bildirdi ki, bu fikirləri mütləq bölüşür: "Çünki İlham Əliyev həmin müsahibədə bir çox vacib detallara toxundu. Xüsusilə də, sülh müqaviləsinin bağlanması ilə bağlı Ermənistanın təklif etdiyi beynəlxalq qarantyorların olması ilə əlaqəli məsələyə tam aydınlıq gətirdi. Prezident bildirdi ki, iki dövlət bir-biri ilə oturub sülh müqaviləsini bağlaya bilərsə, üçüncü bir qüvvənin dəvət edilməsinə nə ehtiyac var? Əgər kimlərsə məsələyə kömək etmək istəyirsə, qoy etsinlər. Prezident dedi ki, bunu təzyiq yolu ilə etmək yolverilməzdir. Ölkə başçısı dedi ki, kənar dövlətlərin bir çoxu bu məsələdə özünün geosiyasi maraqlarından çıxış edir. Bu maraqları özlərinin vasitəçilik səyi altında gizlədir. Öz istəklərini sülh sazişinin mətninə salmağa çalışır. Kifayət qədər məzmunlu və Azərbaycan dövlətinin mövqeyini aydın şəkildə ifadə edən , Ermənistanın vurnuqmalarını lazımi səviyyədə təqdim etməklə Prezident dünyaya əsaslı mesajları verdi. Həmin mesajların ən əsas qayəsi bu oldu ki, biz sülh istəyirik, ancaq kənar qüvvələrin də prosesə müdaxiləsinə qarşıyıq. Bu, eyni zamanda, Azərbaycan xalqı və dünya ilə media vasitəsilə dialoqun nadir formasıdır. Bu kontekstdə 44 günlük İkinci Qarabağ müharibəsinin gedişi dövründə Prezident İlham Əliyevin 30-dan artıq xarici mətbuata müsahibəsini xatırlatmaq istərdik. Dövlətimizin başçısının hər bir müsahibəsi dünənimizə baxış əsasında qarşıdakı dövrün hədəflərinin təqdimatı oldu. Ümumilikdə bu müsahibələr beynəlxalq ictimaiyyət üçün Azərbaycan haqqında daha dolğun məlumatların əldə olunmasında zəngin mənbədir. Bu mühüm məqamı da xüsusi qeyd edək ki, Prezident İlham Əliyevin hər Yeni ilin ilk ayında yerli televiziya kanallarına müsahibə verməsi artıq ənənə halını alıb. Bu müsahibələrdə əvvəlki il ərzində ayrı-ayrı sahələrdə qazanılan uğurlar geniş təhlil olunur, hədəflər və onlara nail olmaq üçün mexanizmlər açıqlanır".
Məhəmmədəli QƏRİBLİ
