Ukrayna Rusiya ilə müharibənin 674-cü günündə ağır bombardmanlarla üzləşib. Ukrayna Baş Qərargah rəisi Valeriy Zalujnı Rusiyanın gecə saatlarından bəri 158 raket və pilotsuz uçuş aparatı (PUA) ilə Ukraynanı hədəf aldığını açıqlayıb. Zalujnı bildirib ki, hücum edən İran istehsalı olan 27 "Şahed-136/131" kamikadze PUA və 87 qanadlı raket vurulub.
Ukrayna prezidenti Vladimir Zelenski sosial media hesabındakı paylaşımında Rusiyanın Kiyev, Lvov, Odessa, Dnepr, Xarkov və Zaporojyeni vurduğunu, hədəflər arasında doğum evləri, təhsil müəssisələri, ticarət mərkəzləri, çoxmərtəbəli binalar, fərdi yaşayış evlərinin də olduğunu bildirib.
Zelenski Rusiyanın hücum zamanı arsenalındakı demək olar, bütün silahlardan istifadə etdiyini deyib: "O cümlədən nüvə qabiliyyətinə malik hipersəs Kindzall raketləri, S-300, qanadlı raketlər, strateji bombardmançı təyyarələr tərəfindən buraxılan X-101/X-505 raketləri və pilotsuz uçuş aparatlarından istifadə edir".
Ukrayna Hərbi Hava Qüvvələri də bəyan edib ki, əvvəllər heç vaxt bu qədər güclü hücumla qarşılaşmayıblar. Hərbi Hava Qüvvələrinin komandanı Mikola Oleşçuk hücumun Rusiyanın 2022-ci ilin fevralından bəri ən böyük hava bombardmanı olduğunu deyib.
Son hava zərbələri Putinin Krımın Feodosiya limanında Rusiya hərbi gəmisinin məhv edilməsinə cavab verilməsi əmrindən bir neçə gün sonraya təsadüf edir.
Qeyd edək ki, Rusiyanın Krımda "Novoçerkassk" desant gəmisi Ukrayna tərəfindən qanadlı raketlərlə vurulub. Rusiyanın Krım valisi Sergey Aksyonov hücum nəticəsində 1 nəfərin öldüyünü, 2 nəfərin yaralandığını açıqlayıb. Rusiya Müdafiə Nazirliyi gəminin zədələndiyini, İngiltərə Müdafiə Nazirliyi isə Rusiya Hərbi Dəniz Qüvvələrinə məxsus desant gəmisinin "tamamilə məhv edildiyini" açıqlayıb. İngiltərə hətta Rusiya donanmasının daha 3 desant gəmisinin üzə bilməyəcək qədər zədələndiyini, iki gəminin isə yüngül zədələndiyini iddia edib.
"İndependent" qəzeti hadisədən sonra Rusiya prezidenti Putinin Krıma qisas dəstələri göndərdiyini və hücum əmri verdiyini yazıb. Qəzet iddia edir ki, Krım hava hücumundan müdafiə qüvvələri də cəzalandırılacaq. Zabit heyətinin işdən çıxarılaraq cəbhəyə göndəriləcəyi də gözlənilir. Xəbərdə bölgədə çoxlu reydlərin keçirildiyi, evlərdə axtarış aparıldığı, mobil telefonların belə yoxlanıldığı iddia edilir.
Kanadada yerləşən "BNN Bloomberg" isə prezident Putinin Ukraynanın Krıma artan hücumları səbəbindən mühüm dəniz bazasını itirmək risqi ilə üzləşdiyini iddia edib. Analitiklər vurğulayıblar ki, Krım artıq Rusiya hərbi gəmiləri üçün təhlükəsiz yer deyil.
Ukrayna Silahlı Qüvvələrinin məlumatlarına görə, Rusiya 2022-ci ilin fevralından bəri bir sualtı qayıq da daxil olmaqla ən azı 20 gəmisini itirib.
TAHİR
