Ədalət Mustafayev: "Müasir tariximizin yeni dövrünün 20 senytabrdan sonra başlaması mesajı tarixçilərə də ünvanblanıb ki, bizlər çağdaş tariximizin yenidən obyektiv yazılmasını təmin etməliyik"
"Sentyabra qədər getdiyimiz yol məqsədyönlü yol idi, məqsədə hesablanmış yol idi, düzgün yol idi". Bunu Prezident İlham Əliyev yerli televiziya kanallarına müsahibəsində deyib.
"İstər siyasi müstəvidə, istər hərbi müstəvidə, istər ölkəmizdə gedən proseslər nöqteyi-nəzərindən bu hadisə bütün işlərimizin, elə bil ki, son nidası idi", - deyən Prezident Əliyev vurğulayıb ki, bu gün biz 2024-cü ilə suverenliyini tam bərpa etmiş ölkə kimi, xalq kimi başlayırıq. "Hesab edirəm ki, müasir tariximizin yeni dövrü məhz sentyabrın 20-dən sonra başlayıb".
Prezident niyə məhz 2023-cü ilin 20 sentyabrdan sonranı xüsusi vurğulayır?
"Azərbaycanın ərazi bütövlüyünün və öz torpaqları üzərində suverenliyinin bərpa edilməsi bu tarixdən başladı…"
AMEA-nın A.Bakıxanov adına Tarix İnstitutunun aparıcı elmi işçi, tarix üzrə fəlsəfə doktoru Ədalət Mustafayev "Bakı-Xəbər"ə bildirdi ki, Prezident çox əsaslı bir fikir bildirib. Ə.Mustafayev qeyd etdi ki, 2023-cü ilin sentyabr ayının 19-20-də keçirilən lokal antiterror tədbirlərindən sonra Azərbaycan öz ərazilərində suverenliyini tam şəkildə bərpa etdi. "Müasir Azərbaycan tarixinin yeni dövrünün 20 sentyabrdan sonra başlaması Azərbaycanın konstitusion ərazi quruluşunun bərpa olunması ilə bağlıdır. Bu, eyni zamanda, erməni separatizminin məhv edilməsi, erməniləri əsas tutan xarici güclərin dövlətimizin daxili işlərinə müdaxilə etməsinə son qoyulması nəticəsində baş tutub. Həm separatizm məhv edildi, həm də onlara qol-qanad verən məlum xarici güclərin qarşısı alındı, onlar zərərsizləşdirildi. Keçən 30 ildə Azərbaycanın nə qədər konstruktiv mövqe sərgiləməsinə baxmayaraq, Ermənistan və onun havadarlarının dəstək veridiyi separatçıların Qarabağda qeyri-qanini mövcudluğu 2023-cü ilin 20 sentyabrına qədər davam edirdi. Cənab Prezidentin dediyi kimi, yalnız 19-20 sentyabr antiterror tədbirlərindən sonra separatizm qalıqları tarixin zibilliyinə atıldı. Müasir Azərbaycan tarixinin məhz həmin dövrdən başlaması ilk növbədə Azərbaycanın beynəlxalq əlaqələrində yeni bir baxış formalaşdırır, beynəlxalq təşkilatlarla bu və digər şəkildə əməkdaşlığın prespektivlərinin yeni istiqamətlərinə bir stimul olacağını ifadə edir".
Tarixçi alim bildirdi ki, digər tərəfdən bu, Azərbaycanın dayanıqlı inkişafı, iqtisadiyyatının yüksəlməsi və əhalinin sosial rifahının yaxşılaşdırılması baxımından pozitiv addımların atılmasına, prinspial mövqenin ortaya qoyulmasına, düzgün seçilmiş strategiyanın yeni dəyərlərə uyğun qiymətləndirilməsinə bir töhfədir, göstərişdir.
Ə.Mustafayev hesab edir ki, Prezidentin 20 sentyabr açıqlaması həm də tarixçilərə bir mesajdır. "Müasir tariximizin yeni dövrünün 20 senytabrdan sonra başlaması mesajı tarixçilərə də ünvanblanıb ki, bizlər çağdaş tariximizin yenidən obyektiv yazılmasını təmin etməliyik. 20 sentyabrdan sonra Azərbaycanın ərazi bütövlüyünün və öz torpaqları üzərində suverenliyinin bərpa edilməsi bu tarixdən başladı və bu da tariximizin yeni dövrünün başlanğıcıdır. Tariximizə yeni ideoloji baxış formalaşıb və bu istiqamətdə yeni tarixi araşdırmalar, əsərlər yaranacaq və onlar yeni texnologiyalar vasitəsilə dünyaya yayılacaq. Azərbaycan regionda yeni reallıqlar formalaşdırıb və bununla da hər kəs barışmağa məhkumdur"-deyə qeyd edən Ə.Mustafayev bildirdi ki, müstəqillik tariximizdə ilk dəfə Azərbaycanın bütün ərazilərində 7 fevral növbədənkənar prezident seçkilərinin keçirilməsi həm bizim o torpaqlar üzərində suverenliyimizin, qələbəmizin təsdiqidir, həm də bütün dünyaya bir mesajdır. Qarşıdan gələn növbədənkənar Prezident seçkilərində İlham Əliyevi dəstəklədiyini deyən Ə.Mustafayev qeyd etdi ki, məhz İlham Əliyev Azərbaycanın ərazi bütövlüyünü təmin etdi, onun sayəsində dövlətimiz qaliblər sırasında bərqərar olundu.
İradə SARIYEVA
