Ramil Məmmədli: "Situasiya Rusiyanın ziyanına dəyişən kimi, daha sərt qərarların şahidi ola bilərik"
Fransanın Cənubi Qafqaza can atması region dövlətlərini narahat edir. Bu narahatlıq Sankt-Peterburqda Avropa İqtisadi İttifaqının iclasında da səslənib. Bunu Belarus prezidenti Alesandr Lukaşenko jurnalistlərlə söhbətində deyib.
A.Lukaşenko qeyd edib ki, Fransanın Cənubi Qafqazla bağlı cəhdləri alınmır: "Fransa nəsə etməyə çalışır, amma alınmır. Fransada nələrin baş verdiyinə fikir verin, onlar öz evlərinin içindəki problemi həll edə bilmədən Qafqaza girməyə çalışırlar. Bunlar hamısı ermənilərin gözü qarşısında baş verir və onlar da bunu aydın seyr edirlər. İctimaiyyət qarşısında baş verənlərlə reklam arasında böyük fərq var. Əsas proseslər hələ qarşıdadır".
"Çox güman, bunları önləməkdən ötrü Lukaşenko belə mesajlar verir"
Məsələ ilə bağlı "Bakı-Xəbər"ə açıqlama verən hərbi ekspert Ramil Məmmədlinin fikrincə, bununla Lukaşenko bir sıra məsələlərə eyham vurur: "Bu mesajlar təkcə Fransaya yox, həm də Ermənistanın indiki hakimiyyətinə yönəlib. Çünki Cənubi Qafqazda Fransaya meydan verən ölkə məhz Ermənistandır. Məsələ ondadır ki, Fransa bir neçə müddətdir bu yöndə səylərini artırıb. Bu da birbaşa olaraq Aİİ-nin və KTMT-nin maraqlarına qarşı yönəlib. Daha dəqiq desək, Fransanın strateji məqsədi Rusiyanı Ermənistandan sıxışdırıb atmaqdır. Bunu Lukaşenko da, Putin də yaxşı bilir. Heç kəsə sirr deyil ki, Avropa İttifaqı Müşahidə Missiysının Ermənistana yerləşdirilməsi, mərhələli şəkildə onların sayının artırılması bütün bu planların tərkib hissəsidir. Düzdür, hələlik bu, istənilən nəticəni verməyib. Ancaq bu o demək deyil ki, Fransanın bəlli planları arxa plana keçib. Əlbəttə ki, belə deyil. Paris Avropa İttifaqı vasitəsilə bunu həyata keçirməyə çalışır. Fransa Ermənistana silah satmaqla perspektivdə Rusiyanın silah arsenalını bu ölkədə sıxışdırmağı hədəfləyib. Hər şey birdən-birə olmur. Bu gedişlə kim zəmanət verir ki, bir neçə ildən sonra Ermənistan Rusiya silahlarından tam imtina etməyəcək? Nə olsun ki, Ermənistanla Rusiya arasında bir sıra müqavilələr var. Ermənistan kimi ölkə üçün bunların elə bir əhəmiyyəti yoxdur. Situasiya Rusiyanın ziyanına dəyişən kimi, daha sərt qərarların şahidi ola bilərik. Çox güman, bunları önləməkdən ötrü Lukaşenko belə mesajlar verir. Paşinyana demək istəyir ki, odla oynama".
Vidadi ORDAHALLI
