Elşən Manafov: "Kilsə revanşist siyasətin, bir qayda olaraq, ideoloji ruporu rolunda çıxış edib"
Məlum olduğu kimi, Milad bayramı ərəfəsində bütün ermənilərin katolikosu II Qaregin Azərbaycana qarşı kin püsgürüb. Müraciətində II Qaregin erməniləri əmin edib ki, çətinliklərin öhdəsindən gəlmək üçün qüvvələri birləşdirmək lazımdır:
"Gəlin dövlətimizi gücləndirmək üçün qeyrətli olaq və Azərbaycanın ekspansionist ambisiyalarını, "təcavüzlərini" bütün gücümüzlə dayandırmaq üçün birləşək. Aramızda süni yaradılmış maneələri aradan qaldıraq, bir-birimizə məhəbbətlə yaşayaq ki, Vətənimiz, milli qürurumuz cənnət nemətləri ilə işıqlansın".
Katolikos müraciətində Qarabağ separatçıları ilə bağlı bir sıra təxribatçı fikirlər səsləndirib: "Artsax" başına gələn fəlakətlər günlərində tək qaldı. "Artsax" xalqı təqiblərə məruz qaldı və evlərini itirdi. "Artsax" bizim üçün heç vaxt keçmişdə qalmayacaq. Biz "Artsax" xalqının hüquqlarını qorumaq üçün hər cür səy göstərərək onu qəlbimizdə və ruhumuzda əziz tutmağa davam edəcəyik".
O əmin edib ki, "Artsax" xalqı öz çətinliklərində tək deyil - onları Ermənistan sakinləri və diaspor dəstəkləyir, onlara dəstək və kömək etməkdə davam edəcəklər.
Görünən odur ki, II Qaregin yenə də revanşist bəyanatından əl çəkmədi. O, Milad təbrikində də "Arsax" və "Arsaxı" geri qaytarmaq iddiasını səsləndirdi. Din xadiminin belə sarsaq və revanşist çağrışları nəyə xidmət edir?
"Ermənistanın işğal və terror siyasətinin həyata keçirilməsində erməni kilsəsinin tarix boyu özunəməxsus rolu olub"
Sözügedən məsələ ilə bağlı fikirlərini "Bakı-Xəbər"lə bölüşən politoloq Elşən Manafov bununla bağlı bir sıra məqamlara toxundu: "Ermənistanın işğal və terror siyasətinin həyata keçirilməsində erməni kilsəsinin tarix boyu özunəməxsus rolu olub. Kilsə revanşist siyasətin bir qayda olaraq ideoloji ruporu rolunda çıxış edib. Onun erməni diasporası üzərinə güclü təsir imkanlarının olduğu da nəzərə alinanda kilsə, indiki halda ermənilər üçün həm də təşkilatlandırıcı rolunda çıxış edir. Qarabağda məğlub edilən separatçı rejimin liderləri Ermənistanda məskunlaşdıqdan sonra Azərbaycana qarşı mübarizəni davam etdirmək üçün burada Qarabağın mühacir hökumətini təşkil etməyə çalışırlar. Rəsmi İrəvan isə, Azərbaycanla sülh danışıqları dönəmində bunun Azərbaycan tərəfinin haqlı narazılığına səbəb ola biləcəyindən ehtiyat edərək, "Artsax" ideyasının saxlanılmasını Ermənistanın təhlükəsizliyinə səbəb olacaq amil kimi dəyərləndirir. Yəqin buna görədir ki, Paşinyanın xüsusi tapşırıqlar üzrə nümayəndəsi Edmon Marukyan separatçılara qarşı çıxıb. Marukyan bəyan edib ki, separatçı rejimin institutlarının saxlanılması Ermənistan üçün ciddi təhlukədir. Lakin erməni kilsəsi belə düşünmür. Kilsə cəmiyyəti revanşist əhval-ruhiyyəyə sürükləyən açıqlamalarla çıxış edir. Qondarma "artsax" ideyasını gündəmdə saxlayaraq, həm Qərb, həm də bölgədəki yeni geosiyasi reallıqlarla barışa bilməyən dairələrin dəyirmanına su tokməklə məşğuldur. Bu minvalla, eyni zamanda separatçı qüvvələrin işinə yaramaq istəyir".
Vidadi ORDAHALI
