Mirkazım Seyidov: "Görünən budur ki, anti-Rusiya qüvvələri son dirənişlərini ortaya qoyublar"
Ukrayna Prezidenti Vladimir Zelenski Vilnüsdə brifinqdə deyib ki, Ukraynanın Rusiya təcavüzünə qarşı müdafiəsini dayandırması ilə bağlı tərəfdaşlar tərəfindən heç bir təzyiq yoxdur.
O, müharibə ilə bağlı müxtəlif fikirlərin olduğunu da əlavə edib:
"Onları eşidir və bu tanış fikirləri mətbuatda oxuyuram. Müxtəlif fikirlər səslənir, müzakirələr aparılır. Ancaq hesab edirəm ki, tərəfdaşlarımız hələ rəsmi olaraq bizə müvafiq siqnallar verməyə hazır deyil. Ən azından, mən onları şəxsən eşitməmişəm. Amma düşünürəm ki, biz Rusiya Prezidentinin ritorikasına diqqət yetirməliyik. O dayanmaq fikrində deyil. O bizi tamamilə işğal etmək istəyir".
Zelenski nə dərəcədə səmimidir? Görünən budur ki, müttəfiqlərin Ukraynaya olan mövqeyi əvvəlki kimi deyil. ABŞ açıq şəkildə maliyyələşmədən yayınır, bir çox Avropa ölkələri Ukraynanı müharibəni dayandırmağa çağırırsa, demək ki, vəziyyət heç də Zelenskinin dediyi kimi deyil.
Müstəqil siyasətçi Mirkazım Seyidov "Bakı-Xəbər"ə açıqlamasında bildirdi ki,
ilkin mərhələdə 31 ölkənin gücü ilə Ukrayna Silahlı Qüvvələrini dəstəkləyən Şimali Atlantika Alyansı hazırda Ukraynanı siyasi hərbi hədəflərinə çatdıra bilməyib: "Kiyevin məqsədi bu idi ki, böyük güclərin dəstəyi ilə 91-ci ilin sərhədlərinə çıxa bilsinlər. Bu baş verməyib. Rusiyanın da siyasi hərbi hədəfi o idi ki, Ukraynanın Donetsk, Luqansk kimi bir neçə şəhərini nəzarətinə qaytarsın. Müharibənin hazırkı gedişatı Rusiyanın üstünlük əldə etdiyini göstərir. Bununla Kiyevi dəstəkləyən hərbi beyin mərkəzləri belə nəticəyə gəlirlər ki, Ukrayna ordusu verilən dəstəyi doğrulda bilmir. Ukrayna bunda müttəfiqləri tərəfindən kifayət qədər hərbi-texniki dəstəyin verilməməsini səbəb göstərir.
Artıq müttəqfiqlər də Ukraynanı əvvəlki qədər dəstəkləyə biləcəyinə dair mesajlar vermədiyi üçün Ukrayna xalqı ikiyə bölünüb. Bu, hökumətin vəziyyətini bir qədər də çətinləşdirir.
Almaniya kansleri Olaf Şolts bildirib ki, Avropa İttifaqı ölkələrinin əksəriyyəti Ukraynanı Rusiyanın işğalı ilə mübarizədə kömək edəcək qədər silahla təmin etmir və müttəfiqləri səylərini artırmağa çağırıb.
ABŞ Konqresində Ukraynaya ABŞ-ın hərbi yardımı dayandığı üçün Şolts Almaniya hökumətinin Kiyevi lazım olan müddətdə dəstəkləyəcəyini bəyan edib.
Almaniyanın özü Rusiyanın işğalının ilk aylarında Avropanın böyük dövlətlərindən birinin Kiyevə hərbi dəstək verməsi və liderliyini təmin etmədiyi üçün ciddi tənqidlərə məruz qaldı. Görürsünüzmü, müttəfiqlərin özləri Ukraynaya lazımi şəkildə hərbi yardımın edilmədiyini etiraf edirlər. Belə olan təqdirdə, Zelenski nəyə görə bunu təkzib edir? Çünki psixoloji amil var. O bunu açıq etiraf etsə, ordunun döyüş ruhu daha da sarsıla bilər. Yalnız bu gün
NATO üzvləri Ukraynaya əhəmiyyətli hərbi, iqtisadi və humanitar yardım göstərməyə davam edəcəklərini açıqladılar. NATO-Ukrayna Şurasının iclasından sonra verilən bəyanata görə, Alyansın bir çox üzvü 2024-cü ildə milyardlarla avro əlavə imkanlar təqdim etmək planlarını açıqlayıb.
Alyans üzvləri Rusiyanın Ukraynaya aviazərbələrinin artmasını, həmçinin Rusiyanın Şimali Koreyadan ballistik raketlər və İrandan pilotsuz təyyarələrdən istifadəsini qətiyyətlə pisləyib. Görünən budur ki, anti-Rusiya qüvvələri son dirənişlərini ortaya qoyublar".
Məhəmmədəli QƏRİBLİ
