"Serbiyada zorakılıqla hakimiyyət dəyişikliyi olmayacaq, Belqradda müxalifətin etirazları heç bir nəticə verməyəcək". Bunu ölkə prezidenti Aleksandr Vuçiç bildirib.
Qeyd edək ki, Serbiyada etirazlar birləşmiş serb müxalifətinin nümayəndələrinin Belqrad parlamentinə dekabrın 17-də keçirilmiş seçkilərin nəticələrini tanımamasından sonra başlayıb. Belqradın mərkəzində Respublika Seçki Komissiyasının binası yaxınlığında silsilə mitinqlərə başlayan "Serbiya zorakılığa qarşı" müxalifət blokunun tərəfdarları şəhər administrasiyasının binasına basqın ediblər. Etirazçıların şəhər administrasiyasının binasına daxil olmaq cəhdinə cavab olaraq Belqrad polisi gözyaşardıcı qazdan istifadə edib. Qeyd edək ki, seçkilərdə hansısa ciddi qanun pozuntusu qeydə alınmayıb. Amma uduzan müxalifət nəticələrlə razılaşmaq istəmir. Vuçiç bu fonda bildirib: "Xalq sizi istəmir, amma siz qərara gəldiniz ki, özünüzü çox sevirsiniz və seçicilərin iradəsini dəyişmək istəyirsiniz. Bunu hansısa zorakı vasitələrlə deyilsə, necə həyata keçirməyi planlaşdırdınız?". Onun sözlərinə görə, müxalifət nə etməyə çalışsa da, ölkədə "qüdrətli hakimiyyət dəyişikliyi-filan olmayacaq", çünki Serbiyada hakimiyyət seçkilər yolu ilə dəyişir, bu, demokratik ölkədir. Proseslərin təhlili göstərir ki, Serbiyadakı iğtişaşlar Qərbin indiyədək bir çox ölkələrdə sınaqdan çıxardığı "rəngli inqilab" ssenarisindən başqa bir şey deyil. Qərbin bunu istəməsinin səbəbi isə indiki Serbiya hakimiyyətinin Rusiyaya qarşı siyasət sərgiləməməsidir. Vuçiç özü də bu məqama toxunub: "Bir çoxları Belqradın anti-Rusiya sanksiyalarına qoşulmasında israr edərək Serbiyaya öz iradələrini yeritməyə çalışır, lakin Serbiya müstəqil dövlətdir və müstəqil siyasət yürütməyə davam edəcək... Onlar Serbiyanı zəif görmək istəyirlər ki, əvvəllər olduğu kimi iplə idarə olunacaq oyuncaq kimi idarə etsinlər - hökuməti və nazirləri seçə bilsinlər, hansı siyasətin həyata keçiriləcəyinə qərar versinlər, faksla və ya telefonla əmrlər versinlər ki, Rusiyaya qarşı sanksiyalar tətbiq edin. Amma biz öz siyasətimizi aparmaq istəyirik". Əslində, "rəngli inqilab" ssenarisi bir müddət əvvəl hazırlanıb. Aleksandr Vuçiç xalqa müraciəti zamanı bu fonda qeyd edir: "Serbiya xüsusi xidmət orqanları iğtişaşların hazırlanması barədə əvvəlcədən məlumat alıblar. Sizə demək istəyirəm ki, Serbiya vətəndaşları, səhnələr dramatik olsa da, narahat olmayın. Heç bir inqilab baş vermir". Onun sözlərinə görə, xarici kəşfiyyat xidmətləri iğtişaşların hazırlanması və Belqrad şəhər administrasiyasının binasının müxalifət tərəfdarları tərəfindən ələ keçirilməsi planları barədə Serbiya təhlükəsizlik qüvvələrini əvvəlcədən məlumatlandırıb: "Biz bir neçə gündür ki, xarici faktorla, baş verənlərlə bağlı xəbərdarlıq edirik. Çoxları özlərini sadəlövh kimi göstərdilər və baş verənləri eşitmək və ya görmək istəmədilər. Tam olaraq nə hazırlandığını bildiklərini və vaxtında cavab verən və hücum edənlərin nə planlaşdırdıqlarını dəqiq bilən kəşfiyyat xidmətlərimizə məlumat verən xarici xidmətlərə təşəkkür edirik".
Serbiyanın baş naziri Ana Brnabiç də olduqca maraqlı açıqlamalar verib: "Moskva Belqradı mümkün iğtişaşlar barədə xəbərdar etmişdi. Bu barədə xəbərdarlıq edən xidmətlərdən məlumatımız var idi. Əvvəla, Rusiya təhlükəsizlik xidməti bizə belə məlumat verdi, amma bizi dezinformasiya yaymaqda ittiham etdilər və bildirdilər ki, bu cəfəngiyatdır. Serbiya prezidenti Aleksandr Vuçiçin dediyi kimi, bəziləri bunu ciddi qəbul edib kömək etmək istədilər, lakin çoxları bilib və kömək etmək istəmədi". Rusiya Xarici İşlər Nazirliyinin rəsmi nümayəndəsi Mariya Zaxarova da bildirir ki, Serbiyanın paytaxtı Belqradda baş verən iğtişaşların arxasında kollektiv Qərb dayanır: "Kollektiv Qərbin "Maydan çevrilişləri" üsullarından istifadə edərək bu ölkədəki vəziyyəti sarsıtmaq cəhdləri göz önündədir". Zaxarovanın sözlərinə görə, bu vəziyyətə yeganə mümkün cavab Konstitusiyaya ciddi riayət etmək, milli maraqlara səs verən Serbiya xalqının seçiminə hörmət etməkdir. Amma Qərb bunu etmir.
Rusiya faktoru ilə yanaşı, Serbiyada Kosovo amili də var. Belə ki, Qərb həmçinin Serbiyanı Kosovonun müstəqilliyini tanımağa məcbur etmək istəyir. Xatırladaq ki, daha əvvəl Fransa, Almaniya liderləri açıq şəkildə rəsmi Belqradı Kosovonu tanımağa çağırıb. Amma rədd cavabı alıb. Bu fonda da hadisələrin inkişafı və inqilab ssenarisi diqqəti Qərbə yönəldir, çünki bunun Ukraynadakı "Maydan" hadisələrinə bənzərliyi çoxdur. Serbiyada olanları ABŞ USAID vasitəsilə bir çox ölkələrdə həyata keçirməyə çalışıb. Dağıtmaq, yandırmaq, küçələrdə qanunsuz aksiya keçirmək təcrübəsi artıq hər kəsə tanışdır. Ədalətsiz davranışla ədaləti bərpa etmək kimi bir olay hələ heç bir ölkədə baş verməyib. Etiraz sosial sifarişli olmalıdır. Amma Qərb bunu nəzərə almaq istəmir. Azərbaycan da bunu görüb. Xatırladaq ki, ölkəmizi elə Qərbdə ərazilərinin işğalı ilə barışmağa məcbur etmək istəyiblər. Hətta Azərbaycanda da "rəngli inqilab" ssenarsinə cəhd olub. Amma xalq buna imkan verməyib. USAİD, NED, həmçinin Fridrix Nauman, Marşall fondları, İREX və digər bu kimi qurumlar ölkəmizdə siyasi hakimiyyətə qarşı təzyiq vasitəsi kimi istifadə məqsədilə öz şəbəkələrini formalaşdırmağa çalışıblar. Amma nəticə onlar üçün acınacaqlı olub.
Tahir TAĞIYEV
