Azər Həsrət: "Yeni milli hədəfimizdən biri Azərbaycanın özəlliklə də türk dünyasındakı "açar ölkə" rolunu daha da möhkəmləndirmək olmalıdır"
"Bizim əsas milli ideyamız ərazilərimizi azad etmək idi. Yəni, bütün xalq bu ideya ətrafında, bu amal ətrafında birləşmişdi, biz bunu artıq əldə etmişik. Ona görə gələcək inkişafla bağlı, əlbəttə ki, mənim fikirlərim var və bir çox hallarda onlar həlledici olacaq təbii ki. Ancaq mən istərdim ki, cəmiyyətdə də bu məsələ ilə bağlı diskussiyalar getsin, siyasətçilər, politoloqlar, elm adamları, ziyalılar, yəni, bizim gələcək inkişafımızla bağlı əsas milli ideya və ideyalarımız nə olmalıdır. Bu, bir ictimai müzakirə mövzusu olmalıdır". Bu fikirləri Prezident İlham Əliyev yanvarın 10-da yerli televiziya kanallarına müsahibəsində bildirib.
İndi təyin etməliyik ki, yeni milli ideyamız, hədəflərimiz nə olacaq?
Prezidentin dediyi kimi, təbii ki, ziyalılar bu məsələdə öz fikir və rəylərini, ideyalarını, hədəfə çatmaq yollarını açıqlamalıdır.
"Bizim isə əlavə olaraq bir də Güney Azərbaycan, Azərbaycanın bütövləşdirilməsi məsələmiz var"
Yeni milli hədəflərimizin nə olamalı olduğu barədə danışan siyasi şərhçi Azər Həsrət "Bakı-Xəbər"ə "Əslinə qalanda cənab Prezident yanvarın 10-da verdiyi müsahibə ilə böyük bir mərhələnin sonunu nişan verdi. Yəni Azərbaycan doğrudan da çox böyük bir problemi həll etməklə müstəqillik dönəminin ən əhəmiyyətli mərhələsini qapatmış oldu. Təbiidir ki, mərhələ qapandığına görə əvvəlki, köhnə hədəflərə diqqət kəsilmək olmaz. Artıq yeni hədəflər müəyyənləşməlidir, yeni ideya uğrunda mübarizə aparılmalıdır. Cənab Prezident də məhz buna işarə etdi, açıq şəkildə bunu bildirdi. Yeni hədəf, yeni ideya nə olmalıdır? Əlbəttə, hamımız yeni ideya və yeni hədəflərin nə olmalı olduğunu düşünürük. Şəxsən mənim üçün qaranlıq heç nə yoxdur. Sözsüz, Azərbaycan dövlətinin ən önəmli məsələsi Azərbaycan Respublikasının torpaq bütünlüyünü təmin etmək idi, hamımız bütün digər məsələləri bir kənara buraxıb məhz onun üçün çalışırdıq. Təbiidir ki, başda Müzəffər Ali Baş Komandan İlham Əliyev olmaqla hər kəs bacardığını etdi, nəticə etibarı ilə biz xalq olaraq bu problerminb öhtəsindən gəldik"-deyə bildirdi.
A.Həsrətin sözlərinə görə, bundan sonra artıq yeni hədəflər, yeni ideyalar uğrunda mübarizə aparılmalıdır. "Nədir o hədəflər, nədir o ideya? şəxsən mən əvvəlki dönəmlərdə də bu cür düşünürdüm, bundan sonra da bu düşünməyə davam edəcəyəm. Yeni milli hədəfimizdən biri Azərbaycanın özəlliklə də türk dünyasındakı "açar ölkə" rolunu daha da möhkəmləndirmək olmalıdır. Eyni zamanda milli özünü dərk, milli kimlik məsələlərini kökündən həll etmək, işğal dönəmində bizə sırınmış yad mədəniyyətdən bir dəfəlik qurtulmaq, soyad məsələsini həll etmək, orta türk dili, ortaq türk əlifbası məsələlərinin həllinə çalışmaq kimi amillər əsas hədəflərimiz, məqsədimiz olmalıdır.
Həmçinin Azərbaycanın həm bölgəmizdə, həm də qlobal müstəvidə daha güclü bir dövlət kimi təqdim edilməsi vacib bir məsələdir. Yəni bizimlə artıq hesablaşırlar. Cənab Prezident də müsahibəsində bu fikirləri səsləndirdi. Amma bundan sonrakı mərhələdə Azərbaycan dövləti, Azərbaycan xalqı ilə daha çox hesablaşılması üçün addımların atılması, yəni mövqelərimizin möhkəmləndirilməsi vacibdir. Təbiidir ki, burada əsas gün Azərbaycanın beynəlxalq platformalarda təmsil edən və edəcək şəxslərin üzərinə düşəcək. Yəni təkcə cənab Prezidentin özü deyil, bütövlükdə onun komandası, eyni zamanda bu və digər şəkildə bu məsələlərlə məşğul olan adamların beynəlxalq platformalarda, beynəlxalq müstəvilərdə, qlobal səviyyədə ölkəmizin mövqelərini möhkəmləndirilməsinə çalışması vacibdir. Sözsüz, dövlətin dövlət öncəlikləri var, bunu başa düşürük. Elə məsələlər var ki, dövlət onu deməz, edər. Yaxud elə şeylər də var ki, ümumiyyətlə onunla bağlı fikir mübadiləsi aparmaz, elə şeylər də var onları açıq deyər. Cənab Prezident açıq danışılması mümkün olan hər şey haqqında danışdı. Bizim isə əlavə olaraq bir də Güney Azərbaycan, Azərbaycanın bütövləşdirilməsi məsələmiz var. Düşünürəm ki, artıq bundan sonrakı mərhələdə həmin məsələ ilə də daha intensiv məşğul ola biləcəyik. Yəni ayağımızdan çəkən Qarabağ problemi artıq tarix olduğuna görə bundan sonra Azərbaycanın tarixi ədalətsizliyinin aradan qaldırılması üçün böyük addımlar atılmalıdır. Biz də əlbəttə, şəxsən mən öz adıma deyirəm ki, bu davanən bir əsgəri, bir nəfəri olaraq bütün varlığımızla buna çalışacağıq"-deyə A.Həsrət vurğuladı.
İradə SARIYEVA
