Sədrəddin Soltan: "Səfirliyin açılması üçün ilk növbədə İran tərəfi rəsmi Bakının irəli sürdüyü şərtlərə əməl etməlidir"
"Ən qısa zamanda Azərbaycanın Tehrandakı səfirliyinin fəaliyyətinin bərpasına şahid olacağıq". "Mehr" agentliyi xəbər verir ki, bunu İranın Xarici İşlər Nazirliyinin (XİN) sözçüsü Naser Kənani dekabrın 25-də keçirdiyi brifinqdə bildirib.
Azərbaycanın Tehrandakı səfirliyinə terror hücumu edən şəxsin məhkəməsinin nəticəsi barəsində danışan Kənani iki ölkə arasındakı müəyyən problemlərlə bağlı danışıqlar prosesini müsbət qiymətləndirib. Onun sözlərinə görə, Azərbaycan səfirliyinin fəaliyyətinin bərpası üçün tərəflər "Yol xəritəsi" müəyyən edib.
Tehran terroru araşdırdı ki, səfirliyimizin tezliklə açılacağına eyhamlar edir?
"İran XİN-in sözçüsü Naser Kənaninin açıqlaması sadəcə olaraq ictimai fikri yanıltmaq məqsədi daşıyır"
Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan "Bakı-Xəbər"ə şərhində "Son zamanlar Azərbaycanın baş prokuroru Kamran Əliyevilə İranın baş prokuroru Mohammad Kazem Movahedi-Azad arasında Tehrandakı səfirliyimizə terror hücumu etmiş şəxs barəsində aparılmış danışıqlar belə təəssürat yaradır ki, iki ölkə arasında münasibətlərdə normallaşma baş verir, yaxud Azərbaycan İranın etdiyi pislikləri unudub və incikliklər aradan qalxıb. Amma əslində Azərbaycan tərəfi İrana, İran hakimiyyətinə qarşı irəli sürdüyü təkliflərdən geri çəkilməyib, təkliflərin hər biri qüvvədədir. İran hakimiyyəti isə indiyə qədər Azərbaycanın təkliflərinə, şərtlərinə əməl etməyib. O ki qaldı Azərbaycanın Tehrandakı səfirliyinin artıq fəaliyyətə başlaması məsələsinə, bu istiqamətdə hələ ki, rəsmi Bakının açıqlaması yoxdur. Çünki səfirliyin açılması üçün ilk növbədə İran tərəfi rəsmi Bakının irəli sürdüyü şərtlərə əməl etməlidir. Bu istiqamətdə isə hələ elə bir ciddi addım atılmır. Sadəcə olaraq, élan olunan səfirliyə terror hücumu etmiş şəxsə qarşı Tehran prokurorluğunun ömürlük həbs istəməsidir. Bu baxımdan, əgər şərtlər daxilində səfirliyin açılması nəzərdə tutulmursa bu o deməkdir ki, şərtlərə əməl edilməyib. O ki qaldı danışqılara, danışıqlar əsasən Araz çayı üzərində körpü ilə bağlı idi, iqtisadi məsələləri əhatə edirdi, bir də baş prokurorluqlar arasında gedən danışıqlardır. Azərbaycan və İran arasında siyasi və sair istiqamətdə danışıqlar yaxın günlərdə olmayıb. İran XİN-in sözçüsü Naser Kənaninin açıqlaması sadəcə olaraq ictimai fikri yanıltmaq məqsədi daşıyır. Bu çıxış, bu fikir, bu açıqlama Azərbaycan cəmiyyəti, Azərbaycan mediası üçün etibarlı mənbə sayıla bilməz. Çünki İran hakimiyyətinin rəsmiləri, informasiya vasitələri, ayrı-ayrı siyasi xadimləri Azərbaycanla bağlı çox sayda saxta, yalan məlumatlar yayırlar"-deyə bildirdi.
S.Soltanın sözlərinə görə, digər tərəfdən də, İranda Azərbaycana, Azərbaycan dövlətçiliyinə qarşı Tehran hakimiyyətinin sponsorluq, havadarlıq etdiyi qruplar fəaliyyət göstərir. O vurğuladı ki, indiyə qədər o qrupların Azərbaycana ekstradisiya edilməsi istiqamətində də addımlar atılmır. "Başqa bir məsələ Azərbaycan vətəndaşının İran ərazisində hələ də saxlanılmasıdır. Bu da Azərbaycan-İran münasibətlərinə xələl gətirən məsələlərdən biridir. İran tərəfi ölkəni ziyarət etmiş şəxsləri saxta iddialarla həbs edir. Bu o deməkdir ki, İran Azərbaycan vətəndaşları üçün etibarsız ölkədir. Azərbaycan səfirliyinə hücum etmiş terrorçu ilə bağlı məhkəmə başa çatmayıb. Bu məhkəmə prosesi ilə bağlı Azərbaycan tərəfi təklif irəli sürmüşdü ki, həmin istintaqda bizim müstəntiqlər də iştirak etsin. Çünki hadisə Azərbaycan səfirliyində, yəni Azərbaycan ərazisində baş verib. Bu istintaqın Azərbaycanda aparılması da mümkün idi. Lakin İran hakimiyyəti bu qaydaları da pozaraq həmin hadisəni məişət zəminində baş verən olay kimi qələmə verdi. Bugünə qədər də o məsələ öz həllini tapmayıb. Azərbaycanın Tehrandakı səfirliyinin tezliklə açılacağı məsələsinə gəldikdə isə, bu açılama bizim üçün əsas vermir, o, İran cəmiyyəti üçün əsaslı ola bilər, İran cəmiyyəti onu məqbul saya bilər. Çünki o daha çox İran cəmiyyəti üçün açıqlamadır. Tehrandakı səfirliyin açılması üçün Azərbaycan Xarici İşlər Nazirliyinin bizim cəmiyyəti məlumatlandırması lazımdır. Ona görə ki, Azərbaycan cəmiyyəti üçün əsas və daha düzgün açıqlama Azərbaycan XİN-in açıqlamasıdır. Bu açıqlama yoxdur. Belə bir açıqlama olmadığından səfirliyin nə zaman açılacağı, bununla bağlı hansı danışıqların getdiyi, hansı "yol xəritəsi"nin hazırlandığı barədə danışmaq, yaxud İran tərəfin verdiyi açıqlamaya inanmaq məncə məntiqli deyil" –deyə S.Soltan qeyd etdi.
İradə SARIYEVA
