Dünyanın dörd bir yanına səpələnmiş azərbaycanlılarının vahid bayraq altında birləşdirilməsi, diaspor quruculuğu və lobbiçilik fəaliyyətinin formalaşdırılması tarixi bir hadisədir. Dünya azərbaycanlılarının həmrəyliyinin və diaspor quruculuğunun banisi ulu öndər Heydər Əliyevdir. Bu birmənalı olaraq belədir.
Məhz Heydər Əliyevin prezidentliyi dövründə diaspor quruculuğuna böyük əhəmiyyət verildi, diaspor təşkilatlarının formalaşmasına dəstək göstərildi, lobbiçiliyin qurulması məsələlərinə xüsusi diqqət ayrılmağa başladı.
Azərbaycan diasporunun tarixən keçdiyi yola nəzər salsaq onun ən parlaq dövrünün Heydər Əliyevlə bağlı olduğu aydın görsənər.
Prezident İlham Əliyevin Sərəncamı ilə Azərbaycanda 2023-cü ilin "Heydər Əliyev İli" elan edildi. Ötən bir ilə yaxın dövr ərzində həm ölkə içində, həm xarici ölkələrdə "Heydər Əliyev İli" çərçivəsində ulu öndərin 100 illiyi ilə bağlı müxtəlif tədbirlər, yığıncaqlar keçirildi. Təbii, ilin sonuna qədər bu tədbirlər davam etdiriləcək və "Heydər Əliyev İli" böyük uğurla, yadda qalan nəticələrlə başa çatacaq.
Diaspor hərəkatının əsasını qoyan ümummilli lider...
Biz tez-tez Azərbaycan diasporunun nümayəndələrinin müsahibələrində "Heydər Əliyev İli" ilə bağlı tədbirlər barədə eşidirik. Diaspor təmsilçiləri deyirlər ki, 2023-cü ilin "Heydər Əliyev İli" elan edilməsini hər bir vətənpərvər soydaşımız böyük ruh yüksəkliyi ilə qarşılayıb.
Bu gün Rusiyanın, Avropanın, Amerikanın müxtəlif şəhərlərində, vilayətlərində, başqa-başqa materiklərdə, qitələrdə fəaliyyət göstərən Azərbaycan diaspor təşkilatları il boyu "Heydər Əliyev İli" nə töhfə veriblər.
Diaspor təşkilatları "Heydər Əliyev İli" çərçivəsində bir çox tədbir keçirib. Dünya azərbaycanlıları ümummilli lider Heydər Əliyevin anadan olmasının 100 illik yubileyinə həsr olunan tədbirlərdə qeyd ediblər ki, Heydər Əliyev bütün ömrünü Azərbaycan üçün yaşayıb, o, həyatının ən böyük qayəsini milliliyin, həmrəyliyin qorunub saxlanmasında görürdü. Onlar qeyd edirlər ki, Əliyev hər zaman xaricdə yaşayan azərbaycanlıların taleyi ilə maraqlanıb, onların birləşməsi, həmrəyliyi, Azərbaycan dövlətinin ətrafında sıx birləşməsi üçün siyasət həyata keçirib.
Qitələri dolaşan Heydər Əliyev dühası...
Məlum olduğu kimi, "Heydər Əliyev İli" münasibətilə xarici ölkələrdə keçirilən tədbirlərin təşkil edilməsində Diasporla İş üzrə Dövlət Komitəsinin böyük rolu var. Bu ilin may ayında Dövlət Komitəsinin, Azərbaycanın Almaniyadakı səfirliyinin əməkdaşlarının və Güney Azərbaycan icmasının nümayəndələrinin iştirakı ilə Berlində müasir Azərbaycan dövlətinin qurucusu, görkəmli dövlət xadimi Heydər Əliyevin anadan olmasının 100 illiyi çərçivəsində Almaniyadakı Azərbaycan icmasının üzvləri ilə görüş keçirilib. Burada da vurğulanıb ki, "Heydər Əliyev İli" çərçivəsində bütün dünyada müxtəlif xarakterli tədbirlər gerçəkləşdirilir və H. Əliyev irsi bütün dünyada təbliğ olunur.
"Heydər Əliyev İli" çərçivəsində Cənubi Koreyanın Seul şəhərində, Almaniyanın Hambruq şəhərində, Qırğızıstanın Bişkek şəhərində və başqa ölkələrdə "Heydər Əliyev İli" çərçivəsində Azərbaycan icması ilə görüşlər keçirilib. Fransanın paytaxtı Parisdə də Heydər Əliyev İli ilə bağlı silsilə tədbirlər həyata keçirilib. Bundan başqa xarici ölkələrdə Dövlət Komitəsinin və diaspor qurumlarının xətti ilə müxtəlif konsert proqramları, ədəbi bədii gecələr keçirilib.
Bütün tədbirlərdə qeyd edilib ki, Heydər Əliyevin miras qoyduğu milli birlik ideyası, ənənəsi davam etdirilir.
Vaxtilə Heydər Əliyev soydaşlarımızla görüşdə milli birliklə bağlı deyirdi:"Sizdən çox şey tələb olunmur. Sadəcə, Siz unutmamalısınız ki, dünyada müstəqil Azərbaycan dövləti var. Unutmamalısınız ki, bu torpaq bütün azərbaycanlıların doğma torpağıdır. Unutmamalısınız ki, Azərbaycan dövləti mümkün olan çərçivədə hər birinizin hüquqlarınızın qorunması üçün lazımi işlər görəcəkdir və bilməlisiniz ki, biz dünyanın müxtəlif ölkələrində yaşayan azərbaycanlılar haqqında daim düşünürük, maraqlanırıq, hər bir həmvətənimizin yaxşı, firavan yaşamasını istəyirik, yaşadığı ölkədə özünəlayiq yer tutmasını istəyirik".
Ulu öndərin bu tövsiyələri ədəbiyyən soydaşlarımızın yaddaşında özünə yer tutub.
Parisdə silsilə tədbirlər...
Bir neçə gün əvvəl AZƏRTAC-ın təşkilatçılığı ilə Parisdə Azərbaycan səfirliyinin Mədəniyyət Mərkəzində Heydər Əliyevin anadan olmasının 100 illik yubileyinə həsr olunmuş fotosərgi açılıb.
"Heydər Əliyev İli" çərçivəsində təşkil olunan sərgidə AZƏRTAC-ın fotoxronikasında saxlanılan və Ümummilli Lider Heydər Əliyevin həyat və fəaliyyətinin müxtəlif dönəmlərini, dünya siyasi liderləri, eləcə də Fransanın sabiq prezidentləri ilə görüşlərini əks etdirən nadir fotolar nümayiş olunub. Bu fotolarda əbədiləşdirilən məqamlar Ulu Öndərin fəaliyyətinin tarixi məqamlarını əks etdirir.
Azərbaycanın Fransadakı səfiri Leyla Abdullayeva AZƏRTAC-ın "Heydər Əliyev İli" çərçivəsində Parisdə təşkil etdiyi sərginin əhəmiyyətini vurğulayaraq, belə sərgilərin Ulu Öndərin əziz xatirəsini daim yaşatdığını bildirib.
Sonra Azərbaycanın Fransadakı səfirliyinin və UNESCO yanında Daimi Nümayəndəliyinin birgə təşkilatçılığı ilə Ümummilli Lider Heydər Əliyev tərəfindən təsis olunan və bütün azərbaycanlıların birlik rəmzinə çevrilən Dünya Azərbaycanlılarının Həmrəylik Günü və Yeni il münasibəti ilə tədbir keçirilib.
Tədbirdə Leyla Abdullayeva və Azərbaycanın UNESCO yanında daimi nümayəndəsi Elman Abdullayev çıxış edib.
Səfir Leyla Abdullayeva Ümummilli Lider Heydər Əliyev tərəfindən təsis olunan Dünya Azərbaycanlılarının Həmrəyliyi Günü münasibətilə soydaşlarımızı təbrik edib. Səfir 2023-cü ilin Azərbaycan üçün çox önəmli olduğunu və bu il müasir Azərbaycanın banisi, qurucusu və memarı Ümummilli Lider Heydər Əliyevin 100 illik yubileyinin dünya ölkələrində, eləcə də Fransada təntənəli şəkildə qeyd edildiyini bildirib. Vurğulayıb ki, məhz bu il Prezident, Ali Baş Komandan İlham Əliyevin uzaqgörən siyasəti və rəhbərliyi ilə xalqımızın möhkəm iradəsi və hərbçilərimizin şücaəti sayəsində Azərbaycanın ərazilərinin suverenliyi tam bərpa olunub.
Bildirib ki, 2020-ci il Azərbaycan tarixinə qızıl hərflərlə qələbə-Zəfər ili kimi yazılıb və 2023-cü il isə bu qələbənin tacı olub. Zəfərimiz dövlətimizin, xalqımızın, eləcə də xaricdə yaşayan azərbaycanlıların birlik, həmrəylik və qürur rəmzinə çevrilib. Böyük Zəfər ölkəmizin tarixində yeni səhifə açdığı kimi, xaricdə yaşayan soydaşlarımızı birləşdirən diasporumuzun fəaliyyətində yeni dövrün əsasını qoyub. Vətən müharibəsi diasporumuzu daha da mətinləşdirib...
Dünyanın çox az ölkəsi ola bilər ki, orada Heydər Əliyevin anadan olmasının 100 illiyi çərçivəsində tədbirlər, görüşlər keçirilməsin. Çünki Heydər Əliyev bəşəriyyət üçün önəmli dövlət xadimi, siyasətçidir. Dünyanın 5 qitəsində hazırda dünyanın 100-dən çox ölkəsində yaşayan azərbaycanlıların bir araya gətirilməsi, xaricdə yaşayan soydaşlarımızla Azərbaycan arasında əlaqələrin qurulması çox mühüm nəticələr verdi.
Yeri gəlmişkən, Dövlət Komitəsinin sədr müavini Elşad Əliyev mətbuata bildirib ki, bu ilin birinci yarısında "Heydər Əliyev İli"çərçivəsində diaspor təşkilatları tərəfindən Azərbaycanda və müxtəlif ölkələrdə 100-dən artıq tədbir keçirilib. Bu tədbirlər ilin sonunadək davam edəcək.
Bu gün Azərbaycan diasporu Heydər Əliyevin dövlətçilik irsinin təbliğində, tanıdılmasında mühüm rol oynayır. Bu da faktdır ki, Azərbaycan diasporu Azərbaycan dövlətinin ətrafında çox sıx birləşib.
İlin sonuna az qalmadı a baxmayaraq, Heydər Əliyev İli çərçivəsində tədbirlər davam edir, filmlər, kitablar təqdim edilir, müsabiqələr keçirilir. Bütün bunların hamısında məqsəd ulu öndərin irsini yaşatmaq və təbliğ etmək dayanır. Bizə dövlətçilik, milli birlik bəxş edən bu qüdrətli şəxsiyyətin işıqlı əməlləri dünya azərbaycanlılarının qəlbində yaşayır. Qarşıdan 31 Dekabr Dünya - Azərbaycanlılarının Həmrəyliyi günü gəlir. Bu tarix də Heydər Əliyevin adı ilə bağlıdır...
İradə SARIYEVAYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
