Elxan Şıxəliyev: "Ermənistanın bu kiçik proqramına, istəklərinə görə İsrail addım atmaz"
Ermənistan Ədliyyə Nazirliyi PUA-larla mübarizə məqsədilə avadanlıqlar alacaq. Bunu Ermənistanın ədliyyə naziri Qriqor Minasyan deyib:
"Biz PUA-ların cəzaçəkmə müəssisələrinin ərazisinə daxil olmasının qarşısını almaq üçün İsrail istehsalı olan xüsusi avadanlıq almalıyıq".
Onun sözlərinə görə, müasir texnologiyalar kifayət qədər böyük məsafədən bir metrə qədər dəqiqliklə narkotiklərin cəzaçəkmə müəssisəsinin ərazisinə atılmasına imkan verir.
Azərbaycanın strateji müttəfiqi sayılan İsrail niyə birdən-birə Ermənistanla məhz bu sahədə əməkdaşlığa getdi? Gözdən pərdə asmaq üçün Ədliyyə bəhanə ola bilərmi? Əslində bu, gələcəkdə hərbi-texnoloji sahədə yeni sövdələşmələrin əsası sayıla bilərmi?
Hərbi-siyasi şərhçi, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki, Ermənistan rəsmilərinin istəkləri İsrailə eşitdirilir: "Bunlar bir plandır. Onun İsraillə nə danışıqları, nə də müqaviləsi var. Bu, erməni hiyləgərliyinə hesablanmış bir məsələdir. İsrail erməniləri arasında İsrailin özündə də ciddi fikir ayrılıqları, ziddiyyətləri var və qarşıdurmalar, toqquşmalar olur. Bunu həm erməni diasporunun, həm İsrail diasporunun münasibətlərinin nəticəsi olaraq Ermənistanın lehinə düşünmək olar. Onlar bilir ki, istənilən halda, həm də beynəlxalq münasibətlərdə yəhudi lobbisinin gücü nədir. Eyni zamanda onlar bilir ki, silah istehsalında, ixracında İsrail Azərbaycanla strateji müttəfiqdir. Ona görə də, İsrailin Ermənistana müsbət cavab verəcəyini düşünmürəm. Çox kiçik bir həcmdə Ermənistanın istəkləri üzərinə İsrail Azərbaycanla münasibətlərinə kölgə salmaz. Xüsusən də, bizim münasibətlərimizin içində karbohidrogen ehtiyatlarının satışı, böyük həcmdə iqtisadi, maliyyə münasibətlərinin olması da buna sübutdur. Ermənistanın bu kiçik proqramına, istəklərinə görə İsrail addım atmaz. Çünki İsrail bunun qarşılığında Azərbaycanın reaksiyasını bilir. Ola bilər ki, Azərbaycanla qarşılıqlı, danışılmış şəkildə bunu etsin. Onlar antidron proqramlarını cəzaçəkmə müəssisələri üzərindən modelləşdirirlər. Normalda, gələcəkdə Azərbaycan uçuş aparatlarının istifadəsinə qarşı böyük bir proqrama malik olma cəhdləri ola bilər. Cəhd etsələr belə, onların bu planları uğurlu olmayacaq. Ermənistanın istəyi bəllidir. Biz İsrailin istəyinə baxmalıyıq".
İki dövlət arasında münasibətlərin ciddi hərbi əməkdaşlıq səviyyəsinə çatacağı inandırıcı görünmür. Çünki bu, Azərbaycan-İsrail münasibətlərinə mənfi təsir göstərə bilər. Digər tərəfdən İran-Ermənistan münasibətləri də var. Lakin İranın Ermənistan-İsrail əlaqələrinə dərin tənqidi münasibətdə olacağı inandırıcı deyil. Ermənilərin güclənməsini istəyən İran bunun Azərbaycana qarşı olduğunu düşünə bildiyi üçün belə təşəbbüsləri loyal da qarşılaya bilər. Tərəflər arasında hərbi-texniki əməkdaşlığa gəlincə, İrəvan istəsə də müasir İsrail hərbi sistemlərini ala bilməz. Çünki: 1. Buna maddi imkanları yoxdur. 2. Rusiya imkan verməz. Üçüncü səbəb də var: İranın İsrailə ənənəvi münasibəti. 4. Azərbaycan-İsrail münasibətlərinin real durumu buna şərait yaratmır.
Məhəmmədəli QƏRİBLİ
