ABŞ-ın dövlət katibi Entoni Blinken Azərbaycana qarşı qərəzli münasibətindən bir addım da olsun geri çəkilmək istəmir. Ermənisevərlik onun gözlərini o qədər tutub ki, əsassız olaraq Azərbaycanı "dini etiqad azadlığı ilə bağlı xüsusi müşahidə altında olan ölkələr siyahısı"na salıb.
Erməni mediası da "fəxrlə" yazır ki, "Azərbaycan ABŞ Dövlət Departamentinin dini etiqad azadlığı ilə bağlı xüsusi müşahidə altında olan ölkələr siyahısındadır".
ABŞ-ın dövlət katibi Entoni Blinkenin yaydığı bəyanatda qeyd edilir ki, konqres 1998-ci ildə Dini Etiqad Azadlığı Aktını qəbul etdikdən sonra din və ya inanc azadlığının təşviqi ABŞ xarici siyasətinin əsas məqsədi olub. "Mən Əlcəzairi, Azərbaycanı, Mərkəzi Afrika Respublikasını, Komor adalarını və Vyetnamı dini etiqad azadlığının və ya dözümsüzlüyün ciddi şəkildə pozulmasına görə xüsusi müşahidə altında olan ölkələr siyahısına daxil etmişəm.
Hökumətlər dini azlıqların üzvlərinə və onların ibadət yerlərinə hücumlar, icma zorakılığı və dinc ifadələrə görə uzunmüddətli həbslər, transmilli repressiyalar və dini icmalara qarşı zorakılıq çağırışları kimi sui-istifadələrə son qoymalıdırlar"-deyə ABŞ-ın dövlət katibi üzdəniraq bəyanatında bildirib.
Blinkenin bir sıra ölkələrlə yanaşı Azərbaycanı da dini etiqad azadlığı ilə bağlı "izləmə siyahısı"na daxil edildiyi barədə açıqlaması ölkəmizdəki dini icmalar tərəfindən narazılıqla qarşılanıb.
Robert Mobili: "Amerikada qalxan bu mövzunun arxasında orda olan erməni diasporası durur"
Alban-Udi dini icmasının sədri Robert Mobili "Bakı-Xəbər"ə bildirdi ki, illərdir ABŞ-dakı bəzi ermənipərəst qüvvələr Azərbaycana qarşı bu cür uydurma iddialar irəli sürürlər, əsassız olaraq ölkəmiz bu cür siyahılara salınır. "Azərbaycan tolerant ölkədir. Ölkəmizdə olan multikulturalizm mühiti dünya ölkələri üçün nümunədir. Azərbaycanda olan bu mühit əsrlərdir formalaşıb. Digər dini etiqad nümayəndələri mehriban formada yaşayır. Tolerantlıq məhz budur. Azərbaycan adı hər zaman bizi birləşdirən dəyərdir. Dünya ölkələri də görürlər ki, Azərbaycanda nə dini, nə milli ayrıseçkilik yoxdur. Bizdə xristian abidələri olsun, digərləri olsun, fərqi yoxdur, hamısı qorunur, bərpa olunur".
Ölkə rəhbərliyinin bu məsələyə xüsusi diqqət yetirdiyini qeyd edən R.Mobili bildirdi ki, Azərbaycanda bütün dini icmaların nümayəndələri, təmsilçiləri heç bir maneə ilə üzləşmir. "Bu, Cənab Prezident İlham Əliyevin sayəsində mümkün olub…Bilirsiz ki, bir neçə ay əvvəl nümayəndə heyətilə ABŞ Dövlət Departamentidə olduq.
Azərbaycana qarşı əvvəllər də belə əsassız ittihamlar irəli sürülüb. Biz həmişə fikrimizi demişik, o siyahlılarda yer alan ittihamların əsassız olduğunu dəfələrlə bildirmişik. Yəni bu məsələni qaldırmışdıq. Mən orda çıxış edərkən onları ölkəmizə dəvət etdim. Onlar ölkəmizdə də olub, həqiqəti öz gözləriilə görüblər. Bu məsələnin yenidən belə qabardılması Ermənistanın müharibədə uduzmasından sonra daha çox aktuallaşıb. Ermənilər istəyirlər ki, azad edilmiş torpaqlarımızda xristianlığa aid mədəni irsin sahibi kimi olsunlar. Bu yolla da gələcək nəsillərimiz üçün problem yaratmaq istəyirlər. Onların əsas məqsədi gələcəkdə revanşizm məsələsində qabartsınlar ki, azad edilən torpaqlarımızda xristianlığa və alban mədəni irsinə aid olan kilsələr, məbədlər bizimdir. Amerikada qalxan bu mövzunun arxasında orda olan erməni diasporası durur. Ermənilərin Azərbaycanla sülh müqaviləsi bağlamamışdan qabaq əsas məqsədi xristian abidələrini özününküləşdirməsidir", - deyə icma sədri vurğulayıb.
R.Mobili qeyd edib ki, hətta İkinci Qarabağ müharibəsinin ilk günlərində Arayik Arutyunyan bu müharibəyə dini don geyindirmək istəyirdi. Lakin bu baş tutmadı. "Ermənilər tərəfindən işğal edilmiş ərazilərimizin də azad olunmasında Cənab Prezident İlham Əliyevin yaratdığı bu mühitin əvəzssiz rolu oldu. Həm torpaqlarımızı azad elədik, həm də mədəni-dini irsimizin sahibi olduq.
Ermənipərəst ölkələrin marağı var ki sülh müqaviləsini bağlamaq onlardan asılı olsun. Bu gün Qafqaz Albaniyasının varisi Azərbaycandır. Alban dini icmasının varisləri isə udilərdir", - deyə o qeyd edib.
Ramiz İsayev: "Azərbaycanın da dini etiqad azadlığı ilə bağlı "izləmə siyahısı"na daxil edilməsi çox gülünc və əsassızdır"
Gürcü Yəhudilərinin Bakı dini icmasının sədri Ramiz İsayev də hesab edir ki, Blinkenin açıqlaması başdan-başa qərəzdən ibarətdir. R.İsayev "Bakı-Xəbər"ə açıqlamasında bildirdi ki, bu, başdan-başa uydurmadır. "Azərbaycanda yaşayan yəhudilərin həyat tərzi ilə maraqlansalar bunun büsbütün uydurma olduğunu görə bilərlər. Dünyada həm Avropa dövlətləri, həm də Birləşmiş Ştatların indiki hakimiyyəti tərəfindən bəzi ölkələrə qarşı ikili standartlar mövcuddur. İkili standatlar tətbiq olunan ölkələr arasında təkcə Azərbaycan deyil, bu İsrailə də tətbiq edilir. Azərbaycanla bərabər İsrail dövləti də tarix boyu ikili standartlara məruz qalıb. Bu qərəzlidir və erməni lobbisinin əməlləridir. İnanmıram ki, bu məsələ ABŞ və Azərbaycan münasibətlərinə hansısa bir təsir göstərər. Keçmişdə də belə məsələlər olub. Dövlət Demortamentinin bəzi hesabatlarında insan haqları məsələlər yer alıb. Xüsən də dini etiqad azadlığı ilə bağlı hesabatlar bizə gülünc gəlir, çünki orada yer alanlar tamamilə absurddur. Mən şəxsən bu məsələni Vaşinqtonda da qaldırmışam. Bu cür hesaabtları hazırlayan insanlarla da söhbətlər etmişəm, çox görüşlər keçirmişik. Bu sahədə bizim səfirliyimiz tərəfindən də, Azərbaycan yəhudi icması tərəfindən də işlər gedir, mütamadi olaraq bəyanatlar verilir. Biz ABŞ-dakı yəhudi icmaları, lobbisi ilə də daim təmasdayıq. Lazım olan təqdirdə onların köməyindən də istifadə edirik. Azərbaycanda yəhidlər min illər boyu yaşayıb, hazırda dünyanın bütün ölkələrindən fərqli olaraq Azərbaycanda antisemitizm heç zaman olmayıb və yoxdur. Azərbaycana qarşı belə bir hesabatın hazırlanması, Azərbaycanın da dini etiqad azadlığı ilə bağlı "izləmə siyahısı"na daxil edilməsi çox gülünc və əsassızdır"-deyə qeyd edən R.İsayev əlavə etdi ki, Azərbaycanda heç bir xalqın və dinin nümayəndəsinə qarşı ayrı-seçkilik edilmir. "Bunu bilmək üçün təkcə Azərbaycandakı yəhudi icmalarının rəhbərlərilə deyil, sadə bir yəhidi, yaxud başqa bir millətin nümayəndəsi ilə ABŞ səfirliyinin bir nümayəndəsi danışsa görər ki, iddialar nə qədər absurddur. Biz bilirik məqsəd nədir, bunu niyə edirlər. Tarix hər şeyi öz yerinə qoyar"-deyə R.İsayev vurğuladı.
İradə SARIYEVA
