Əli Orucov: "Makron hansı oyunlara getməsindən asılı olmayaraq siyasi iflasa məhkumdur"
Məlum olduğu kimi, Fransanın Baş naziri Elizabet Bornun hökumətin istefası ilə bağlı müraciəti ölkə prezidenti tərəfindən qəbul edilib. İmmiqrasiya qanunu qəbul ediləndən başlayan böhran hökumətin istefasına gətirib. Elizabet Born təqdim etdiyi istefa məktubunda islahatları davam etdirməyə çağırıb.
Ancaq məsələlərə dərindən yanaşanda görürük ki, Baş naziri istefaya əslində ölkə prezidenti Emmanuel Makron məcbur edib. Çünki bu günlərdə Fransanın ictimai rəyi araşdırma institutu "Fiqaro " qəzetinin sifarişi ilə keçirdiyi rəy sorğusunun nəticələrini açıqlayıb. Rəyi soruşulanların 70 faizi, yəni hər 10 nəfərdən 7-si baş nazir Bononun istefaya göndərilməsini zəruri bilib və onun fəaliyyətini səmərəsiz sayıb. Ancaq məsələ ondadır ki, "Fiqaro" qəzeti Makrona yaxın mətbu orqandır. Bu onu göstərir ki, "Fiqaro" qəzetinin sifarişi ilə keçirilmiş və baş naziri çıxdaş etməyi hədəfləmiş sorğu əslində prezident Makronun sifarişidir. Makron özünün daxili siyasət uğursuzluqlarını baş nazirin boynuna yükləməklə sudan quru çıxmaq istəyir. Yəni Makron ölkədə özünün uğursuz siyasətindən yayınmaq, məsuliyyətdən qaçmaq və təmizə çıxmaq üçün Baş naziri güdaza verdi. Elə şərait yaratdı ki, Born istefa verməyə məcbur olsun. Makron bununla ölkə daxilində öz mövqeyini möhkəmləndirməyə çalışır. Makronun digər hədəflərindən biri də Avropa Parlamentinə keçirilən seçkilərdə öz partiyasının qələbəsini təmin etməkdir. Maraqlıdır, bu cür daxili oyunlar, intiriqalar Makrona AP-yə keçirilən seçkilərdə partiyasının qələbəsini təmin etməyə imkan verəcək, yoxsa verməyəcək?
"Ölkədə iqtisadi göstəricilərin pisləşməsi, miqrantlara qarşı diskriminasiya siyasəti, Ukrayna müharibəsinin fəsadları..."
Sözügedən məsələni "Bakı-Xəbər"ə şərh edən AMİP funksioneri Əli Orucov hesab edir ki, Makron hansı oyunlara getməsindən asılı olmayaraq siyasi iflasa məhkumdur: "Makronun siyasi iflasını şərtləndirən bir sıra faktorlar var. Əvvəla, nəzərə almaq lazımdır ki, 2017-ci ildən Fransaya rəhbərlik edən Makron ciddi siyasi uğurlara imza ata bilməyib. Xüsusən də Makronun xarici siyasətindəki uğursuzluqları çox keçmədən daxili siyasətə də öz təsirini göstərdi. Fransanın gəmi sənayesi və digər sahələrlə bağlı Avstraliya ilə çoxmilyardlı müqavilələri var idi. İki il əvvəl Avstraliya həmin müqavilələrdən çıxdı və Fransa böyük ziyanla üzləşdi. Çox keçmədən Fransanı Afrikadan sıxışdırmağa başladılar. Tarixən Qərbi və Mərkəzi Afrika Fransanın müstəmləkəsi olub. Altımışıncı illərdə Afrika ölkələri siyasi müstəqillik əldə etsələr də, Fransanın təsiri altında idilər. Ancaq ötən ildən başlayaraq Fransa bir-bir Afrika ölkələrindən qovuldu. Fransa ordusu, hərbi bazaları həmin ölkələrdən çıxarıldı. Bütün bunlar Makronun Fransada apardığı daxili siyasətə təsirsiz ötüşə bilməzdi. Ölkədə iqtisadi göstəricilərin pisləşməsi, miqrantlara qarşı diskriminasiya siyasəti, Ukrayna müharibəsinin fəsadları Fransada Makrona nifrəti artırdı. Düzdür, Makron 2 dəfə prezident seçildiyinə görə 3-cü dəfə prezident ola bilməyəcək. Ancaq bütün bunlar onun rəhbərlik etdiyi siyasi partiyanı da xilas etməyəcək. Makronun bu uğursuz siyasətindən sonra düşünmürəm ki, həmin qüvvələr seçkidə yenidən uğur qazansın. Düşünmürəm ki, Makronun partiyası AP-yə keçirilən seçkilərdə uğur əldə etsin. Bütün sadaladığım məsələlər Makron və onun partiyasının sonu olacaq".
Vidadi ORDAHALLI
