Elşən Həsənov: "Erməni mediası bu tezisi prosesdən yayınmaq üçün ortaya atır"
2023-cü ildə Azərbaycanla Ermənistan arasında sülh sazişinin imzalanması ilə bağlı gözləntilər özünü doğrultmadı. Bəs, 2024-cü ildə sülh ola bilərmi?
Mövzu ilə bağlı Ermənistanda nəşr olunan "Hraparak" nəşri maraqlı müqayisələr aparıb. Nəşr iddia edib ki, nəinki 2024, hətta 2025-ci ildə də sülh sazişinin imzalanması mümkün olmayacaq.
Nəşrin fikrincə, yaza qədər ABŞ və AB İsrail-Fələstin münaqişəsində atəşkəs əldə edilməsi, Qəzzaya sülhün gəlməsinə köklənəcək. Həmçinin Ukraynaya dəstəklə bağlı nəticə əldə etməyə çalışacaq. Bunun ardınca isə ABŞ-da seçkilərə hazırlıq başlayacaq, eyni zamanda, mayın sonunda Avropa Parlamentinə seçkilər, yeni parlamentin və AB Komissiyasının formalaşması prosesi olacaq, yalnız payızda komissiyanın yeni tərkibi və AB Şurasının yeni prezidenti aktiv fəaliyyət imkanı qazanacaq. Ona qədər isə sülh sazişi olmayacaq.
Bu, həqiqətdir, yoxsa Ermənistanda rəyi "heç 2025-də də sülh olmayacaq" tezisinə alışdırırlar?
Təhlükəsizlik məsələləri üzrə ekspert Elşən Həsənov "Bakı-Xəbər"ə açıqlamasında bildirdi ki, 2023-cü ilin sonlarına doğru Azərbaycan və Ermənistan arasında sülh anlaşmasının imzalanacağına dair ümidlər elə də yüksək deyildi: "Rəsmi İrəvanın qeyri-konstruktiv davranışları, həmçinin Qərbdəki havadarlarının bölgədə gərginliyi tətikləyə biləcək davranışları prosesin uzanmasına rəvac verən amillərdən oldu. Hazırda havadar qüvvələrin bütün səylərinə baxmayaraq, Bakı-İrəvan təmas xəttində xeyli yumşalma müşahidə olunur. 7 dekabr tarixində ortaq bəyanatın imzalanması, beynəlxalq tədbirlərdə dəstək etimad quruculuğunun ilkin praktiki təzahürüdür. Əsas problemlərin böyük qismi razılaşdırılıb. Sülh prosesinə əngəl olan məsələlərdən biri ermənilərin Xankəndiyə qayıtması, Bakının alternativ köçürmə iddiasından sonra sıradan çıxdı. Zəngəzur dəhlizi ilə bağlı da Bakı alternativ versiyanı irəli sürməklə konkret olaraq, sülh müqaviləsinin bizdən çox Ermənistana gərəkdiyini sübut etdi. İrəvan üçün çəmbər günü-gündən daralır. Anklav və kommunikasiyalarda yaxın perspektivdə əldə olunacaq razılıq sülh üçün real zəmini formalaşdırır. Ermənistanın niyyəti olsa iki həftəyə də imzalamaq olar. Əsas odur ki, proses sürətlənsin və danışıqlar getsin, sülh sazişi imzalansın.
Əgər Ermənistan sülh sazişini yerinə yetirməzsə yaxud Paşinyanı devirib bir başqası gəlib bizə diktə etməyə çalışarsa və sazişdən də imtina edərsə bu növbəti müharibəyə səbəb olacaq. Erməni mediası bu tezisi prosesdən yayınmaq üçün ortaya atır".
Məhəmmədəli QƏRİBLİ
