Bədrəddin Quliyev: "Vasitəçilərin 30 illik fəaliyyətini gördük"
Azərbaycan xarici işlər naziri Ceyhun Bayramov ilin yekunlarına dair mətbuat konfransında deyib ki, Ermənistanla Azərbaycan arasında sülh gündəliyi ikitərəfli məsələdir.
Nazir qeyd edib ki, Azərbaycanla Rusiya arasında iki ölkə münasibətlərini tənzimləyən çoxsaylı sənədlər var. O bildirib ki, bu sənədlər müxtəlif illərdə imzalanıb: "O sənədlərə əsasən Rusiya Azərbaycanın ərazi bütövlüyünü qeyd-şərtsiz dəstəkləyir. Rusiya Prezidenti Vladimir Putin də Qarabağın Azərbaycan ərazisi olduğunu deyib. Rusiya hər zaman bu mövqeyini təsdiq edib".
Nazirin sözlərinə görə, 44 günlük Vətən müharibəsindən sonra imzalanan üçtərəfli bəyanatda Moskvanın mühüm rolu olub: "Rusiya həmin sənədin tərəfidir. Ermənistanla Azərbaycan arasında sülh gündəliyi isə ikitərəfli məsələdir. Üçüncü tərəflər əgər neytraldırsa, obyektivdirsə, biz bunu dəstəkləyirik".
Göründüyü kimi, Ceyhun Bayramov deyir ki, sülh sazişi 3-cü tərəfin iştirakı olmadan kitərəfli imzalanmalıdır. Ermənistan buna razıdırmı və bunun tərəflər üçün nə kimi üstünlükləri ola bilər?
Müstəqil siyasətçi Bədrəddin Quliyev "Bakı-Xəbər"ə açıqlamasında bildirdi ki,
Ermənistanla Azərbaycan arasında sülh müqaviləsinin bağlanmasını səmimi olaraq heç bir dünya gücü istəmir: "Onlar hesab edir ki, münaqişənin həlli regiona olan təsir imkanlarını azaldacaq. Bizim ikitərəfli münasibətlərimizdən sonra 10 noyabr sənədi də öz əhəmiyyətini itirmiş olacaq. Zəngəzur dəhlizinə nəzarət də Rusiyanın əlindən çıxacaq. Rusiya da bunu istəmir. Sülhün əldə olunmasını ən çox ermənilər istəməlidir. Çünki bununla onlar tam blokadadan çıxmış olurlar. Münasibətlərin vasitəçilər olmadan qurulmasının prosesə yalnız faydası dəyə bilər. Hərbi əsirlərin dəyişməsində əldə olunan uğurlu nəticənin şahidi olduq. Bu proses vasitəçilər olmadan həyata keçdi. Tələblər bundan ibarətdir ki, bir-birinin ərazisində separatizmin dəstəklənməsinə son qoyulacaq. Bu da gələcəkdə Qarabağla bağlı separatçı meyllərin tam ortadan çıxması ilə nəticələnəcək. Rusiya Ermənistanı sıxmaq istəyir. Biz bunu son bəyanatlardan da görürük. Proses iki tərəfin arasında aparılsa, bizə olan basqılar azalmış olacaq. Fakt onu göstərir ki, Mehridən yol açılmasa da biz alternativ variant tapmışıq. Sülh müqaviləsi bağlanandan sonra ölkələrin rifahı daha da yüksələcək. Vasitəçilərin 30 illik fəaliyyətini gördük. Sonda özümüz silah gücü ilə problemi həll etdik. Bütün bunlar onu deməyə əsas verir ki, Ermənistan tərəfi artıq ölkəsinin və bütövlükdə regionun gələcəyinin sülh prosesindən keçdiyini anlayır. Azərbaycan da uzun illərdir qarşı tərəfə məhz bunu aşılamağa çalışıb, onun səsləndirdiyi bəyanatlar da məhz buna yönəlib. "Regionun problemlərini ölkələrin özləri həll etməlidir, kənar dövlətlər yox" prinsipinin ən düzgün yol olduğu artıq hər kəs tərəfindən başa düşülür".
Məhəmmədəli QƏRİBLİ
