Aydın Hüseynov: "Azərbaycan hərbi təyinatlı məhsulların ixracatçısına çevrilməkdədir"
"Gələn il hərbi təyinatlı yerli istehsal böyük dərəcədə artacaq". Bu sözləri Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə müraciətində bildirib.
Ölkə başçısı qeyd edib ki, gələn il həm dövlət, həm özəl sektor tərəfindən hərbi təyinatlı məhsulların istehsalına ən azı bir milyard manat sərmayə qoyulacaq: "Beləliklə, biz nəinki özümüzü əsas vasitələrlə təmin edəcəyik, Azərbaycan dünya miqyasında çox ciddi ölkəyə çevriləcək, bizim hərbi təyinatlı məhsulların həcmi və sayı böyük dərəcədə artacaq".
Məlumdur ki, Azərbaycanda hərbi təyinatlı məhsullar indiyədək dövlət tərəfindən istehsal olunub. Prezidentin məlum çıxışından belə aydın oldu ki, gələcəkdə özəl sektor tərəfindən də hərbi təyinatlı məhsullar istehsal olunacaq.
"2024-cü ildə həm dövlət, həm özəl sektor tərəfindən hərbi təyinatlı məhsulların istehsalına ən azı bir milyard manat sərmayə qoyulacaq"
Hərbi təyinatlı məhsulların özəl sektor tərəfindən istehsal olunmasının əhəmiyyəti haqqında danışan Milli Məclisin deputaı Aydın Hüseynov "Bakı-Xəbər"ə açıqlamasında bildirdi ki, Azərbaycanın artır bir neçə ildir peşəkar Ordu formalaşdırmaqla yanaşı, istehsal etdiyi bir sıra hərbi məhsulların texniki parametrlərinə görə də dünya dövlətləri sırasında öz layiqli yerini tutub. Ölkəmizdə istehsal olunan hərbi təyinatlı məhsullar, o cümlədən, "Zəfər", "Zəfər-K", "İnam" tapançaları, PKT, PKM, "İstiqlal-1" pulemyotları və digər məhsullar hərbi-texniki və keyfiyyət göstəricilərinə görə dünya müdafiə sənayesi sektorunda ən qabaqcıl silahlardan hesab olunur: "İqlim"də istehsal olunan "Boran" artilleriya qurğusu, iriçaplı yarımavtomat "İstiqlal" snayper tüfəngi, piyadalar əleyhinə minalar və digər məhsulların da dünyada analoqu yoxdur. Həmin texnikalar ən çətin coğrafi-fiziki şəraitlərdə döyüş tapşırığının yerinə yetirilməsinə və qarşıya qoyulan tələblərə yüksək səviyyədə nail olmağa imkan verir. Bu silahlar və döyüş sursatları, artilleriya minaları və optik cihazlar xarici ölkələrin istehsal məhsulları ilə rəqabət aparmaq imkanlarına malikdir".
Millət vəkili qeyd etdi ki, 2020-ci ildə əldə edilmiş Zəfərin qazanılmasında və Azərbaycanın öz ərazi bütövlüyünü tam təmin etməsində də Ordumuzun əsas hərbi arsenalında yer tutan yerli istehsal təyinatlı hərbi məhsulların böyük rolu oldu. Azərbaycan hazırda bu sahəyə xüsusi diqqət yetirir və dövlətin sərmayələrinin həcmi davamlı şəkildə yüksəlir: "2024-cü ilin dövlət büdcəsində hərbi-müdafiə xərclərinin həcmi əhəmiyyətli dərəcədə artırılıb ki, həmin xərclərin tərkibində hərbi təyinatlı yerli istehsalın artırılmasında da böyük dərəcədə önəm veriləcəkdir. Yeni başladığımız ildə büdcə vəsaitləri ilə yanaşı, müxtəlif özəl sənaye bölmələrinin də hərbi məhsullar istehsalı sektoruna sərmayə qoyacağı nəzərdə tutulur. Ümumilikdə, 2024-cü ildə həm dövlət, həm özəl sektor tərəfindən hərbi təyinatlı məhsulların istehsalına ən azı bir milyard manat sərmayə qoyulacaq".
A.Hüseynovun sözlərinə görə, Azərbaycanın müdafiə sənayesi sektorunun yüksək inkişafı və ölkəmizə məxsus hərbi təyinatlı məhsulların istehsalının çeşidinin artması xarici dövlətlərin bu sahəyə olan marağının daha da yüksəlməsinə səbəb olmaqdadır. Özünün modern hərbi məhsullar istehsalı ilə diqqəti cəlb edən Azərbaycanın bu sahədə xarici tərəfdaşları ilə əlaqələri də dərinləşməkdədir. Dünyada keçirilən "İDEF", "SOFEX" və digər beynəlxalq müdafiə məhsulları sərgisində iştirak edən Azərbaycanın istehsal etdiyi məhsullar böyük marağa səbəb olur və bu sahəyə sifarişlər hər il artır: "Bununla da, Azərbaycan həm özünü zəruri hərbi vasitələrlə təmin edəcək, həm də dünya miqyasında hərbi təyinatlı məhsulların ixracatçısına çevriləcək".
Günel CƏLİLOVA
