Emin Həsənli: "Onların siyasətdən danışmağa, fikir deməyə haqları yoxdur"
Cəmiyyətimizdə qisas olduqca geniş istifadə olunur. Mən uzun müddətdir ki, şahmat oynayıram və bilirsinizmi ki, dünya səviyyəsində nə qədər matç-revanşlar olub? Məgər o insanlar ağıllı deyildilər, heç nə başa düşmürdülər?
Bunu Ermənistanın keçmiş prezidenti Serj Sarkisyan Qarabağ məsələsinin qisas yolu ilə həllinə dair açıqlamasında deyib:
"Əvvəlcə "qisas" dedikdə nəyi nəzərdə tutduğumuzu başa düşməliyik. "İntiqam" deyəndə yeni uğur qeydə almağı, yeni uğura imza atmağı başa düşürəm. Qisasda pis heç nə başa düşmürəm. Yəni baş verənlər azərbaycanlıların qisası idi, hə? Əgər belədirsə, onlara icazə var, bizə yox?"
Ekspertlər bildirir ki, Ermənistanın 2020-ci ildən başlayaraq aldığı və alacağı silahlara və hərbi texnikaya sərf edəcəyi ümumi vəsaitin 2 milyard dolları keçəcəyi gözlənilir.
Belə qənaətə gəlmək olarmı ki, Ermənistan qisasdan əl çəkməyib?
Hərbi-siyasi şərhçi Emin Həsənli "Bakı-Xəbər"ə açıqlamasında bildirdi ki, haqlı olaraq Azərbaycan cəmiyyəti Ermənistana inanmır: "Erməniləri Cənubi Qafqaza köçürdəndən bəri qan-qada, beynəlxalq hüququn ən ağır cinayətləri, işğal, terror, soyqırım, etnik təmizlənmə və s. kimi bütün ağır cinayətləri törədiblər. Nə Çar Rusiyası, nə bolşevik Rusiyası dövründən Köçəryan, Sarkisyan, heç biri üzərlərinə götürdükləri öhdəlikləri yerinə yetirməyib. Müxtəlif vasitəçilər olub. MDB dövlət başçılarının vasitəçilərini, SSRİ rəhbərliyinin müəyyən vasitəçilərini göstərə bilərik. Azərbaycan cəmiyyəti inanmamaqda haqlıdır. Son iki ildə də silahlanma, iki milyard dövlətlər üçün az görünə bilər. Amma Ermənistan üçün çox böyük məbləğdir. Ölkənin iqtisadiyyatı bu qədər əsgərini itirib, hələ də Rusiyadan aldığı kreditin pulunu ödəməyib. Belə vəziyyətdə yenidən Fransadan, Hindistandan hücum silahları almaq vəziyyəti daha da ağırlaşdırır. Sülh alınsa belə, yenə inam olmayacaq. Azərbaycan dövləti heç olmasa sülh müqaviləsində onların öhdəliklər götürməsini istəyir. Ermənistan adlı dövlət olmayıb. Azərbaycanlılar soyqırıma məruz qalıb, mülkləri dağıdılıb. Ermənistanın müstəqil yaşaması mümkün deyil. Azərbaycanın tərkibində yaşasa daha yaxşı olar. Əgər belə olmasa, onlar gəldikləri yerə qayıtmalıdırlar. Sarkisyana gəldikdə isə, bu məxluq Xocalıda, Meşəlidə soyqırım törədən ən qatı cinayətkarlardan biridir. Sarkisyan, Köçəryan gec - tez Azərbaycan məhkəməsi qarşısında cavab verəcək. Azərbaycan öz ərazi bütövlüyü uğrunda mübarizə aparıb və aparacaq. Azərbaycan erməniləri çox rahat şəkildə yola salıb. Azərbaycanlıların isə dədə - baba yurdlarına necə köçürülmələri, hansı soyqırımlara məruz qalmasının bütün sübutları var. Bunu təşkil edənlərdən biri də Sarkisyandır. Sarkisyan qisasdan, intiqamdan danışdığı üçün utanmalıdır. O etiraf etməlidir ki, Qarabağdan gedən ermənilərin də səbəbkarı odur. Birinci növbədə Azərbaycana, ikinci növbədə Ermənistana qarşı cinayətlər törədib. Ona görə də, belə adamların yeri ömürlük həbsxanadır. Ümumiyyətlə, onlara ölüm cəzası düşür. Onların siyasətdən danışmağa, fikir deməyə haqları yoxdur".
Məhəmmədəli QƏRİBLİ
