Faiq Ələkbərli: "Molla rejimi Azərbaycan vətəndaşlarına qarşı bu kirli oyunu dayandırmalıdır"
Molla rejimi Azərbaycan vətəndaşlarına qarşı əksər hallarda müsbət mövqe tutmur. Bu ölkədə təhsil alan gənclərdən əsasən casusluq xidməti üçün istifadə etməyə alışıq olan Tehran rejimi onun istəyini rədd edənlərə hər zaman aqressiv yanaşır, vətəndaşlarımızı şərləyərək qanunsuz olaraq həbs edir.
Qum şəhərində dini təhsil alan Azərbaycan vətəndaşı Davud Səfər oğlu Səfərov Vətənə qayıtmaq istəyərkən İran sərhədçiləri tərəfindən həbs olunub. Bu barədə məlumatı "Azad İran" "Telegram" kanalı onun yaxınlarına istinadən yayıb.Mətbuatda gedən məlumata görə, mənbə yazır ki, S.Davud 2021-ci ildən "İmam Xomeyni" mədrəsəsində dini təhsil alıb.Tədris prosesində siyasi mövzular, antiazərbaycan dərsləri təbliğ olunduğundan, eləcə də tələbələrin sosial durumunun pis vəziyyətinə görə Davud İranda oxumağa davam etmək istəməyib.Yaxınlarının dediyinə görə, ona hətta qanunsuz silahlı qruplaşma kimi fəaliyyət göstərən "Hüseyniyyun" təşkilatına qoşulması üçün İran hüquq-mühafizə orqanları tərəfindən təzyiqlər də göstərilib.Qarşılaşdığı haqsızlıqlardan, qeyri-insani davranışlardan bezən S.Davud Azərbaycana qayıtmaq istəyib. Ancaq sənədlərinin düzgün olmadığı bəhanəsi altında İran sərhədçiləri tərəfindən saxlanıb və sərhəddən buraxılmayıb. Onun xarici pasportu əlindən alınıb və azadlığı məhdudlaşdırılıb.Kanaldan o da vurğulanıb ki, son zamanlar İranda dini təhsil alan tələbələrin Azərbaycana qayıtmasına maneələr yaradılır, onlar hədə-qorxu ilə İranda qalmağa və oradan sosial şəbəkələr və media üzərindən Azərbaycan əleyhinə radikal dini fəaliyyət aparmağa məcbur edilirlər.
Bu artıq sayca neçənci Azərbaycan vətəndaşıdır ki, molla rejimi tərəfindən qondarma ittihamlarla saxlanılır. Kimlər ki molla rejiminin xeyrinə casusluq etmək istəmir, ona qarşı belə hərəkətlər edilir.
"...Fars-molla rejimi onların xeyrinə casusluq etmək istəməyən gənclərimizə bu cür təzyiqlər göstərir"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini Faiq Ələkbərli "Bakı-Xəbər"ə "Məlum olduğu kimi, sözdə islam dövləti adlanan İran Azərbaycana, Azərbaycan vətəndaşlarına münasibətdə həmişə qərəzli olub. Bu qərəzin də əsas mahiyyətində Azərbaycanın varlığını inkar etmək cəhdi dayanır. Çünki Azərbaycan təkcə Azərbaycan Respublikasından ibarət deyil, Azərbaycan həm də Təbrizdir, Xoydur, Ərdəbildir, Həmədandır, Zəncandır, Tehrandır, Qumdur. Faktiki olaraq, 1925-ci ilə qədər orada Azərbaycan dövlətçiliyi hakim olub. Yəni Tehranda, Zəncanda, İsvahanda, Şirazda, Həmədanda, Qaşqay elində, Xorasanda Azərbaycan-türk dövlətçiliyi hökm sürürdü. Türklərin hakimiyyətinə böyük güclərin, xüsusən də Böyük Britaniyanın dəstəyi nəticəsində son qoyan Pəhləvilər və onun davamı olan indiki molla rejimi Azərbaycanın varlığını qəbul etmək istəmir. Bu səbəbdən də hər vasitədən istifadə edir. Çünki Azərbaycan Respublikasının varlığı həm də Qacarlar dövlətinin varisliyi deməkdir. Məhz bu anlamda, gördüyünüz kimi, Azərbaycan Respublikasınbın vətəndaşlarını müxtəlif yollarla öz təxribatlarına şərik etmək istəyirlər. Əvvəlcə Azərbaycan vətəndaşlarını müxtəlif üsullarla dini təhsil pərdəsi altında oradakı mədrəsələrə, dini müəssisələrə cəlb edirlər, onların tələsinə düşənlərdən dövlətimizə qarşı istifadə edirlər. Hansı Azərbaycan vətəndaşı ki, molla rejiminin siyasətinə uymur, onların məqsədinin islam dininə, şiəliyə xidmət olmadığını, paniranizmə xidmət olduğunu anlayır və tələyə düşmür, həmin şəxsə qarşı bu cür qeyri-insani rəftar sərgiləyirlər. Molla rejiminin antiazərbaycan siyasətinə dəstək olmaq istəməyən vətəndaşlarımız ölkəmizə qayıtmaq istəyirlər. Hazırda Tehranda qanunsuz olaraq fəaliyyətini davam etdirən fars-molla rejimi onların xeyrinə casusluq etmək istəməyən gənclərimizə bu cür təzyiqlər göstərir. Bunlardan biri də dini təhsil almaq üçün Quma gedən, lakin orada islam adına utanc gətirən hallarla üzləşən, təhsilini yarımçıq qoyub vətənə qayıtmaq istəyən Davud Səfərovdur. Görünən odur ki, davud Səfərov "İmam Xomeyni" mədrəsəsində dini təhsil alarkən molla rejiminin əsl simasını görüb"-deyə qeyd edən F.Ələkbərli deyir ki, Davud onların Azərbaycan, türk düşmənçiliyini görüb və bununla razılaşmayıb.
F.Ələkbərli qeyd etdi ki, məlumatda deyildiyi kimi, D.Səfərov onların heç bir tələbinə əməl etməyib, "Hüseyniyyun" terror təşkilatına qoşulmayıb, öz vətəninə, dövlətinə xəyanət etməyib, bu da molla rejiminə xoş gəlməyib. "İslam haqda geniş biliyi olan, türkçülüyü, Azərbaycanı dərindən dərk edən gənclər mollaların toruna düşməmək üçün çalışır və öz ölkəsinə qayıtmaq istəyir. Hesab edirəm ki, molla rejiminin məqsədi Azərbaycan vətəndaşlarını müxtəlif yollarla tələyə salıb onların üzərində oyunlar oynamaq, onları öz dövlətlərinə qarşı çevirməkdir.Vətəndaşlarımızı Azərbaycan dövlətinin varlığına qarşı çevirmək istəyirlər. Molla rejimi bütöv Azərbaycana qarşı fəaliyyət göstərir. Onlar Azərbaycan Respublikasına heç nə edə bilməyəcəklər...Hesab edirəm ki, molla rejimi Azərbaycan vətəndaşlarına qarşı bu kirli oyunu dayandırmalıdır"-deyə F.Ələkbərli qeyd etdi.
O əlavə etdi ki, molla rejimi Azərbaycan gənclərini Qumda dini təhsilə cəlb etməklə, əslində hər zaman özünə casus şəbəkəsi formalaşdırmaq məqsədi güdüb. O vurğuladı ki, rejimin toruna düşənlərlə yanaşı, vətənini satmayan gənclərimiz də var.
Leyla QARAXANLI
