Fatimə Hacıbəyli: "Qarabağda aparılan yenidənqurma, quruculuq işlərinin əhatə dairəsi gündən-günə genişləndirilir"
Azərbaycan öz torpaqlarını azad etməklə dayanıqlı sülhə, tərəqqiyə əsaslanan, bir çox ölkələrə nümunə olan, irimiqyaslı bərpa-quruculuq layihələri ilə səciyyələnən tarixi inkişafının yeni mərhələsinə qədəm qoyub.
2030-cu ilədək Azərbaycanın beş Milli Prioritetindən biri işğaldan azad edilmiş ərazilərə "Böyük Qayıdış"dır. "Böyük Qayıdış" çərçivəsində, yenidən qurulan ərazilərə keçmiş məcburi köçkünlərin qayıdışı davam edir.
Prezident İlham Əliyev yanvarın 10-da yerli televiziya kanallarına müsahibəsində bildirib ki, bu il daha böyük sayda keçmiş köçkün öz dədə-baba torpaqlarına qaytarılacaq və onların bu il qaytarılacaqları şəhərlər arasında beş şəhər - Şuşa, Cəbrayıl, Kəlbəcər, Xankəndi, Xocalı şəhərləri olacaq.
"…bundan sonra Qarabağın xoşbəxt günləri başlayır"
"Vəfa" Sosial İctimai Birliyinin sədri Fatimə Hacıbəyli "BAkı-Xəbər"ə açıqlamasında bildirdi ki, Azərbaycan dövlətinin Qarabağda fəaliyyəti təkcə bərpa-quruculuq prosesləri ilə bitmir: "Dövlətin qarşıya qoyduğu məqsədlər bir tərəfdən təhlükəsizlik problemlərinin həlli, ərazilərin minalardan təmizlənməsi, digər tərəfdən dağılmış iqtisadiyyatın bərpası, yeni iş yerlərinin yaradılması və insanların sosial müdafiəsinin gücləndirilməsidir. 44 günlük Vətən müharibəsindən sonra Qarabağda gecə-gündüz quruculuq işləri gedir. Cari il ərzində şuşalılar da öz doğma torpaqlarına, yurdlarına geri dönəcək. Şuşa o şəkildə bərpa olunur ki, Azərbaycan xalqının tarix boyu arzu və istəyi Şuşanı Qarabağın incisi kimi görmək olub. Bu gün o arzu və istək yerinə yetirilir. Demək olar ki, Ali Baş Komandan mütəmadi olaraq bu ərazilərdə olub. Həm abidələrin bünövrəsinin qoyulmasında, həm də ki, açılışlarında iştirak edir. Bütün bunlar onu göstərir ki, Şuşa ilə bağlı nəzərdə tutulan proqram uğurla yerinə yetiriləcək".
Həmsöhbətimiz onu da əlavə etdi ki, Böyük Qayıdış konsepsiyasına uyğun olaraq Kəlbəcərdə geniş quruculuq bərpa işləri icra edilir: "Kəlbəcər rayonunun ərazisində Tərtər çayın sol qolu olan Meydan çayının üzərində 3,4 meqavatlıq kiçik su elektrik stansiyası tam yenidən qurulub. Rayonun qərbində Tərtər çayı üzərində yerləşən 8,33 meqavat gücündə "Çıraq-1" və 5,3 meqavat gücündə olan "Soyuqbulaq", Qaraarxac çayı üzərində 3,6 meqavat gücündə "Çıraq-2" Kiçik Su Elektrik stansiyaları "AzərEnerji" ASC tərəfindən tamamilə yenidən qurulub. Həmçinin, yaşayış məhəlləsinin konsepsiyası Dövlət Şəhərsalma və Arxitektura Komitəsinin sifarişi ilə icra olunan Baş plan layihəsi çərçivəsində hazırlanıb. Məhəllədə dördmərtəbəli 3 və ikimərtəbəli 10 yaşayış binasının inşası nəzərdə tutulur. Burada 112 mənzildə ümumilikdə 460 nəfərdən çox sakin yaşayacaq. Məhəllədəki məktəbin ətrafında salınacaq yaşıllıq ərazi ictimai məkan funksiyasını yerinə yetirməklə əhalinin asudə vaxtının səmərəli keçirilməsinə xidmət edəcək. Ümumiyyətlə, cənab Prezidentin Kəlbəcərə səfəri burada bir sıra açılışların edilməsi təməlqoyma mərasimləri qısa zamanda bu bölgəmizin də Azərbaycanın ümumi ahənginə uyğun inkişaf edəcəyinə tam əminlik yaradır. Kəlbəcərlilərin isə amalı qısa zamanda cənab Prezidentin rəhbərliyi ilə yenidən canlanan Kəlbəcərə qayıdıb burada əbədi, xoşbəxt yaşamaqdır".
Birlik sədrinin sözlərinə görə, Qarabağda aparılan yenidənqurma, quruculuq işlərinin əhatə dairəsi gündən-günə genişləndirilir. Bu il ərzində cəbrayıllıların öz ata yurdlarına geri dönüşü mümkün olacaq: "Xankəndi qədim Azərbaycan diyarıdır. Xankəndinin təməli Qarabağ xanı tərəfindən qoyulub. Ermənistanın işğal siyasətinin mahiyyəti olaraq 30 il ərzində Xankəndidə separatçılar yuva salmışdı. Azərbaycan ərazilərini 30 il ərzində işğal altında saxlayan Ermənistan bunun əbədi davam edəcəyini düşünürdü. Amma şanlı Azərbaycan Ordusu onlara və bütün dünyaya sübut etdi ki, Qarabağ tarixi, əzəli Azərbaycan torpağıdır və buranın əsl sahibləri Azərbaycan xalqıdır. 2023-cü ilin 19-20 sentyabr tarixlərindəki antiterror tədbirləri ilə Xankəndi işğaldan azad edildi. Birgünlük antiterror tədbirləri nəticəsində Azərbaycan öz dövlət suverenliyini tam bərpa etdi, Artıq bütün Qarabağ bölgəsində Azərbaycan Bayrağı qürurla dalğalanır. Ölkəmizin başçısı bu il ərzində Xankəndi sakinlərinin də öz evlərinə qayıdacağını bildirib. Bu olduqca qürurverici və tarixi bir məlumat idi, Azərbaycan xalqı uzun on illiklər bayramlarda məcburi köçkünlərin öz torpaqlarına qayıdacağı arzusu ilə yaşayıb. Artıq xalqımızın bu arzuları çin oldu.
Xocalı sakinləri də Xocalıda yenidənqurma işlərinin yekunlaşmasını səbrsizliklə gözləyir. Bu qayıdış gec olmayacaq. Azərbaycan Ordusu peşəkarlıq, qəhrəmanlıq göstərərək bütün şəhidlərimizin, Xocalı qurbanlarının qisasını döyüş meydanında aldı. Sözsüz ki, Azərbaycan ərazisində uzun müddət kök salmış terror yuvasının məhv edilməsi, birdəfəlik yox olması hər birimiz, dünyada yaşayan azərbaycanlılar üçün qürurverici hadisə oldu. Xatırladım ki, Prezident İlham Əliyev müraciətində bu müjdəni də çatdırdı ki, 2024-cü ildə bir neçə yaşayış məntəqəsinə keçmiş köçkünlər, qaçqınlar qayıdacaq, o cümlədən Xocalı sakinləri də".
F.Hacıbəyli son olaraq bildirdi ki, Qarabağın əzablı və çətin günləri nə qədər olubsa, bundan sonra isə Qarabağın xoşbəxt günləri başlayır. Bu xoşbəxt günlərin qurucusu Azərbaycan xalqıdır və Azərbaycan xalqını yumruq şəklində birləşdirən Ali Baş Komandanımız İlham Əliyevdir.
Günel CƏLİLOVA
