Elşən Mustafayev: "Paşinyan Rusiyanın uduzacağı və Qərbin birləşərək Rusiyanı diz çökdürəcəyi təbliğatına inanıb"
Gözləntilərin əksinə olaraq, Paşinyan Sankt-Peterburqda keçirilən tədbirə qatıldı. Belə hesab edirlər ki, bu addımı ilə Nikol Paşinyan manevr etmək qərarına gəlib. Çünki Ermənistan baş nazirinin aylardır Vladimir Putinin iştirakı ilə keçirilən və Rusiyanın mühüm, hətta aparıcı rol oynadığı beynəlxalq tədbirləri boykot edirdi.
Çox güman ki, bununla Paşinyan ABŞ və Qərbə təzyiq etmək istəyib. Bəzi analitiklər hesab edir ki, Paşinyan Qərb və ABŞ-ın ona hərbi baxımdan zəmanət verməsini istəyir. Amma onlar tələsmirlər. Gözləyirlər ki, İrəvan Rusiyadan tam uzaqlaşsın, Türkiyə və Azərbaycanla baş-başa qalsın. Elə buna görə də, Paşinyan hər an Putinin yanına qaça biləcəyi ilə bağlı mesajlar verir.
Beynəlxalq məsələlər üzrə ekspert Elşən Mustafayev "Bakı-Xəbər"ə açıqlamasında bildirdi ki, Rusiya ilə qarşıdurma fonunda Putinlə görüşdən qaçan Paşinyanın uzun müddət sonra Avrasiya İqtisadi İttifaqı və MDB-nin iclasında iştirak etmək üçün Sankt-Peterburqa getməsinin müxtəlif səbəbləri var: "KTMT-dən imtina edən İrəvanın Qərbin timsalında hərbi alternativ imkanları olsa da, iqtisadi alternativi yoxdur. Bu baxımdan, Ermənistanın Aİİ bazarına ehtiyacı var və siyasi-hərbi müstəvidə nə qədər Moskvanın nəzarətindən uzaqlaşmaq istəsə də, Azərbaycanla kommunikasiyanın açılması ilə nəticələnə biləcək sülh sazişi imzalanmadığı müddətdə Rusiya bazarından asılılığı davam edəcək.
Paşinyanın bu səfərdə siyasi hədəflərindən biri də Azərbaycana və Rusiyaya təzyiq edə bilməyən Qərbə mesaj verməkdir.
Bunun fonunda Ermənistanın KTMT-dən uzaqlaşmaq xəttinin davam edəcəyi gözləniləndir.
Paşinyan administrasiyası dilemma qarşısında qalıb. Paşinyanı iqtidara gətirən qüvvələr onun qarşısında öhdəliklər qoyub və həmin tapşırıqları yerinə yetirməlidir. Digər tərəfdən isə, analitik hesab edir ki, regionda sərt siyasi reallıqlar var. Bu reallıqlar ondan ibarətdir ki, Ermənistana ciddi təsir imkanı olan Rusiya mövcuddur. Rusiya Ermənistana hərbi güc tətbiq etmək potensialına malikdir. Eyni zamanda iqtisadi təzyiq rıçaqları var. Bütün bu amilləri Paşinyan hakimiyyəti nəzərə almaq məcburiyyətindədir. Ermənistanın yenidən Rusiyaya real yaxınlaşacağını mümkün sayılmır. Hətta Rusiyanın da belə bir məsələyə inanacağını güman etmək olmaz".
Ekspertin sözlərinə görə, Qərb Nikol Paşinyanın ümidlərini boşa çıxardı: "Paşinyan Qərbin güclü olduğuna əmin oldu və aldandı. Hesab edirdi ki, Qərb Azərbaycanı Ermənistan üçün əlverişli şərtlərlə sülh müqaviləsi imzalamağa məcbur edə bilər. Bunu görmədiyi üçün Rusiyaya doğru reveransla onlara mesaj verir. Qərb onu sırf diplomatik yolla dəstəklədi, lakin işlənmiş planın həyata keçirilməsinə gəldikdə isə məlum oldu ki, Qərbin təsirinin çox ciddi məhdudiyyətləri və sərhədləri var.
Paşinyan Rusiyanın uduzacağı və Qərbin birləşərək Rusiyanı diz çökdürəcəyi təbliğatına inanıb. Amma yanıldığını görüb".
Məhəmmədəli QƏRİBLİ
