İran lideri Ayətullah Əli Xamenei Kirman şəhərində baş verən partlayışlardan sonra ordu rəhbərliyinə ABŞ-la birbaşa münaqişədən çəkinmək əmri verib. Bu barədə "The New York Times" məlumatlı mənbələrə istinadən məlumat yayıb.
Mənbənin sözlərinə görə, Xamenei hərbi komandirləri "strateji səbir" göstərməyə və nəyin bahasına olursa-olsun İranı ABŞ-la birbaşa hərbi qarşıdurmaya cəlb etməkdən çəkinməyə çağırıb.
O, hərbçilərə cavab tədbirlərini İsrailə qarşı gizli əməliyyatlar və ya "proxy" qrupların ABŞ-ın Suriya və İraqdakı bazalarına hücumları ilə məhdudlaşdırmağı əmr edib.
Xamenei bu yaxınlarda Suriyada bir iranlı komandirin, Beyrutda isə HƏMAS rəsmisinin öldürülməsini və Kirmandakı terror aktlarını "Qəzzadakı müharibə ilə bağlı beynəlxalq qəzəbdən diqqəti yayındırmaq məqsədi daşıyan koordinasiyalı İsrail kampaniyası" kimi qiymətləndirir.
"The New York Times"a danışan bəzi amerikalı rəsmilər daha geniş bir müharibənin başlayacağını təxmin etmək üçün hələ tez olduğunu bildirməklə yanaşı, ehtimalın yüksək olduğunu da qeyd ediblər. NATO-nun keçmiş komandanı, təqaüdçü admiral Ceyms Stavridis Yaxın Şərqdə regional müharibə ehtimalının 15 faizdən 30 faizə yüksəldiyini deyib.
Qeyd edək ki, bir neçə gün əvvəl Həmasın siyasi qanadının ən yüksək səviyyəli simalarından olan Salih Aruri İsrail tərəfindən Beyrutda öldürülüb. Dünən İranda Qasım Süleymaninin məzarı yaxınlığında anma mərasimində iki partlayış olub və çox sayda insan ölüb. İranın dini lideri Xamenei hücumu "ölkə düşmənləri" ilə əlaqələndirib, lakin ölkənin adını açıqlamayıb.
ABŞ Dövlət Departamentinin sözçüsü Metyu Miller İranda 103 nəfərin öldüyü bombalı hücumlarda iştirak etmədiklərini bildirib. Sözçü Miller hücumlarla İsrail arasında bağlantı da görmədiklərini deyib. Gündəlik mətbuat konfransında mövzu ilə bağlı sualları cavablandıran Miller bildirib ki, ABŞ heç bir şəkildə bu işə qarışmayıb, iddialar gülüncdür: İsrailin bu partlayışlarla qarışdığına inanmaq üçün də heç bir əsasımız yoxdur".
Tahir TAĞIYEV
