Əli Mustafa: "Simonyanın dedikləri daha çox piardır, cəmiyyətə, dünyaya verilən mesajdır"
"Demarkasiya və delimitasiya prosesi uzun çəkə bilər. Ermənistan Azərbaycanla sülh müqaviləsini iki dövlət arasında sərhədin delimitasiyasından əvvəl də imzalaya bilər. Mən istisna etmirəm ki, belə bir variant Ermənistan üçün məqbul ola bilər".
Bunu jurnalistlərlə söhbətində Ermənistan parlamentinin sədri Alen Simonyan Azərbaycan Prezidentinin köməkçisi Hikmət Hacıyevin demarkasiya məsələsinin sülh müqaviləsi ilə bağlı müzakirələrdən ayrılması barədə bəyanatını şərh edərkən bildirib.
Simonyan qeyd edib ki, Azərbaycanla sərhədlərin müəyyənləşdirilməsi sülh müqaviləsi imzalandıqdan sonra da həyata keçirilə bilər: "Düşünürəm ki, biz bu cür yanaşmaya baxa bilərik, çünki bu, vaxt baxımından hətta uzun illər çəkə bilər. Həqiqətən, sülhsevər ölkə belə şeylərdə heç bir maneə görə bilməz. Bəzi məsələləri həll etdikdən, sülh müqaviləsini imzaladıqdan, cəmiyyətləri sülh və əminamanlıq mühitinə hazırladıqdan sonra belə bir şey ola bilər".
Belə məlum olur ki, Ermənisdan delimitasiya və demarkasiyadan əvvəl sülh sazişinin imzalanmasında maraqlıdır. Bu nə dərəcədə realdır?
"Problem ondadır ki, Ermənistanın səmimiliyinə inanmaq olmaz"
Sözügedən məsələyə aydınlıq gətirən Demokratik Dəyişim Partiyası Təşkilat Komitəsinin sədri Əli Mustafa buna birmənalı prizmadan yanaşmadı: "Ermənistan tərəfi, təbii ki, maraqlı tərəf kimi görünmək istəyir. Bu minvalla özlərini dünyaya sülhsevət tərəf kimi təqdim etməyə çalışırlar. Aydın məsələdir ki, Paşinyan komandasının, o cümlədən parlament sədri Alen Simonyanın bizə münasibəti bəllidir. Ancaq indi Simonyan da anlayır ki, artıq beynəlxalq trend fərqlidir. Dünya Cənubi Qafqazda sülhün bərqərar olmasını istəyir. O üzdən, hesab edirəm ki, Simonyanın dedikləri daha çox piardır, cəmiyyətə, dünyaya verilən mesajdır. Bundan əvvəl Paşinyan hakimiyyətinin yanaşması belə idi ki, sərhədlərin delimitasiyası sülh sazişi ilə eyni vaxtda olsun. Sonra anlamağa başladılar ki, bu, praktiki baxımdan mümkünsüzdür. Çünki delimitasiya prosesi sadə məsələ deyil və vaxt çox aparır. Odur ki, delimitasiyanın sülh sazişindən ayrılması şərtdir. Ermənistan həqiqətən də məsələyə ciddi yanaşırsa, o zaman bu iki məsələnin sinxronlaşdırılması doğru deyil. Lazım gələrsə, sülh sazişini ümumi çərçivə sazişi ilə əvəz etmək olar. Sonradan isə sərhədlərin müəyyənləşməsi, digər məsələlərin həlli və s. çərçivə sazişi əsasında bir növ hər biri öz yerini tuta bilər. Ancaq problem ondadır ki, Ermənistanın səmimiliyinə inanmaq olmaz. Ona görə ki, Ermənistan son vaxtlar Hindistandan silah idxalını artırıb. Faktiki olaraq, Ermənistan uzaq mənzilli raketlər tədarük edir. Bütün bunlar onu göstərir ki, erməni tərəfi səmimi deyil. Sadəcə olaraq oynayırlar. Ona görə də erməni rəsmilərinin dediklərinə ehtiyatla yanaşmaq lazımdır. Yəni biz bunların mahiyyətlərinə bələd olduğumuz üçün ehtiyatı əldən buraxmamalıyıq. Bəzən mənə elə gəlir ki, ermənilərin sülh ritorikası baş qatmaq üçündür. Lakin məsələyə texniki nöqteyi-nəzərdən yanaşanda, bəli, sülh sazişini delimitasiyadan ayırmaq lazımdır".
Vidadi ORDAHALLI
