Təkcə bu il Avropa Parlamenti Azərbaycana qarşı 3 dəfə bəyanat qəbul edib. Hamısı da qərəzli. Yanvarın 18-də Avroparlamentin plenar iclasında “Dağlıq Qarabağda blokadanın humanitar nəticələri” mövzusunda müzakirə keçirilib.
Deputatların hazırladığı qətnamə layihəsi Azərbaycanı Qarabağı Ermənistanla birləşdirən Laçın dəhlizini dərhal açmağa, Ermənistanla Qarabağ arasında nəqliyyat, energetika və kommunikasiya əlaqələrini pozmaqdan çəkinməyə çağırıb.
Daha sonra mart ayında Avropa Parlamenti "Azərbaycanın Ermənistana hərbi təcavüzü", "Laçın yolunun blokadası", "Minsk qrupu", "Dağlıq Qarabağın statusu" kimi məsələləri müzakirəyə çıxararaq qərəzli qətnamə qəbul edib. Ən nəhayət, Avroparlament deputatları oktyabrın 5-də Avropa İttifaqını Qarabağda baş verən hadisələrlə bağlı Azərbaycana qarşı sanksiyalar qoyulmasına, habelə Bakı ilə əməkdaşlığa yenidən baxılmasına və Azərbaycan qazından asılılığın azaldılmasına çağıran qətnamə qəbul ediblər.
Maraqlıdır, qurum icra olunmayan bu bəyanatlarla nəyə nail olmaq istəyir?
“Avroparlamentin qəbul etdiyi qətnamədə heç bir reallıq nəzərə alınmayıb və o üzdən bu, sadəcə boş kağız parçasıdır”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyev hesab edir ki, bütün bunlar Avroparlamentin Azərbaycana qarşı necə ədalətsiz və qərəzli olmasının əyani göstəricisidir: “Erməni lobbisinin, antiazərbaycançı mərkəzlərin yuvasına çevrilmiş Avropa Parlamenti dövlətimizin ərazilərini işğaldan azad etməsini, Qarabağ ərazisində öz suverenliyini təmin etməsini, separatizmin kökünü kəsməsini həzm edə bilmir. Biz görürük ki, Avropanın özündə separatizmə qarşı mübarizə aparılanda Avropa Parlamenti fərqli mövqe nümayiş etdirir. Beynəlxalq hüquq normaları bütün dövlətlər üçün bərabərdir. Bu təşkilatın məsələyə fərqli yanaşmaq cəhdləri yolverilməzdir. Qarabağda keçirilən antiterror zamanı ordumuz yalnız qanunsuz hərbi birləşmələri hədəfə alıb. Mülki əhaliyə və infrastruktura toxunulmayıb. Avropa Parlamenti kimi qərəzli qurumlar Azərbaycanı “etnik təmizləmə”də ittiham etməyə çalışırlar. Amma dövlətimiz öz qanuni addımları ilə həmin iddiaları ifşa edir”.
Politoloqun fikrincə, bütün qərəzli yanaşmalara rəğmən, Avropa Parlamentinin qətnaməsi simvolik məna daşıyır: “Avropa institutlarının Azərbaycana münasibəti məni təəccübləndirmir. Çünki son 20-30 ildə biz cəmiyyət olaraq buna qarşı immunitet formalaşdırmışıq. Ancaq nə qədər simvolik olsa da, bu cür sənədlərin Azərbaycan-Avropa İttifaqı münasibətlərinə, ölkənin beynəlxalq imicinə müəyyən dərəcədə ziyanı var. Ancaq Avropa İttifaqı ölkələrinin bu qətnamədən çıxış edərək Azərbaycana münasibətdə dəyişikliyə gedəcəklərini düşünmürəm. Avroparlamentin real siyasi proseslərə təsir imkanı zəifdir. Aİ-nin siyasətini yürüdənlər daha praqmatik baxışlara malikdirlər. Ona görə də Azərbaycanla münasibətləri hələ də müsbət formada saxlayırlar. Avropa Parlamentinin istənilən qərar və qətnamələrindən asılı olmayaraq, Azərbaycan öz ərazi bütövlüyünün, suverenliyinin təmin edilməsi istiqamətində beynəlxalq hüququn norma və prinsiplərinə uyğun olaraq siyasətini həyata keçirməyə davam edəcək. Rəsmi Bakı bu zamanadək üzərinə edilən "hücumlara" sinə gərdiyi kimi, bundan sonra da yolunda qətiyyətli olaraq regionda heç bir kənar qurumların rəyindən asılı olmadan sülh gündəliyinin təşviq edilməsinə, sülhün və sabitliyin bərqərar olunmasına çalışacaq. Azərbaycan qazından asılılığın azaldılması məsələsinə gəlincə, bu gün Azərbaycan həm qazı, həm də nefti ilə Avropa üçün əsas enerji mənbəyi rolunu oynayır. Avroparlamentin Azərbaycan qazından asılılığın azaldılmasına dair qətnaməsi yalnız boş sözlərdən ibarətdir. Çünki iqtisadi cəhətdən bu mümkün də deyil. Danılmaz faktdır ki, bu gün Ruysiya Federasiyası da Avropaya yönəlik enerji resurslarını dayandırıb. Rusiyaya qarşı davamlı sanksiyaların tətbiqi əlaqələrin itirilməsi ilə nəticələnib. Bu mənada, hesab edirəm ki, Avropa Parlamentinin qəbul etdiyi qətnamədə heç bir reallıq nəzərə alınmayıb. Ona görə də bu, sadəcə boş kağız parçasıdır”.
Vidadi ORDAHALLI
