Elşad Həsənov: "Sərhədlər delimitasiya olunmayıbsa, Ermənistan nə haqla güzgü prinsipini ortaya atır?"
Qoşunların Ermənistan-Azərbaycan sərhədindən güzgü prinsipi ilə çıxarılması təklifi qüvvədə qalır. Bu barədə Ermənistan Xarici İşlər Nazirliyi məlumat yayıb.
Məlumatda qeyd edilir ki, Ermənistan bu prinsipin tərəfdarı olub: "Ermənistanla Azərbaycan arasında aparılan danışıqlar zamanı Ermənistan tərəfi həmişə qoşunların Ermənistan-Azərbaycan dövlətlərarası sərhədindən güzgü prinsipi ilə çıxarılmasının güzgü tərəfdarı olub və bu, hələ də qüvvədədir".
Burada diqqəti çəkən məqam odur ki, sülh danşıqları ilə bağlı müsbət gözləntilər yaranan kimi, Ermənistan XİN-i ortalığa tez bir şey atır. İndi də deyirlər ki, biz güzgü qaydasında qoşunların geri çəkilməsini təklif edirik və bunu dəstəkləyirik. Bu, əslində sülh danışıqlarını uzatmaq cəhdidir. Məsələ ondadır ki, gərək əvvəl sərhədlər delimitasiya olunsun və ondan sonra qoşunlar sərhəddə dayansın. İkincisi, kim zəmanət verir ki, Azərbaycan qoşunlarını geri çəkəndən sonra Ermənistan yenidən hücum etməyəcək? Axı ötən 30 ildə Ermənistan təcavüzkar dövlət olaraq tanınıb. Üstəlik, qoşinların hazırkı mövqedə dayanmasının sülh danışıqlarına nə maneçiliyi var ki, Ermənistan qoşunların güzgü qaydasında geri çəkilməsini istəyir?
"Bu cür absurd fikirlər həm pozuculuq xarakterlidir, həm də sülh sazişinin uzadılmasına xidmət edir"
Məsələ ilə bağlı "Bakı-Xəbər"ə açıqlama verən siyasi ekspert Elşad Həsənov hesab edir ki, Ermənistan tərəfi güzgü prinsipini gündəmə gətirməklə pozuculuq mövqeyindən çıxış edir: "Məsələ ondadır ki, Ermənistan bütün vasitələrlə sülh danışıqlarını uzatmağa çalışır. Ona görə də hər dəfə süni olaraq nəyisə ortaya atır. Halbuki, müharibə bitib və 2020-ci ilin 10 noyabrında Ermənistan kapitulyasiya aktı imzalayıb. Düzdür, razılaşmanın bəzi bəndlərini Ermənistan yerinə yetirməkdən imtina etdi. Xüsusən də Ermənistan silahlı birləşmələrinin Qarabağdan çıxarılması öhdəliyinə rəsmi İrəvan əməl etmədi. Nəticədə Azərbaycan Ordusu 2023-cü ilin 19-20 sentyabrında antiterror əməliyyatı həyata keçirərək buna son qoydu. Bununla yanaşı, Ermənistan 10 noyabr razılaşmasında Zəngəzur dəhlizinin açılmasını öz üzərinə götürsə də buna əməl etmədi. Buna cavab olaraq Azərbaycan İran üzərindən Naxçıvana yolun açılmasına qərar verdi və bununla bağlı müvafiq işlər görülür. Ermənistanın istəyi odur ki, Zəngəzurdan keçən yol dəhliz statusunda olmasın və ona Rusiya FTX-si nəzarət etməsin. Sözügedən məsələlər hazırda müzakirə olunur. Çünki həyati əhəmiyyət kəsb edir. Ən azından ona görə ki, Ermənistan böyük qlobal layihədən kənarda qala bilər. Bütün bunlardan sonra Ermənistanın ortaya atdığı hoqqa qoşunların güzgü prinsipi ilə sərhəddən çəkilməsi ilə bağlıdır. Halbuki, Ermənistan sərhədində böyük sayda ordu birləşmələri yoxdur. Ordu kazarmalardadır. Ermənistanla sərhədin müəyyən hissəsini sərhəd qoşunları mühafizə edir. Vacib strateji əhəmiyyətli yüksəkliklər ordumuzun nəzarətindədir. Bu da beynəlxalq hüquqa söykənir. Nəzərə alsaq ki, Ermənistanla sülh sazişi hələ imzalanmayıb və sərhədlər delimitasiya olunmayıb, o zaman kimsə bizə irad tuta bilməz. Sərhədlər delimitasiya olunmayıbsa, Ermənistan nə haqla güzgü prinsipini ortaya atır? Bu, həm qəbuledilməzdir, həm də beynəlxalq hüquqa ziddir. Nəzərə almaq lazımdır ki, antiterror əməliyyatlarından sonra Ermənistanla sərhəddə tam sakitlikdir. Atəşkəs pozulmur. Belə olan halda Ermənistanın güzgü prinsipi ilə çıxış etməsi və ondan sonra sülh sazişinin imzalanması tələbi doğru deyil. Bu cür absurd fikirlər həm pozuculuq xarakterlidir, həm də sülh sazişinin uzadılmasına xidmət edir".
Vidadi ORDAHALLI
