İbrahim Rüstəmli: "Paşinyan Putinə demək istəyir ki, sən bizi tək qoyduğun üçün mən də səni özümə müttəfiq saymıram"
Paşinyan yenə KTMT-ni sərt tənqid edib:
"Yəni mahiyyət etibarı ilə KTMT-də problem nədir? Deyirlər: gəlin müşahidəçi olaq. Biz deyirik: müşahidəçilər nə edəcəklər? Cavab yoxdur. Biz də deyirik: KTMT-nin məsuliyyət sahəsini müəyyənləşdirin, çünki Ermənistan bu təşkilatın üzvüdür. Bu məsuliyyət sahəsi pozulub. Bizim müqavilələrimizin əsası ondan ibarət idi ki, Ermənistan Respublikasının suveren ərazisi KTMT və Rusiya Federasiyası üçün qırmızı xətdir. Biz deyirik ki, qırmızı xətt pozulub, onlar da cavab verirlər - yox, deyəsən, qırmızı xətt pozulmayıb. Deyirik: çox yaxşı, burada kağız və qələm var - qırmızı xəttiniz haradadır? Deyirlər ki, biz o qırmızı xətti çəkə bilmərik. Bu o deməkdir ki, Ermənistanda qırmızı xəttiniz yoxdur. Onda niyə Ermənistana gəlirsiniz?"
Paşinyanın KTMT ilə bağlı mövqeyini necə şərh etmək olar?
Hərbi-siyasi ekspert, ehtiyatda olan polkovnik-leytenant İbrahim Rüstəmli "Bakı-Xəbər " - ə açıqlamasında bildirdi ki, ümumiyyətlə, Paşinyanın Kollektiv Təhlükəsizlik Müqaviləsi təşkilatı ilə bağlı fikirlərinin əsasında 44 günlük Vətən müharibəsi dövründə yaşananlar dayanır: "Həmin müharibə zamanı Paşinyan dəfələrlə Rusiya Federasiyasına, başda Vladimir Putin olmaqla, Federasiyanın rəsmilərinə, o cümlədən kollektiv təhlükəsizlik müqaviləsi təşkilatına müraciət etdi. Bu müraciətin də əsasında Ermənistanın mövcud vəziyyətlə bağlı Rusiyadan dəstək almaq səyi dayanırdı. Ermənistan istəyirdi ki, Rusiya 44 günlük Vətən müharibəsinə müdaxilə etsin və bu müdaxilə kardinal dəyişikliklərə səbəb olsun. Hətta xatırlayırsızsa Paşinyan bir gündə üç dəfə Putinə zəng etmişdi. Ancaq, istər Putinin, istərsə də Kollektiv Yəhlükəsizlik Müqaviləsi Təşkilatı rəhbərliyinin 44 günlük müharibəyə münasibətləri tamamilə başqa cür oldu. Bu münasibət ilk növbədə Azərbaycanın ərazi bütövlüyü ilə bağlı idi. Putin başda olmaqla, digər rəsmilər, adını çəkdiyimiz təşkilat döyüş əməliyyatlarının Azərbaycan ərazisində getdiyini xüsusilə vurğuladılar və bunun Kollektiv Təhlükəsizlik Müqaviləsi Təşkilatına heç bir dəxli olmadığını bildirdilər. Adını çəkdiyimiz təşkilat bu məsələyə qarışmaq hüququna malik deyil. Azərbaycan öz ərazi bütövlüyü çərçivəsində işğal olunmuş ərazilərini düşməndən azad edir. Hər şey, Rusiya ilə Ermənistan münasibətlərinin indiki halı 44 günlük Vətən savaşında yaşanan xəyal qırıqlığı ilə başladı. Bu gün Paşinyanın Rusiyaya, bu təşkilata münasibəti belə pis idisə, nə üçün müharibə zamanı bir gündə üç dəfə onlara zəng edirdi? Ümumiyyətlə, Paşinyan və onun komandası Corc Sorus Fondunun layihəsidir. Bu layihədə Rusiya müxalif ölkə kimi tanınır və əsas məqsəd Ermənistanın simasında Rusiyaya qarşı yeni bir alternativ, yeni bir cəbhə yaratmaq idi. Hadisələrin gedişi də göstərir ki, Qərb və Avropa ölkələri öz məqsədlərinə nail olublar. Rusiya ilə əlaqələrin tamam kəsilməsi Ermənistan üçün ciddi fəsadlara gətirib çıxaracaq. Rusiyanın hakim mövqeyi həlledici əhəmiyyət daşıyır. Ancaq Rusiya qonşu dövlət kimi Cənubi Qafqazda çox ciddi təsir imkanlarına malikdir. Bu o qədər böyük imkanlardır ki, əgər şərait yaranarsa, Ermənistan və Gürcüstana olduğu kimi, istənilən halda Azərbaycana da müdaxilə edə bilər. Rusiyanın xislətində bu var. Bu gün Paşinyanla Rusiya arasında yaranan bu gərginlik bizim üçün də çox faydalıdır. Eyni səviyyədə Rusiya ilə Ukrayna arasında gedən müharibə qədər əhəmiyyətlidir. Ermənistan Rusiyadan nə qədər aralanarsa, o qədər Azərbaycan üçün siyasi təsir imkanalarının artması deməkdir. Bir sözlə, Ermənistan Rusiya ilə təmiz qırılmaq fikrindədir. Amma Rusiya buna imkan verməyəcək. Onun bununla bağlı yeni planları peyda olacaq. Bu planlarda Ermənistanın parçalanması məsələsi aktual olacaq. Kollektiv Təhlükəsizlik Müqaviləsi Təşkilatı ilə bağlı ritorika, söz güləşdirməsinə bənzər müzakirələr Rusiya ilə bağlı ümidlərin qırılması ilə yadda qalır. Rusiyanın Qarabağ məsələsində Ermənistanı tək qoyması bu münasibətin əsas dinamikasını təşkil edir. Ona görə də, Paşinyan Putinə demək istəyir ki, sən bizi tək qoyduğun üçün mən də səni özümə müttəfiq saymıram və bu təşkilatda iştirak etmirəm".
Məhəmmədəli QƏRİBLİ
