Qərbin Ukraynanı tədricən Rusiya ilə döyüş meydanında yalnız buraxması fonunda rəsmi Kiyev daxili resurslar hesabına müqaviməti davam etdirməyi planlaşdırır. Amma bu o fonda baş verir ki, Rusiya Ukraynada hücumların miqyasını genişləndirmək üçün daha böyük ehtiyat cəmləyir.
Bu ölkənin müdafiə naziri Sergey Şoyqu qeyd edir ki, 2023-cü ilin yanvarından dekabrınadək Rusiya ordusu sıralarına 490 min müqaviləli hərbçi və könüllü qəbul edilib.
Nazir iddia edib ki, bunların arasında 4 mindən çox tələbə var və onlar könüllü olaraq təhsildən akademik məzuniyyət alıb ordu sıralarına qoşulublar. Şoyqunun sözlərinə görə, hərbi xidmət keçmək üçün hər gün 1500-dən çox vətəndaş müraciət edir. O bunu da bildirib ki, Rusiya ordusunda xarici könüllüllərin sayı bir ildə 7 dəfə artıb. Nazir deyib ki, məhz bunların sayəsində indi hər qoşun növünün öz ehtiyat alayı var. Şoyqu deyib ki, nazirlik dekabrın 1-dən prezident Vladimir Putinin ordu sıralarını 1 milyon 320 min nəfərə çatdırmaq tapşırığının yerinə yetirilməsinə başlayıb. Onun sözlərinə görə, Rusiya ona qarşı artan təhlükələrə uyğun olaraq hərbçilərinin sayını 1.5 milyon nəfərə çatdırmalıdır. Ukraynanın əks-hücumundan söz açan Şoyqu deyib ki, Ukrayna ordusu bu ilin iyunundan bəri ölü və yaralı olaraq 159 min hərbçi itirib. Nazir əlavə edib ki, tammiqyaslı müdaxilə başlanandan bəri Ukrayna silahlı qüvvələrinin ölü və yaralı daxil itkiləri 383 min nəfərə çatıb. Sergey Şoyqu Rusiya ordusunun itkilərindən danışmayıb. Bundan əvvəl isə Putin illik sual-cavab sessiyası zamanı demişdi ki, Rusiyada yeni səfərbərliyin elan edilməsinə ehtiyac yoxdur. O iddia etmişdi ki, hazırda "xüsusi hərbi əməliyyat" zonasında 617 min Rusiya hərbçisi var. Daha öncə "The New York Times" qəzeti yazırdı ki, Rusiya Ukrayna müharibəsi başlanandan bəri ölü və yaralı olaraq 315 min hərbçi itirib. Qəzetin yazdığına görə, məhz bu itkilər Moskvanı orduya məhkumları və başqa könüllüləri cəlb etməyə vadar edib. "The Kyiv Independent" nəşri də bildirib ki, Rusiya təxminən iki il öncə Ukraynanın işğalına başladığı tarixdən indiyədək bu ölkədə 350 minə yaxın əsgər itirib. Qəzet Ukrayna Silahlı Qüvvələrinin Baş Qərargahına istinadən bildirir ki, hesabat dövrü ərzində Rusiya 5739 tank, 10692 zirehli döyüş maşını, 10766 avtomobil və yanacaq çəni, 8137 artilleriya sistemi, 923 reaktiv raket sistemi, 609 hava hücumundan müdafiə sistemi, 324 təyyarə, 324 helikopter, 6278 dron, 22 gəmi və qayıq, o cümlədən bir sualtı qayıq itirib.
Bunlar fonunda ilin yekunlarına dair mətbuat konfransı keçirən Ukrayna prezidenti Volodimir Zelenski isə etiraf edib ki, Ukrayna ordusu hələlik səmaya nazərət edə bilmir, lakin bu istiqamətdə intensiv iş aparılır. Zelenski əlavə edib ki, Ukrayna ordusuna yay əks-hücumu zamanı məhz bu faktor uğur qazanmaqda mane olub. Ukrayna prezidenti iki saatdan çox davam edən mətbuat konfransında Ukrayna silahlı qüvvələri döyüşçülərinə təşəkkürünü bildirib, ukraynalıları ölkənin Avropa İttifaqı üzvlüyünə namizəd statusu alması münasibətilə təbrik edib. Zelenski deyib ki, Ukrayna Avropa partnyorları ilə "xüsusi bağlar" qura bilib: "Mən əminəm ki, biz bu müharibəyə qələbəmizlə son qoya bilərik". Ukrayna prezidenti səfərbərliyin çox "həssas mövzu" olduğunu vurğulayıb. Zelenski deyib ki, hərbi komandanlığa orduya 450-500 min nəfərin səfərbər edilməsi planının hazırlanmasını tapşırıb: "Hazırda təkcə səfərbərlik deyil, həm də iki ildir döyüşənlərin ordudan tərxis olunması haqqında düşünmək lazımdır. Volodimir Zelenski son vaxtlarda uzun xarici səfərlərdə olub. O Kabo-Verdedə, Argentinada, ABŞ və Norveçdə olarkən Ukraynaya hərbi yardımın davam etdirilməsinə nail olmağa çalışıb. Amma nəticələr Ukrayna üçün əlverişli deyil. Artıq Pentaqon bildirib ki, ABŞ Ukraynaya göndərdiyi silah və sursatın yerini doldurmaq üçün yalnız dekabrın 30-dək vəsaitə malikdir. "Bloomberg" agentliyi vurğulayır ki, bu, Pentaqonun Ukrayna silahlı qüvvələrinə yardımın dayanması üçün dəqiq tarix göstərdiyi ilk haldır. Agentlik Pentaqonun baş mühasibi Mixael MakKordun Konqresin Nümayəndələr Palatası və Senatına göndərdiyti məktubuna istinadla yazır ki, Pentaqon Ukraynaya göndərilmiş silah, sursat və texnikanın yerinin doldurulması üçün satınalmalara başlayıb. Onun sözlərinə görə, bu proses üçün lazım olan maliyyə vəsaitləri dekabrın 30-dək bitəcək: "Elə ki, əlimizdəki vəsaitlər xərcləndi, nazirlik Ukraynanın müdafiəsi ehtiyaclarını ödəmək üçün vəsaitsiz qalacaq". MakKord bildirib ki, bu məlumatların Konqresi yola gətirəcəyinə və prezident Co Baydenin Ukrayna üçün istədiyi 60 milyard dollarlıq vəsaitin təsdiqlənəcəyinə ümid edir. Ağ Ev dekabrın 18-də bildirmişdi ki, Birləşmiş Ştatların Ukraynaya bu il yardım üçün yalnız bir təsdiq olunmuş paketi var. Konqresdəki sərt xətt-hərəkət tərəfdarı respublikaçılar Ukraynaya hərbi yardımı nəzərdə tutan qanunu dəstəkləməkdən imtina edirlər. Britaniyanın xarici işlər naziri Devid Kameron bu fonda Rusiya müdaxiləsinə qarşı mübarizəni bir neçə pərdədən ibarət tamaşaya bənzədib: "Birinci pərdədə Rusiya öz məqsədlərinə heyrətamiz şəkildə çata bilmədi. İkinci pərdədə isə uktraynalılar rusiyalıları parlaq bir şəkildə geri oturtdular və əlbəttə, ən çətini üçüncü pərdə oldu". Britaniyanın keçmiş baş naziri olmuş Kameron nəhayət müqayisəsini belə bitirib: "Dördüncü pərdə hələ yazılmayıb və biz bunu düzgün bir şəkildə yazmağı bacarmalıyıq".
Tahir TAĞIYEV
