Mübariz Göyüşlü: "Ermənistan hakimiyyəti hər dəfə Azərbaycana qara niyyətini nümayiş etdirir"
Azərbaycan və Ermənistan arasında hərbi əməliyyatlar yekunlaşdıqdan sonra Ermənistan tərəfindən ölkəmizə qarşı müxtəlif vaxtlarda həqiqəti əks etdirməyən məlumatlar yayılmaqdadır. Bu səfər Ermənistan Təhlükəsizlik Şurasının katibi Armen Qriqoryan yanvarın 8-də verdiyi açıqlamada Azərbaycanda 23 erməni hərbçinin olduğunu bildirib.
O, açıqlamasında bunları deyib: "Ümid edirəm ki, Azərbaycanla sülh sazişi imzalanana qədər məhbuslar məsələsi həll olunacaq".
"Rəsmi Bakı bəyan edib ki, Azərbaycanda saxlanılan, barəsində istintaq aparılan ermənilər cinayətkardır, həmin şəxslər soyqırım həyata keçirib, Azərbaycan konstitusiyasına qarşı çıxıblar"
Ermənistan rəsmisinin guya 23 hərbçi əsirin Azərbaycanda saxlanılması fikrinə münasibət bildirən Müasir İnkişaf Birliyinin sədri, siyasi şərhçi Mübariz Göyüşlü "Bakı-Xəbər"ə açıqlamasında qeyd etdi ki, Ermənistan hakimiyyəti hər dəfə Azərbaycana qarşı qara niyyətini nümayiş etdirir. Onlar Azərbaycanın sülh yaratmaq missiyasını qarayaxma kimi təqdim edirlər: "Ermənistandakı ermənilər və ya xaricdəki lobbi zamanla olmayan soyqırımla bağlı ölkəmizi ittiham edir. Bununla da onlar özlərini dünyaya sülhpərvar ölkə kimi təqdim etmək istəyir. Indi də 23 hərbçinin ölkəmizdə saxlanılması ilə bağlı məsələni gündəmə gətirirlər. Azərbaycan tərəfinin belə bir məlumatına rast gəlməmişəm. Rəsmi Bakı bəyan edib ki, Azərbaycanda saxlanılan, barəsində istintaq aparılan ermənilər cinayətkardır. Məlumdur ki, həmin şəxslər soyqırım həyata keçirib, Azərbaycan konstitusiyasına qarşı çıxıb, ölkənin ərazi bütövlüyünü və suverenliyini pozublar. Buna görə o şəxslər saxlanılaraq Bakıya gətirilib. Həmin cinayətkarlarla bağlı istintaq araşdırma tədbirləri həyata keçirilir".
Həmsöhbətimiz onu da əlavə etdi ki, ermənilər hər fürsətdə Azərbaycanı hansısa mövzu ilə bağlı ittiham edir. Onların bu davranışı iki ölkə arasındakı münasibətlərə təsir edir.
Günel CƏLİLOVA
