Ramil Hüseynov: "Bu dərəcədə Vaşinqtonun erməni lobbisindən ölkəmizə qarşı alət kimi istifadə etməsi heyrət doğurur"
Məlum olduğu kimi, ABŞ Dövlət Departamenti dünya ölkələrində dini azadlıqların vəziyyəti ilə bağlı illik hesabat hazırlayıb. Hesabatda 12 ölkədə – Birma, Çin, Kuba, ÇXDR, Eritreya, İran, Nikaraqua, Pakistan, Rusiya, Səudiyyə Ərəbistanı, Tacikistan və Türkmənistan dini azadlıqların ciddi pozuntusuna yol verən ölkə kimi təqdim olunub.
Xüsusən də hesabatda, həmişəki kimi, Azərbaycanla bağlı hissədə yenə də həqiqətə uyğun olmayan, əsassız, reallıqla əlaqəsi olmayan və qərəzli iddialar öz əksini tapıb. Dünyada dini və milli tolerantlığın hökm sürdüyü Azərbaycana qarşı əsassız ittihamlar səsləndirilib. Ən əsası, hesabatın Azərbaycana aid olan hissəsi dövlət komissiyasının rəhbəri Daniela Aşbaxyan tərəfindən hazırlanıb. Bu xanım Amerika Erməni Assambleyasının rəhbər vəzifəli şəxslərindən biri olub. O, Livanın Los-Ancelesdəki konsulluğunda işləyib.
Maraqlıdır, erməni lobbisinin ABŞ-ın dövlət siyasəti üzərində təsirlərini necə neytrallaşdırmaq olar? Əslində bu, Birləşmiş Ştatlar üçün də problemdir. ABŞ-ın bunun qarşısını almağa marağı yoxdur, yoxsa çarəsizdir? Erməni lobbisinin təsirləri ABŞ siyasətini hara aparacaq?
"Bu gedişlə Birləşmiş Ştatların xarici siyasətində çox ciddi problemlər yarana bilər"
Sözügedən məsələni "Bakı-Xəbər"ə şərh edən "Yeni Xətt" Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, ABŞ-ın erməni lobbisinin təsirlərini azaltmağa marağı yoxdur: "Əfsuslar olsun ki, bu belədir. Yoxsa Birləşmiş Ştatlar kimi böyük ölkə erməni lobbisinə bu dərəcədə meydan verməzdi. Əslində, beynəlxalq normalara görə, başqa ölkəyə çalışan bir şəxsin ABŞ Dövlət Departamentində işləyərək bu dövlətin xarici siyasətinin müəyyənləşməsində iştirak etməsi qeyri-qanunidir. Təəssüf ki, Vaşinqton buna saymazyana yanaşır. İstənilən halda, ABŞ Dövlət Departamentinin bu bəyanatı bəşəri ədalətə həqarət, hörmətsizlikdir. Bu cür qeyri-ciddi hesabatların ABŞ tərəfindən açıqlanması təəssuf doğurur. Bu dərəcədə Birləşmiş Ştatların erməni lobbisindən ölkəmizə qarşı alət kimi istifadə etməsi heyrət doğurur. Ən azından ona görə ki, Azərbaycan multikulturalizm dəyərlərinə böyuk diqqət və qayğı ilə yanaşan, tolerant, dini etiqad və azadlıqlarına hörmət edən bir ölkədir. Biz bunu dəfələrlə öz siyasi addımlarımızla göstərmişik. Ölkədə bərabər şəkildə yaşayan çoxmillətli, çoxdinli vətəndaşlarımızın hüquqları, onlara münasibət həmişə dövlətimizin siyasi konsepsiyasında önəmli rol oynayıb və bu belə də olacaq. Çünki biz uzun illərdir ki, bu cür yaşamağı qonaqpərvərliyimizlə, dəyərlərimizlə qoruyub saxlamışıq. Bütün bunları necə görməzdən gəlmək olar axı? Hesab edirəm ki, ABŞ siyasətində erməni lobbisinin artan təsirləri ölkəni uçuruma aparır. Bu gedişlə Birləşmiş Ştatların xarici siyasətində çox ciddi problemlər yarana bilər".
Vidadi ORDAHALLI
