Samir Adıgözəlli: "Bu qənaətə BMT-nin iki missiyası gəlibsə və bütün bunlar hesabatlarda əks olunubsa, deməli, BMT-nin yeni mərüzəçisi ağ yalan danışır"
Bu yaxınlarda məlum olub ki, BMT-nin mədəni hüquqlar üzrə xüsusi məruzəçisi Azərbaycana sorğu mesajı göndərib və orada Dağlıq Qarabağda erməni tarixi, mədəni və dini irsinin güya dağıdılması və mənimsənilməsi, "Dağlıq Qarabağın" tarixinin qəsdən "təhrif" edilməsi ilə bağlı narahatlığını bildirib.
Qeyd olunanlarla bağlı Ermənistan Respublikasının Xarici İşlər Nazirliyi şərh verib:
"Doğru deyirsiniz, onu da əlavə edə bilərəm ki, hesabatda insanlara, abidələrə və simvollara hücumlardan, beynəlxalq humanitar hüququn pozulmasından da bəhs edilir".
Göründüyü kimi, BMT mıruzəçisinin bu yalanı və qərəzi antiterror əməliyyatlarından sonra Qarabağa gəlib-getmiş 2 missiyanın hesabatı ilə ziddiyyət təşkil edir. Bu məsələyə ekspertlərin münasibəti necədir?
İctimai Siyasi Proseslər Beynəlxalq Əlaqələr Mərkəzinin (İSBAM) rəhbəri Samir Adıgözəlli "Bakı-Xəbər"ə açıqlamasında bildirdi ki, ermənilər bu sərsəm iddianı tez-tez yayır: "Antiterror əməliyyatlarından sonra, oktyabrın əvvəllərində Qarabağa səfər edən BMT missiyası vəziyyətlə bağlı yekun bəyanat yayıb. Missiya baş çəkdiyi şəhərdə mülki ictimai infrastruktura, o cümlədən xəstəxanalara, məktəblərə və yaşayış binalarına, mədəni və dini strukturlara heç bir ziyanın qeydə alınmadığını bildirib.
Ağdamdan səfər edən missiya Xankəndi şəhərində olub, burada yerli əhali və müvafiq tərəflərlə görüş keçirilib, səhiyyə və təhsil müəssisələrinin vəziyyəti ilə yaxından tanış olunub.
Şəhərin bəzi yerlərində onlar mülki ictimai infrastrukturda, o cümlədən xəstəxanalarda, məktəb və yaşayış binalarında, mədəni və dini strukturlarda heç bir ziyan qeydə almayıblar. Missiya Azərbaycan Respublikası Hökumətinin şəhərdə səhiyyə xidmətlərinin və bəzi kommunal xidmətlərin bərpasına hazırlaşdığını qeydə alıb. Missiya şəhərdə heç bir mağazanın açıq olmadığını qeydə alıb. Şəhərdə çox az sayda yerli əhalinin qaldığı qeyd olunub. Bildirilib ki, Qarabağ bölgəsində 50-1000 arasında etnik erməni qalıb. Missiya son atəşkəsdən sonra dinc əhaliyə qarşı zorakılıq halları ilə bağlı nə sorğu edilən yerli əhalidən, nə də həmsöhbətlərdən heç bir müraciətə rast gəlməyib. Onlar daha sonra Laçın sərhəd-keçid məntəqəsində Ermənistana doğru hərəkət edən mülki avtomobillərə rast gəlinmədiyini bildiriblər.
Xankəndidə isə missiya Ermənistana gedən onlarla sərnişini daşımaq üçün gələn avtobusun şahidi olub. Qeyd edim ki, bu qənaətə BMT-nin iki missiyası gəlibsə və bütün bunlar hesabatlarda əks olunubsa, deməli, BMT-nin yeni mərüzəçisi ağ yalan danışır".
Xatırladaq ki, antiterror əməliyyatlarından sonra Qarabağda müşahidə aparan missiya sanballı tərkibdə olub. Heyətdə BMT-nin Humanitar Məsələlərin Əlaqələndirilməsi Ofisinin Koordinasiya şöbəsinin direktoru Rameş Rajasingham, eləcə də Ərzaq və Kənd Təsərrüfatı Təşkilatı, BMT-nin Qaçqınlar üzrə Agentliyi, UNICEF və Ümumdünya Səhiyyə Təşkilatının nümayəndələri, habelə BMT-nin Humanitar Məsələlərin Əlaqələndirilməsi Ofisi, BMT-nin Rezident Əlaqələndirici Ofisi və BMT Təhlükəsizlik Departamentindən texniki qrup olub.
Missiya Azərbaycan tərəfindən bərpa edilmiş ərazilərin bir hissəsi olan Ağdamdan keçərkən dağıntı və minalardan təmizləmə ehtiyaclarını, habelə hökumət tərəfindən aparılan yenidənqurma işlərini müşahidə edib. BMT-nin Azərbaycandakı nümayəndəliyi Azərbaycan Respublikası hökumətinə dəstək və digər maraqlı tərəflər və tərəfdaşlarla əməkdaşlıq çərçivəsində Qarabağdakı yerli əhalini və geri qayıtmaq istəyənləri dəstəkləməyə hazır olduğunu bəyan edib.
Məhəmmədəli QƏRİBLİ
