Avropada tüğyan edən islamofobiya, antisemitizm, miqrantların hüquqlarının kütləvi və kobud surətdə pozulması və digər bu kimi köklü problemlərlə məşğul olmaq əvəzinə Avropa Parlamenti yenə başqa ölkələrin işinə müdaxilə etməyə daha çox diqqət ayırır. Bu qurum daim beynəlxalq hüquq və prinsiplərinə deyil, qərəz və ikili standartlara üstünlük verir.
Müharibələrə, işğallara, insan iztirablarına, ölkələrin ərazi bütövlüyü və suverenliyinə etnik və dini simpatiya əsasında yanaşan irqçi, islamofob, Azərbaycanofob Avropa Parlamenti artıq nüfuzunu itirmiş bir qurumdur.
Ermənistana da bu qurum həmişə xüsusi münasibət bəsləyib. Bunu baş nazir Nikol Paşinyanın Strasburq səfəri, orada görüşləri, Avropa Parlamentində çıxışı fonunda da görmək olar. Paşinyanı Avropa Parlamentinin binasının girişində qurumun sədri, maltalı siyasətçi Roberta Metsola qarşılayıb. Bu zaman Nikolun Strasburqa üç qızı ilə gəldiyi məlum olub. İkitərəfli görüşün sonunda birgə mətbuat konfransı keçirilib. Paşinyan Qarabağ erməniləri üçün vəsait istədiyini mətbuat konfransında dilə gətirib: “Biz bir sıra problemlərin aradan qaldırılmasında Avropa İttifaqının əhəmiyyətli dəstəyini gözləyirik. Söhbət həm də 100 mindən çox erməninin Qarabağdan məcburi köçürülməsi nəticəsində Ermənistanda yaranmış humanitar problemlərin aradan qaldırılmasından gedir. Burada təcili dəstəyə ehtiyacımız var”. Qeyd edək ki, bu, Paşinyanın ay ərzində Avropaya ikinci işgüzar səfəridir. Qranadadan sonra Rusiyanın dominant mövqeyə malik olduğu MDB-nin Dövlət Başçıları Şurasının Bişkekdə keçirilən görüşünə qatılmayan Paşinyanın Strasburqa yollanması xüsusi məna kəsb edir. Paşinyan birgə mətbuat konfransında bildirib ki, Aİ–Ermənistan münasibətləri üçün vacib mərhələ başlanır: “Münasibətlərimizin ümumi dəyərlər sisteminə əsaslandığını və demokratiyanın bizim üçün şəraitin diqtə etdiyi seçim deyil, strateji seçim olduğunu vurğulamaq vacibdir. Biz Aİ ilə münasibətlərimizi dərinləşdirmək istəyirik. Ermənistan Respublikası Aİ-nin mümkün hesab etdiyi qədər Avropa İttifaqına yaxınlaşmağa hazırdır. Bunun heç bir şəkildə regional münasibətlərimizin dərinləşməsi və inkişafı ilə ziddiyyət təşkil etməsini istəmirik”. O əlavə edib ki, onun hökuməti Ermənistan–Aİ hərtərəfli və genişləndirilmiş tərəfdaşlıq sazişinin tam icrasına sadiqdir. Həmçinin bildirib ki, Aİ institutları arasında Ermənistanla münasibətləri dərinləşdirmək üçün konsensus var. Onun sözlərinə görə, Ermənistanın Aİ ilə əlaqələrinə yeni element – təhlükəsizlik əlavə olunub. Söhbət Aİ-nin Ermənistan-Azərbaycan şərti sərhədində müşahidə aparan mülki missiyasından gedir. Ermənistanın “Qraparak” qəzetinin baş redaktoru Armine Ohanyan bu fonda qeyd edir: “Baş nazir Paşinyan, müharibə istəmirsiniz, amma Zelenski və Ukrayna yolunu tutmusunuz, hər çıxışınızda rusları təxribata çəkirsiniz, onları günahlandırırsınız. Siz Bişkekə yox, Qranadaya və Strasburqa gedirsiniz. “Artsax”ın məğlubiyyətinə görə Rusiya və Putini günahlandırırsınız. Belarus prezidentinin qatı düşməni ilə görüşmüsünüz. Bu addımlar təsirsiz ötüşmür. Sizin Azərbaycan və Türkiyədən heç də az güclü olmayan yeni düşmənləriniz var. Bəs Qərb Zelenskini dəstəklədiyi kimi sizi də dəstəkləməyə hazırdırmı?”.
Daha bir maraqlı nüans Paşinyanın sülh haqqında nağılları və Azərbaycanı ittiham etməyə çalışmasıdır. Hesab edilir ki, 30 ilə yaxın müddət ərzində bir milyona qədər azərbaycanlının fundamental hüquqlarını pozan, azərbaycanlılara qarşı soyqırımı və kütləvi qırğınlar törətmiş bir ölkə olan Ermənistanın baş nazirinin könüllü olaraq Qarabağdan getmiş yerli ermənilərin “etnik təmizləməyə” məruz qaldığını iddia etməsi sadəcə gülüş doğurur. Bu, həmçinin 21 sentyabr tarixində Ermənistan ictimaiyyətinə müraciətində Qarabağ bölgəsindəki erməni sakinlərin təhdidlərlə üzləşmədiyini bildirən Ermənistan baş nazirinin bəyanatlarının bir-biri ilə nə qədər uyğunsuz olduğunu nümayiş etdirir. Ermənistanın Azərbaycan və Türkiyəni blokadada ittiham etməsinin reallıqla heç bir əlaqəsi yoxdur. Ermənistanın hərbi təcavüz və ərazi iddiaları səbəbindən regional layihələrdən təcrid olunması hər kəsə yaxşı məlumdur. Üstəlik görünür ki, Ermənistan Azərbaycanın öz ərazilərini azad etməsindən sonra da buna son qoymaq niyyətində deyil. Ermənistan tərəfi vətəndaşların, nəqliyyat vasitələrinin və yüklərin hər iki istiqamətdə maneəsiz hərəkətini təşkil etmək, eyni zamanda, bu istiqamətdə təhlükəsizliyi təmin etmək öhdəliyinin mövcud olduğunu yaxşı bilir. Ermənistanın, həmçinin Azərbaycanın qərb bölgələrini Naxçıvan Muxtar Respublikası ilə birləşdirən yeni nəqliyyat kommunikasiyalarının tikintisini təmin etməklə bağlı öhdəliyi mövcuddur. Amma Paşinyan bunlara əməl etmir. Avropa Parlamentində də heç kim bunu ona irad tutmur. Təbii ki, Avropa Parlamentinin bu addımı onun ikili standartlara əsaslandığının növbəti bariz nümunəsi olub, məsələlərə selektiv yanaşdığını sübut edir. Beynəlxalq səviyyədə tanınmış Azərbaycan ərazisinin 20 faizinin 30 ilə yaxın davam edən işğalının doğurduğu ağrı-acıya, etnik təmizləməyə, Xocalı soyqırımına, 1 milyondan artıq qaçqın və məcburi köçkünün taleyinə, şəhər və kəndlərin yerlə-yeksan edilməsinə, tarixi, mədəni və dini irsin dağıdılmasına etinasızlıq göstərən Avropa Parlamenti birdən-birə Ermənistanın müdafiəçisinə çevrilib. Qurumun bu addımı separatizmə açıq dəstək verməkdir. Paşinuyan da elə bundan cəsarətlənir. Lakin rəsmi Bakının bəyan etdiyi kimi, Azərbaycan və Ermənistan arasında münasibətlərin normallaşması, Azərbaycanın Qarabağ regionunda qondarma erməni rejiminin və qanunsuz silahlı qüvvələrin yaratdığı təhlükəni aradan qaldırdıqdan sonra Cənubi Qafqaz regionunun sülh və əməkdaşlıq məkanına çevrilməsi üçün tarixi imkanların yarandığı bir dövrdə, Ermənistan baş nazirinin davam edən aqressiv ritorikası sülh perspektivlərinə xələl gətirir.
Sairə SƏFƏROVA
