Elşad Musayev: "Bu o demək deyil ki, Zəngəzur dəhlizi məsələsi birdəfəlik bağlanıb"
Gələn ay ərzində İran və Azərbaycan arasında Araz yol dəhlizi sazişi imzalanacaq. Bunu İranın yol və şəhərsalma naziri Mehrdad Bəzrpaş jurnalistlərə açıqlamasında deyib.
Onun sözlərinə görə, dəhliz sazişinin imzalanması ilə əlaqədar tədbir təşkil olunacaq: "Tədbirdə Rusiya nümayəndələri də iştirak edəcəklər".
İranlı nazir bildirib ki, podratçı şirkətin təyin olunması ilə Araz dəhlizinin inşası prosesinə başlanıb: "Bu proses Araz çayı üzərində körpünün tikilməsi, magistral yolun genişləndirilməsi çərçivəsində həyata keçiriləcək. Belə ki, bu dəhliz Naxçıvana birləşəcək".
Bu prosesin gerçəkləşməsindən sonra hesab etmək olarmı ki, Zəngəzur dəhlizi məhz Ermənistanın kaprizləri üzündən sıradan çıxdı? Yəni Ermənistan özü artıq ondan məhrum oldu. O baxımdan belə demək olarmı ki, Zəngəzur dəhlizinin imkanlarından artıq Ermənistan özü-özünü məhrum etdi?
"Ermənistan əvvəl-axır buna razılaşacaq, əks təqdirdə kommunikasiya xətlərindən məhrum olacaq"
Sözügedən məsələ ilə bağlı fikirlərini "Bakı-Xəbər"lə bölüşən Böyük Azərbaycan Partiyasının sədri Elşad Musayev buna bir neçə aspektdən yanaşdı: "Məlum olduğu kimi, Zəngəzur dəhlizinin açılması dalana dirənib. Bunun da bir sıra səbəbləri var. Ona görə də Azərbaycan İranla danışıqlar aparıb və nəticədə oradan Naxçıvana yol çəkilir. Bu yol da Naxçıvanı Azərbaycanın materik hissəsi ilə birləşdirmək məqsədi daşıyır. Bununla əlaqədar müəyyən işlər gedir və yolun genişləndirilməsi nəzərdə tutulur. Bir sözlə, İran ərazisindən bizi Naxçıvanla birləşdirəcək yol keçəcək. Artıq bu razılaşdırılıb və müvafiq işlər gedir. İndi İran ərazisindən keçən bu dəhliz Zəngəzur dəhlizini əvəz edəcəkmi? Bununla bağlı müxtəlif müzakirələr gedir. Bəzən də belə çıxışlar olur ki, artıq İran ərazisindən bu yol keçir və Zəngəzur dəhlizinə ehtiyac yoxdu. Bu dəhliz arxa plana keçdi və s. Ancaq hesab edirəm ki, Zəngəzur dəhlizini İrandan keçən dəhlizlə qətiyyən eyniləşdirmək olmaz. Çünki Zəngəzur dəhlizi strateji məsələdir və bizim üçün siyasi əhəmiyyət kəsb edir. Zəngəzur Azərbaycanın tarixi torpağıdır. 100 il bundan əvvəl qeyri-qanuni surətdə Kommunist Partiyasının qərarı əsasında Ermənistana verilib. Daha konkret desək, Zaqafqaziya Mərkəzi İcraiyyə Komitəsinin qərarı ilə o torpaqlar Ermənistana bəxş edilib. Ermənistan və onun arxasında duran qüvvələr fürsətdən istifadə edib Azərbaycanla Naxçıvan və Türkiyə arasında əlaqələrin açılmasına mane olurlar. Burada strateji məqsəd həm də odur ki, Türkiyənin türkdilli ölkələrlə birbaşa əlaqəsini kəssinlər. Çünki türk arealının yaranması onları narahat edir. Ona görə də bu, siyasi məsələdir. Eyni zamanda, Zəngəzur dəhlizinin açılması məsələsi Azərbaycanın və türk dünyasının perspektivi ilə bağlı olan məsələdir. Bir sıra ölkələrin burada maraqları var. Çindən Böyük Britaniyaya qədər bir sıra ölkələrin maraqları var. O baxımdan, Ermənistan kimi cırtdan bir dövlət dünyanın qan damarını kəsə bilməz. Düzdür, İran, Fransa kimi ölkələr Zəngəzur dəhlizinin açılmasında maraqlı deyil. Ancaq bu o demək deyil ki, Zəngəzur dəhlizi məsələsi birdəfəlik bağlanıb. Ermənistan əvvəl-axır buna razılaşacaq, əks təqdirdə kommunikasiya xəttlərindən məhrum olacaq".
Vidadi ORDAHALLI
