Əli Orucov: "Bütün bunlar həm də rəsmi İrəvana bir siqnaldır"
Məlum olduğu kimi, Çin Xalq Respublikasının Sədri Si Cinpin Azərbaycan Respublikasının Prezidenti İlham Əliyevə doğum günü münasibəti ilə təbrik məktubu ünvanlayıb.
Məktubda Çin dövlət başçısı bir sıra məqamlara toxunub: "Çin və Azərbaycan ənənəvi dost tərəfdaşlardır. Hazırda Çin-Azərbaycan münasibətləri çox yaxşı və sabit inkişaf edir, siyasi qarşılıqlı etimad daim möhkəmlənir, müxtəlif sahələrdə əməkdaşlıq müvəffəqiyyətlə irəliləyir. Sizin ikitərəfli münasibətlərin möhkəmləndirilməsi üzrə səylərinizi yüksək qiymətləndirirəm. Ötən ilin sentyabrında biz Səmərqənd şəhərində yeni dövrdə ikitərəfli münasibətlərin inkişafına dair mühüm razılaşmaların əldə olunduğu uğurlu görüş keçirdik. Mən Çin ilə Azərbaycan arasında münasibətlərin inkişafına böyük əhəmiyyət verirəm, ölkələrimizin və xalqlarımızın rifahı naminə ikitərəfli dostluq və əməkdaşlıq münasibətlərini yeni səviyyəyə yüksəltmək üçün Sizinlə birgə səylərimi davam etdirməyə hazıram. Sizə möhkəm cansağlığı və əmin-amanlıq arzulayıram".
"Ermənistan Hindistanla hərbi əlaqələri genişləndirsə də, Azərbaycanın Çin kimi böyük tərəfdaşı var"
Sözügedən məsələni "Bakı-Xəbər"ə şərh edən AMİP funksioneri Əli Orucovun fikrincə, dünyada geosiyasi mübarizənin kəskinləşdiyi bir dövrdə Çin rəhbərinin Azərbaycana xüsusi önəm verməsi mühüm əhəmiyyətə malikdir: "Görünən odur ki, Çin və Azərbaycan arasında strateji tərəfdaşlığın formalaşması uğurla gedir. Rəsmi Pekin Azərbaycanın olduqca əlverişli bir coğrafi məkanda yerləşdiyinin fərqindədir və buna xüsusi önəm verir. Heç şübhəsiz ki, əlaqələrin inkişafında iki ölkə başçılarının şəxsi dostluq münasibətlərinin də öz rolu var. Görünən odur ki, bu, münasibətlərin inkişafına müsbət təkan verir. Nəzərə almaq lazımdır ki, Azərbaycan Çinin bir kəmər bir yol layihəsinə dəstək verir. Çindən gələn yüklərin Avropaya çatdırılmasında vacib rol oynayır. Bununla bağlı nəqliyyat infrastrukturu müasirləşdirilir. Bakı Beynəlxalq Dəniz Ticarət Limanının ötürücülük qabiliyyəti15 milyon tondan, 25 milyon tona çatdırılacaq. Bu istiqamətdə ciddi iş gedir. Qarşıdakı 3 il ərzində liman ərazisindəki çeşidləmə məntəqəsində əlavə 4 dəmiryol xətti və konteyner terminalı tikiləcək ki, bu da yüklərin çeşidlənməsində operativliyin təmin edilməsinə imkan yaradacaq. Nəzərə almaq lazımdır ki, Çin super dövlətdir. Çinin dünyanın siyasi və iqtisadi mənzərəsinə təsiri artır. Çin BMT Təhlükəsizlik Şurasının 5 daimi üzvindən biridir. Çinlə əlaqələrin gücləndirilməsi Azərbaycana qarşı BMT müstəvisində bədnam qərarların önlənməsində vacib rol oynaya bilər. Bütün bunlar həm də rəsmi İrəvana bir siqnaldır. Yəni, Ermənistan Hindistanla hərbi əlaqələri genişləndirsə də, Azərbaycanın Çin kimi böyük tərəfdaşı var. Bu, eynizamanda Azərbaycanın düzgün seçim etməsinin göstəricisidir".
Vidadi ORDAHALLI
