Məcid Cavadi Araz: "Bunu Güney Azərbaycan ictimaiyyəti Güney Azərbaycana qarşı bir sayğısızlıq, hörmətsizlik kimi dəyərləndirir"
"Ermənistanın Təbrizdə baş konsulluğu açılacaq". "Tasnim News" xəbər verir ki, bunu İrəvanda səfərdə olarkən İranın xarici işlər naziri Hüseyn Əmir Abdullahiyan erməni həmkarı Ararat Mirzoyanla birgə mətbuat konfransında deyib.
Abdullahiyan "İranın Ermənistanın ərazi bütövlüyünü dəstəklədiyini vurğulayıram. İranın Ermənistanla hər zaman tarixi əlaqələri olub və biz bu münasibətləri daha möhkəm saxlayacağıq. Bu gün biz Tehranın Ermənistanın Təbrizdə Baş Konsulluğunun açılması ilə bağlı razılığını bildirdik və Təbrizdə erməni həmkarım Ararat Mirzoyanın iştirakı ilə konsulluğun açılışının şahidi olacağıq" - deyə bildirib.
Konsulluq açmağa başqa şəhər tapmırlar ki, gedib Təbrizdə, Azərbaycan şəhərində açırlar?
Erməni konsulluğunu niyə Təbrizdə açmaq istəyirlər ki? Ermənilərin yaşamadığı şəhərdə Ermənistan konssulluğunu açmaqda məqsədləri nədir? İran yenə nə oyun oynayır?
"Onlar Güney Azərbaycandan, eləcə də İranın bütün türk kökənli vətəndaşlarından layiq olduqları cavabı alacaqlar"
Azərbaycan Milli Dirəniş Təşkilatının sözçüsü Məcid Cavadi Araz "Bakı-Xəbər"ə şərhində "İranın xarici işlər naziri Abdullahiyan Ermənistana səfərində bildirib ki, İranın Qafanda açdığı konsulluğun qarşılığında bu yaxınlarda Təbrizdə Ermənistanın konsulluğu açılacaq. Təkidlə vurğulayıb ki, İran Ermənistanın ərazi bütövlüyünü tam müdafiə edir, onun arxasındadır. Beləliklə də, bununla bir daha İranda hakim olan fars molla rejiminin Ermənistanla strateji müttəfiqliyin vurğulamış olur. Bu da onu göstərir ki, İran Azərbaycana son zamanlarda bəzi görüntü xarakterli yumşaq mesajlar versə də, aradakı soyuq münasibətləri bir az yumşaltmağa çalışsa da, fars rejimi Güney Qafqazda Ermənistanı özünə strateji müttəfiq görür. Bu mənada, Ermənistanı dəstəkləməyə və gücləndirməyə çalışır. Bu, özəlliklə Ermənistan ictimaiyyətinə İranın açıq mesajıdır, onlara güvən vermək istəyir"-deyə bildirdi.
M.C.Arazın vurğuladığına görə, molla rejimi erməniləri əmin etmək istəyir ki, İranla Azərbaycan arasında görüntüdə bir yumşalma olsa da, gərginlik azalsa da, bölgədə İranın əsas müttəfiqi Ermənistandır. "Molla rejimi Azərbaycan-Türkiyə birliyinə qarşı Ermənistanı hər zaman ayaqda və güclü tutmağa çalşır. Bildiyimiz kimi, son zamanlar da Fransanın və Hindistanın Ermənistana verdiyi silahın böyük qismi İran üzərindən daşınır. İran özü də Ermənistana silah yardımları edir və hər cür iqtisadi köməklik də göstərir ki, Ermənistanı Azərbaycan qarşısında güclü saxlasın. Düşünürəm ki, bu elə İranın Azərbaycana qarşı olan ikiüzlü siyasətinin açıq göstəricisidir. Bu, eyni zamanda, Güney Azərbaycana bir mesajdır. Bildiyiniz kimi, Güney Azərbaycanda milli hərəkat, milli mücadilə güclü bir şəkildə davam edir. Özəlliklə yurd içindəki fəallarımızın son zamanlardakı müqavimətləri və dirənişləri İranın basqılarına qarşı Güney Azərbaycanda bir mücadilə ruhunun yüksəlməsinə səbəb olub. Güney Azərbaycan milli hərəkatı tam gücü ilə öz mücadiləsini davam etdirir. Düşünürəm, bu, Güney Azərbaycan ictimaiyyətinə verilən bir mesajdır ki, biz sizə qarşı Ermənistanı Təbrizə gətiririk və burada konsulluq açırıq. Təbii ki, Güney Azərbaycan ictimaiyyəti də, siyasi qüvvələri də, xalqı da Təbrizdə Ermənistan konsulluğunun açılması ilə ilə razı deyil. Bunu Güney Azərbaycan ictimaiyyəti Güney Azərbaycana qarşı bir sayğısızlıq, hörmətsizlik kimi dəyərləndirir. Ola bilsin, molla rejimi bununla bizim xalqa qarşı hörmətsizlik, təhdid, hədə xarakterli davranış sərgiləmək istəyir. Amma düşünürəm ki, onlar Güney Azərbaycandan, eləcə də İranın bütün türk kökənli vətəndaşlarından layiq olduqları cavabı alacaqlar"-deyə M.C.Araz vurğuladı.
O qeyd etdi ki, Təbrizdə Ermənistan konsulluğunun açılması bizə qarşı həqarətdir və molla rejiminin başbilənləri bunu məqsədli şəkildə edir. Amma müsahibimiz hesab edir ki, Güney azərbaycanlılar və digər türk xalqları buna görə molla rejiminə qarşı gərəkli addımları atacaqlar.
İradə SARIYEVA
