İsrail Hizbullahla toqquşmaların davam etdiyi Livan sərhədində müharibə ehtimalına qarşı ordunu tam hazır vəziyyətə gətirib. "Times of Israel" qəzetinin məlumatına görə, Livan sərhədinə səfər edən İsrail Baş Qərargah rəisi Halevi yüksək rütbəli hərbçilərlə bölgədəki vəziyyəti dəyərləndirib. Baş Qərargah rəisi deyib ki, Livan sərhədində müharibə ehtimalına qarşı ordunun hazırlığı yüksək səviyyəyə çatdırılıb.
İsrail qüvvələrinin hər sahədə döyüşə hazır olduğunu bildirən Halevi, yalnız on minlərlə dinc sakinin öldürüldüyü Qəzzada Həmasla mübarizəyə fokuslandıqlarını iddia edib.
Halevi müharibəyə səbəb olan çətin şərtlərə baxmayaraq, bunun, əslində ölkənin şimal və cənubunda vəziyyəti əhəmiyyətli dərəcədə dəyişdirəcək bir fürsət olduğunu deyib. İsrailin adi "müdafiə" təcrübələrində dəyişiklik edəcəyini bildirən Halevi yaxın vaxtlarda sərhədə daha çox qüvvə yerləşdirəcəklərini bildirib.
Qeyd edək ki, oktyabrın 8-dən İsrail ordusu ilə Hizbullah arasındakı sərhəddə vaxtaşırı toqquşmalar yaşanır. Bu toqquşmalarda 28 livanlı mülki vətəndaş və 129 Hizbullah üzvü, İsrail qüvvələrinin açıqlamasına görə isə 5 mülki israilli və 9 İsrail əsgəri həlak olub.
Yanvarın 2-də isə Təl-Əviv administrasiyasına bağlı qüvvələr Beyrutda "Hizbullahın qalası" kimi tanınan Dahiye bölgəsindəki Həmas ofisini hava hücumu ilə hədəfə alıb və HƏMAS-ın Siyasi Büro rəhbərinin müavini Salih əl-Arurini öldürüb.
İsrail müharibənin ilk günündən 7 oktyabr hücumunu planlaşdıran Həmas və ya Kassam Briqadalarının liderlərini axtarır. Üç ay keçməsinə baxmayaraq, İsrailin axtardığı Yəhya Sinvar, Məhəmməd Deyf və digərlərindən hələ də əsər-əlamət yoxdur.
Hizbullah və İsrail ordusu 3 aydır Livan sərhədində döyüşür. Münaqişə zonası zaman-zaman sərhəd xəttini keçsə də, indiyədək müəyyən bir çərçivədə davam edib. Lakin İsrail ordusunun hədəfini dəyişərək illərdir Beyrutda yaşayan Salih Arurini vurması tərəflər arasında kiçik qarşıdurmaların irimiqyaslı müharibəyə çevrilə biləcəyinə dair narahatlıqlara səbəb olub.
İndi İsrailin HƏMAS-ın siyasi liderlərindən olan Salih Arurini Beyrutda öldürməsindən sonra Livanın bir nömrəli hərbi gücü olan Hizbullahın atacağı addımlar ətrafında müzakirələr başlayıb. Hizbullah lideri Həsən Nəsrullah hücumun cəzasız qalmayacağını bildirib və qisas alacaqlarına işarə edib.
Bu arada, Hizbullaha yaxınlığı ilə tanınan "El Meyadin" televiziyası İsraillə mümkün müharibə ilə bağlı ssenari paylaşıb. Televiziyanın məlumatına görə, İsrail təhlükəsizlik və hərbi mənbələri Hizbullahla mümkün müharibədə hər gün minlərlə raketin atılacağını bilirlər. İsrailin təxminlərinə görə, Hizbullah müharibənin ilk günlərində 6 min raket atacaq, daha sonra bu rəqəm gündə 1500-2 minə düşəcək. "El Meyadin"in iddiasına görə, İsrail ssenarisində gündəlik 1500 nəfərin öləcəyi və Dəmir Qübbə hava müdafiə sistemi tərəfindən bəzi raketlərin qarşısı alınsa belə, bu itkilərin yaşanacağı qeyd edilir.
"El Meyadin" vurğulayır ki, israillilərin ssenarisi Hizbullah lideri Həsən Nəsrullahın "qaydasız müharibə" bəyanatı ilə üst-üstə düşür.
O da qeyd edilir ki, İsrail ordusu Arurinin öldürülməsindən sonra şimal sərhədində hazır vəziyyətə gətirilib. Aralıq dənizi sahilində yerləşən Hayfa şəhərinin bələdiyyəsinin sığınacaqları açmağa qərar verdiyi barədə də məlumatlar yayılıb.
Onu da vurğulayaq ki, Livanın ən böyük hərbi gücü olan Hizbullah 18 il əvvəlki müharibədən sonra sürətlə silahlanıb. Son illərdə ilk dəfə tank və zirehli texnikasını təqdim edən Hizbullahın arsenalındakı raketlər də diqqət çəkir. İsrail ordusunun 2022-ci ildə dərc etdiyi hesabata görə, Hizbullahın 100 mindən çox raketi var. Bu rəqəm təşkilatın 2006-cı ildəki raketlərinin sayından 6 dəfə çoxdur.
Hizbullahın raketlərinin əksəriyyəti 20 kiloqramlıq partlayıcı başlığa malik 40 kilometr mənzilli rus "Katyuşa"sıdır, ancaq arsenallarında başqa raketlər də var. İsraillilərə görə, Hizbullahın əlində olan İran istehsallı 300 kilometrə qədər mənzilli Fetih-110 ballistik raketi 500 kiloqramlıq döyüş başlığı daşıya bilir və İsrailin paytaxtı Təl-Əvivi vura bilər. Hizbullahın əldə etdiyi İran istehsalı "Zilzal-1" və "Zilzal-2" raketlərinin uçuş məsafəsi isə 210 kilometrə qədərdir. Zilzal raketlərinin partlayıcı gücü 600 kiloqramdır. Təşkilatın raket arsenalında Rusiya istehsalı olan Raid-2 və Raid-3, İran istehsalı Fecr-3 və Fecr-5 də var. İsrailin təxminlərinə görə, Hizbullahın əlində C-802 və Yaxont gəmi əleyhinə raketləri də var.
Hizbullahın gizli hərbi qüvvələrinin həm kəşfiyyat, həm də kamikadze pilotsuz uçan aparatlarına sahib olduğu da məlumdur. 2022-ci ildə İsrailin Aralıq dənizindəki qaz yataqları üzərində uçan Hizbullah pilotsuz təyyarələri böyük səs gətirmişdi.
Tahir TAĞIYEV
