Rauf Zeyni: "Bu cür hesabatlar heç bir məna və anlam kəsb etməməklə yanaşı, obyektivlikdən də uzaqdır"
ABŞ dünya ölkələrində insan hüquqları ilə bağlı vəziyyətə ötən əsrin 90-cı illərindəki təsirini indi əsaslı dərəcədə itirib, bu barədə dövlətlər onun hesabatlarını saymır, ələ salır, lağa qoyurlar.
Niyə və buna Amerikanın özünün hansı yanlışları əsas olub?
Milli Qeyri Hökumət Təşkilatları Forumunun prezidenti Rauf Zeyni "Bakı-Xəbər"ə açıqlamasında bildirdi ki, dünyada insan hüquqlarının ali kürsüsünə iddia edən ölkə gərək bütün dünya üzrə ilk olaraq öz ölkəsində insan hüquqlarına ciddi riayət etsin: "Əgər bu prinsip pozulursa, artıq o ölkənin, indiki şəraitdə ABŞ-ın dünya üçün necə böyük təhdid və təhlükə olduğunu görürük. Ona görə də, məsələnin mahiyyəti ondan ibarətdir ki, insan hüquqları bəyannaməsinin bir çox bəndlərini qəbul etməyən, konvensiyaya qoşulmayan ölkə iddia edir ki, insan hüquqları qaydasında olmalıdır. Hansı ölkələrdə hansı hərbi müdaxilələrin olması və digər məsələlərlə bağlı bu ölkənin strategiyası Əfqanıstandan tutmuş Vyetnama qədər olan ölkələrdə özünü göstərib. Bu baxımdan da özünü bəşəriyyətin demokratiyasının təminatçısı sayan ölkə ilə bağlı təzadlar çoxdur. Bu təzadların fonunda ABŞ, Fransa kimi ölkələr böyük iddialarına uyğun hərəkət etmirlər. Ona görə də, bu ölkələr bəşəri prinsiplərə, beynəlxalq insan hüquqlarına çağırış etməzdən əvvəl bu hüquqlara özləri əməl etməlidirlər. Əsasən də, bugünkü ictimai-beynəlxalq rəyi dəyişməyə çalışmalıdırlar. Onlar hesabatları hazırlayarkən alternativ və müxtəlif mənbələrə istinad etmir. Hakimiyyətə düşmənçilik prizmasından yanaşan, şəxsi nifrətini ictimai nifrət kimi təqdim etməyə çalışan eyni və məlum şəxslərin bitərəfli və subyektiv rəylərinə əsaslandığından, habelə siyasi tərəf tutduğundan Azərbaycan və dünya ölkələri ilə bağlı gəldikləri qənaətlərində ciddi yanlışlığa yol verirlər. Hər il də bu yanlışlığı və qərəzi təkrarlayır. Təəssüflər olsun ki, bəzi şəxslər və qüvvələr müxalifətçi libasına bürünüb özünün şəxsi haqq-hesablarını siyasiləşdirir və ya buna ictimai məzmun geyindirməkdə davam edirlər. Müxalifət dövlətə və dövlətçiliyə qarşı düşmən olmaq deyil. Bütün beynəlxalq ictimaiyyət və beynəlxalq hüquq Qarabağı Azərbaycanın ayrılmaz tərkib hissəsi kimi qəbul edir. Orda yaşamış ermənilərin də hüquq və təhlükəsizliyinə dövlət təminat verərək, reinteqrasiyaya dəvət edirdi. Bunu ermənilər qəbul etməyərək çıxıb getdilər. Azərbaycanı bununla bağlı hansısa formada günahlandırmağa cəhd etmək qəbuledilməz və absurddur. Odur ki, bu cür hesabatlar heç bir məna və anlam kəsb etməməklə yanaşı, obyektivlikdən də uzaqdır. Azərbaycan bunu onsuz da qeyri- ciddi qarşılayır. ABŞ-ın hesabatları məhz buna görə öz təsir gücünü itirib".
Məhəmmədəli QƏRİBLİ
