Yadigar Məmmədli: "Bir sıra beynəlxalq təşkilatlar, qurumlar Azərbaycana qarşı sankı birləşiblər"
Bir sıra beynəlxalq təşkilatların Azərbaycanla bağlı qərəzli yanaşmaları azalmır. Beynəlxalq Böhran Qrupunun "2024-cü ildə izləniləcək 10 münaqişə" adlı hesabatında Azərbaycanla bağlı fikirlər bunu sübut edir.
Hesabatın Ermənistan-Azərbaycan bölməsində deyilir ki, keçən il Azərbaycanın Dağlıq Qarabağda əməliyyat keçirməsi orada yaşayanların, demək olar ki, hamısının - 100 mindən çox insanın buranı tərk etməsinə səbəb olub. Hesabatda qeyd edilib ki, 2020-ci il müharibəsinin bitməsi ilə Azərbaycanın 2021-ci il sentyabr hücumu arasında sərhəd toqquşmaları Qarabağın özü ilə bağlı olanlardan daha ölümcül oldu: "Daha da önəmlisi, Azərbaycan Ermənistanın cənub-qərbində Türkiyə və İranla həmsərhəd olan Azərbaycan anklavı Naxçıvana quru dəhlizinin olmasını istəyir. Bu marşrut Türkiyə ilə ticarəti asanlaşdıracaq, lakin İrandan yan keçəcək - buna görə də Tehran müxalifdir. O, həm də Rusiyanın sanksiyalardan yayınmasına kömək edə bilər. Artıq 2022-ci ilin sentyabrında Azərbaycan qoşunları Ermənistanın içərilərinə doğru irəliləyib"
Məgər Azərbaycan Ermənistan ərazizinə daxil olub? Üstəlik, Zəngəzur dəhlizini Rusiyanın sanksiyalardan yayınması üçün bir vasitə hesab edirlər.
"Sözügedən hesabat məqsədli xarakter daşıyır və o üzdən, reallıqla heç bir əlaqəsi yoxdur"
Məsələ ilə bağlı "Bakı-Xəbər"ə açıqlama verən media eksperti Yadigar Məmmədli hesab edir ki, bütün bunlar Azərbaycana münasibətdə sərgilənən qərəzli münasibətin tərkib hissəsidir: "Məsələ ondadır ki, bir sıra beynəlxalq təşkilatlar, qurumlar Azərbaycana qarşı sankı birləşiblər. Bir-bir estafeti ələ alıb uydurmalarla çıxış edirlər. Hər qurum öz hesabatında bir cür yalan uydurur. Dövlət Departamenti heç bir əsas olmadan həyasızcasına Azərbaycanı dini azadlıqları məhdudlaşdırmaqda ittiham edir. Halbuki, bunun nə qədər absurd olduğunu onlar da yaxşı bilir. Təəssüflər olsun ki, ölkəmizə yönəlik qarayaxma kampaniyası sistematik hal alıb. Görəndə ki, Azərbaycan regionun lider dövlətidir, sülhün yaranması üçün addımlar atır, qaralama kampaniyasının dozasını daha da artırırlar. Yəni yeni-yeni uydumalarla çıxış edirlər. Beynəlxalq Böhran Qrupunun hesabatı da bu qəbildəndir. Düzdür, BBQ birinci dəfə deyil Azərbaycanla bağlı belə qərəzli hesabatla çıxış edir. Ancaq bu dəfə daha da ifrata vararaq məsələni siyasiləşdirməyə çalışırlar. Azərbaycan postsovet məkanında yeganə ölkədir ki, separatizmə, işğala son qoyaraq ərazi bütövlüyünü təmin edib. Ancaq biz görürük ki, bundan daha çox məyus olan tərəflərdən biri də Qərb təsisatlarıdır. Utanmadan Azərbaycanı Ermənistanın cənubunu işğal etməyə hazırlaşmaqda, Rusiya ilə birgə hərəkət etməkdə ittiham edirlər. Məsələnin ən gülünc tərəfi odur ki, Ermənistan Rusiya ilə bağlı sanksiyalardan yayındığı halda, Azərbaycan hədəf göstərilir. Guya Zəngəzur dəhlizi hesabına Rusiya sanksiyalardan yayınacaq. Halbuki, bütün bunlar belə deyil. Deməyim odur ki, bütün bu hesabatlar məqsədli xarakter daşıyır. O üzdən, sözügedən hesabatın reallıqla heç bir əlaqəsi yoxdur".
Vidadi ORDAHALLI
