Azərbaycan kəşfiyyatı Fransa xüsusi xidmətlərinin "burnunu əzdi"...
Elşad Həsənov: "Ermənilərin Qarabağdakı separatizminə rəhbərlik edən şəxslərin saxlanılaraq DTX-da istintaqının aparılması peşəkarlığın daha bir əyani sübutudur"
Azərbaycan kəşfiyyatı Fransa kəşfiyyatını məğlub edib. Xüsusi xidmət orqanlarının Fransanın casus şəbəkəsini ifşa etməsindən sonra bütün Avropa "mat" vəziyyətinə düşüb.
Və məsələ heç də Fransa kəşfiyyatnın uğursuzluğu yox, Azərbaycan xüsusi xidmət orqanlarının peşəkarlığından ibarətdir. Mediada yayılan məlumatda qeyd olunur: Ukrayna, Moldova, Gürcüstan, Azərbaycan, Şərqi Avropa, Yaxın Şərq və Mərkəzi Asiyanın bir sıra ölkələrində müxtəlif əməliyyatlara cəlb edilmiş Fransa xüsusi xidmət orqanlarının geniş agentura şəbəkəsi Azərbaycanda ifşa olunub. Bu, Azərvaycan xüsusi xidmət orqanlarının peşəkarlığının yüksəkliyindən xəbər verirmi?
Təhlükəsizlik orqanlarının veteranı, polkovnik Elşad Həsənov "Bakı-Xəbər"ə açıqlamasında bildirdi ki, artıq mətbuatda bu mövzuda yazılar gedir: "Bu yazılardan sonra Makron Fransanın xarici kəşfiyyat idarəsinin rəisini işdən çıxardı. Artıq sübut olunmuş məsələdir. Hələlik DTX bu barədə heç bir rəsmi məlumat yaymayıb. Fransanın agenturasını ifşa etmək böyük nailiyyətdir. Bu, Azərbaycan xüsusi xidmət orqanlarının yüksək peşəkarlığından xəbər verir. Hər bir ölkədəki səfirliklərdə diplomatik pərdə altında xüsusi xidmət orqanlarının kəşfiyyatçıları və əks-kəşfiyyatçıları olur. Bu, artıq bütün dünyada belədir. Onlar öz ölkələrinin xeyrinə əldə etdikləri kəşfiyyat məlumatlarını mərkəzə ötürürlər. Əks-kəşfiyyatçılar isə səfirliyin əməkdaşları arasında başqa ölkələrə işləmək istəyənləri və ya işləyənləri müəyyən edir. Fransa hər zaman Azərbaycana qarşı qərəzli mövqe ortaya qoyur. 44 günlük müharibədən sonra isə Azərbaycana qarşı səlib yürüşünə başlayıblar. Onların postsovet ölkələrində apardıqları kəşfiyyat fəaliyyətinin məhz Azərbaycanda ifşa edilməsinin də obyektiv səbəbləri var. Azərbaycan Fransanın müstəmləkəçilik fəaliyyətinə qarşı açıq mübarizə aparır. Afrika ölkələri bu istiqamətdə bizimlə yaxından əməkdaşlıq edirlər. Son illər bu sahəyə peşəkar olan Əli Nağıyevin rəhbərlik etməsi təhlükəsizlik qurumlarının fəaliyyətini daha da gücləndirib. DTX-nın əməkdaşlarından 6 nəfəri Milli Qəhrəman adına layiq görülüb. Onlar çox ciddi əməliyyatları həyata keçiriblər. Bizim DTX ən müasir avadanlıqlarla təmin olunub. Əməkdaşlar isə vətənə və xalqa ləyaqətlə xidmət etmək ənənəsini davam etdirirlər. Prezident dəfələrıə bildirib ki, təhlükəsizlik qurumlarının əməkdaşlarına inanır. Bu, xüsusi xidmət orqanlarının fəaliyyətinə verilən ən yüksək qiymətdir. Ermənilərin Qarabağdakı separatizminə rəhbərlik edən şəxslərin saxlanılaraq DTX-da istintaqının aparılması da bu peşəkarlığın daha bir əyani sübutudur".
Beynəlxalq mütəxəssislər hesab edir ki, Azərbaycan xüsusi xidmət orqanlarının Fransa şəbəkəsini deşifrə etməsi yeni faktların da ortaya çıxması ilə nəticələnəcək və bu, Makron üçün heç də yaxşı gələcək vəd etmir.
Fransa casus şəbəkəsinin ifşası ümumilikdə bu ölkənin düşdüyü acınacaqlı vəziyyəti ön plana çıxarır. Bunun əsas səbəbi Makron Administrasiyasının yanlış siyasət yürütməsidir. Azərbaycana qarşı siyasət də bu yanlışların, düşünülməmiş addımların ən bariz nümunəsidir.
Məhəmmədəli QƏRİBLİ
