İbrahim Rüstəmli: "Azərbaycan qabaqlayıcı tədbirlərdən istifadə etməklə, ordusunu daha da gücləndirməlidir"
Bizə qarşı olan mənfi münasibət, ənənəvi mənbələrdən gələn mənfi münasibət dayanmayacaq. Ermənistanı silahlandırma cəhdləri bu məqsədi daşıyır ki, bizi daim təzyiq altında saxlasınlar.
Bu fikirləri Prezident İlham Əliyev yanvarın 10-da yerli televiziya kanallarına müsahibəsində səsləndirib.
Prezident deyib ki, bu bizi bundan sonra da rahat yaşamağa qoymamaq üçün səylərdir və əfsuslar olsun, burada da Fransa yenə ön plandadır: "Bu gün Ermənistanı silahlandıran, onlara ürək-dirək verən, onların hərbçilərini hazırlayan və növbəti müharibəyə hazırlayan ölkə Fransadır. Ona görə mən deyəndə ki, Fransanın siyasəti Qafqazda gərginliyin artmasına səbəb olur, məhz bunu nəzərdə tuturdum".
Prezidentin Fransanın Azərbaycana heç vaxt dost olmayacağı ilə bağlı verdiyi anonsu necə dəyərləndirmək olar?
Hərbi-siyasi şərhçi, ehtiyatda olan polkovnik-leytenant İbrahim Rüstəmli "Bakı-Xəbər"ə açıqlamasında bildirdi ki, bu haqda danışarkən ilk növbədə ən böyük savaşın Cənubi Qafqazdakı mövqe uğrunda getdiyini bildirmişik: "Başda Rusiya, Fransa olmaqla, hər bir ölkə Cənubi Qafqazda öz mövqeyini möhkömləndirməyə çalışır. Rusiyanın Ukrayna müharibəsinin fonunda bu cəhdlərinin artması tam təbiidir. Yəni Fransa, İran kimi bir sıra Avropa və Qərb dövlətləri bu fürsətdən yararlanmağa çalışırdılar. Yadınızdadırsa, Amerika Ermənistanda hərbi təlimlər keçdi, Fransa bura 500 nəfərdən ibarət xüsusi missiya göndərmək istəyirdi. Mən sizə tam əminliklə deyə bilərəm ki, Fransanın Cənubi Qafqaza, daha doğrusu Qarabağa göndərmək istədiyi missiya 500 nəfərdən ibarət idi və bu heyətin böyük əksəriyyəti bir zamanlar xüsusi xidmət orqanlarında çalışmış, peşəkar hərbiçilər, xüsusi təyinatlılar idi. Burda çox ciddi və böyük plan var idi. Bu planın əsas qayəsi Cənubi Qafqazda yerləşmək, Qarabağ problemini əbədi problemə çevirmək olub. Bunun da arxasında Fransa dayanırdı. Fransanın bu cəhdinin qarşısı Cənab Prezidentimiz, ona dəstək olan Türkiyə prezidenti Rəcəb Tayib Ərdoğanın uzaqgörən, müdrik siyasətinin nəticəsində alındı. Bunun qarşısı alınmasa idi, burada çox ciddi problem yaşanacaqdi. Eyni zamanda, İranın da öz mövqeyini möhkəmlətmək üçün müxtəlif cəhdləri oldu. Xatirlayırsızsa, Zəngəzur dəhlizi ilə bağlı problemə kimi, Amerika hərbiçilərinin Ermənistanda təlim keçirdiyi məqama kimi İran Ermənistanın yanında idi. Ancaq amerikalılar bura gələndən sonra İran Ermənistanla bağlı müəyyən neqativ bəyanatlarla çıxış etdi. Bu gün Cənubi Qafqazda çox böyük mövqe savaşı gedir. Bu savaş sakitləşmiş görünsə də, amma gələcək üçün çox ciddi baza yaradılır. Bu bazanı yaradanlardan da birincisi Fransadır. Ermənistanda Avropa Şurasının casus şəbəkəsi fəaliyyət göstərir. Onların məqsədi Azərbaycana qarşı nə edə biləcəklərinə cavab tapmaqdan ibarətdir. Cənab Prezident bununla bağlı çox maraqlı fikirləri ilə ağlımızda qalıb. Bu fikirlərdən biri də odur ki, biz gələn əsrin də müharibəsinə hazır olmalıyıq. Bu əbədi savaşdır. Eyni zamanda, Cənab Prezident öz çıxışında çox maraqlı bir fikirə də imza atdı. Dedi ki, bizim düşmənlərimiz bizi gücləndirir. Onlar bizi təriflyəndə biz dərhal düşünürük ki, nə səhvə yol vermişik ki, onlar bizi tərifləyirlər. Yəni harda tənqid varsa, o tənqid bizim doğru əməlimizdən doğan tənqiddir. Ona görə də, mənim kimi biri üçün cənab Prezidentin fikirlərini şərh etmək bir qədər məsuliyyətli məsələdir. Amma onun bir əsgəri olaraq, ilk növbədə onu demək istəyirəm ki, bu gün biz savaş bitdi deyib dayanmamalıyıq. Ən böyük savaş irəlidədir. Yazılarımın birində bu haqda xüsusi qeyd etmişdim. Yazmışdım ki, qələbə təhlükəli olur. Ona görə də, bu məsələdə mən cənab Prezidentin mövqeyini dəstəkləyirəm və belə düşünürəm ki, Azərbaycan dövlətinin silahlı qüvvələr quruculuğu, iqtisadi islahatlarla bağlı həyata keçirdiyi planlar bu təhlükənin qabağını almaq üçün kifayət qədər ciddi zəmin yaradır. Ona görə də, biz dayanmamalı, ordumuzu daim gücləndirməli, iqtisadi asılılığımızı maksimum dərəcədə azaltmalıyıq. Əlbəttə, dünya bir-biri ilə əlaqədədir, dünyadan təcrid olunmuş şəkildə yaşamaq çox çətindir. Bunu da nəzərə alsaq, onu da deməliyəm ki, biz eyni zamanda dünya dövlətləri ilə öz münasibətlərimizi yüksək səviyyədə saxlamağa, balanslaşdırılmış siyasət həyata keçirməyə çalışmalıyıq. Bu da bizim gələcək asayişimiz, dincliyimiz, müharibəsiz həyatımız üçün əsas qaranti rolunu oynaya bilər. Bəli, Ermənistana Hindistandan silah daşınır. Ermənistan öz sözü, mövqeyi olmayan dövlətdir. Cənab Prezident öz çıxışında " Ermənistan + " ifadəsini işlətdi. Bu işarənin arxasında Fransa, İran, bir sıra dövlətlər dayanır. Cənab Prezident də öz çıxışında maksimum ehtiyatlı davrandı və digər ölkələrin adını çox az çəkdi. Mən bunu yüksək dəyərləndirirəm. Bu bir peşəkarlıq əlamətidir. Ancaq bununla belə, alt qatda Azərbaycana qarşı çox ciddi siyasi, hərbi təhdidlər hiss olunur. Bu təhdidlərin reallaşması görünəndir. Ona görə də, Azərbaycan qabaqlayıcı tədbirlərdən istifadə etməklə, ordusunu daha da gücləndirməlidir. Müdafiə Nazirliyində indi nələrin baş verdiyi göz qabağındadır. Ən böyük islahatlar isə Müdafiə Nazirliyində aparılmalıdır. Mən inanıram ki, seçkilərdən sonra Müdafiə Nazirliyində də çox ciddi islahatlar, kadr dəyişiklikləri aparalıcaq".
Məhəmmədəli QƏRİBLİ
