Ermənistan baş naziri Nikol Paşinyanın Avropa Parlamentində çıxışı, gözlənildiyi kimi, Moskva və İrəvan arasında münasibətləri bir qədər də gərginləşdirdi. Çünki Paşinyan birbaşa ad çəkməsə də, dedikləri ilə Rusiyanı sərt tənqid hədəfinə çevirdi.
Məsələn, o qeyd etdi ki, Ermənistanın təhlükəsizlik üzrə müttəfiqləri açıq şəkildə ölkədə demokratik hökuməti devirməyə çağırdılar:
“Ermənistanda demokratiya eyni ssenari üzrə ciddi zərbələr alıb və almaqda davam edir. Əvvəlcə xarici təcavüz, sonra Ermənistanın müttəfiqlərinin fəaliyyətsizliyi, daha sonra isə hərbi və ya humanitar vəziyyətdən istifadə edərək ölkədə hakimiyyəti devirmək cəhdləri gəlir. Qarabağdan 100 min erməni köçəndə təhlükəsizlik üzə müttəfiqlərimiz nəinki bizə kömək etdilər, əksinə, Ermənistanda hakimiyyətin dəyişməsi, demokratik rəhbərliyin devrilməsi ilə bağlı ictimai çağırışlar etdilər”.
Qeyd edək ki, Nikol Paşinyanın “müttəfiqlərimiz” deyə ümumiləşdirməsində Rusiyanı nəzərdə tutduğu da məlumdur. O, çıxışı zamanı KTMT-dən avropalılara şikayət edib: “2021-ci il mayın 12-də Azərbaycan Silahlı Qüvvələri Ermənistanın “sərhədlərini pozaraq” suveren ərazisini 4 kilometr en, 100 kilometrə qədər uzunluqda “işğal edib”. Bu vəziyyətdə Ermənistanın təhlükəsizlik sistemi sayılan KTMT və ikitərəfli müqavilələr əsasında təhlükəsizlik öhdəliyi daşıyan ölkələr Ermənistana heç bir köməklik göstərmədilər, bizi tək qoydular”. Burada xatırladaq ki, Ermənistandan fərqli olaraq, Azərbaycan heç vaxt başqa ölkələrin ərazisinə iddia etməyib. Paşinyan isə Strasburqda Avropa Parlamentinin rəhbəri Roberta Metsola ilə birgə mətbuat konfransında deyib ki, İrəvan Avropa İttifaqı ilə əlaqələrin daha da dərinləşməsində maraqlıdır. O qeyd edib ki, demokratiya Ermənistan üçün strateji seçimdir və bu, Aİ ilə əlaqələrin möhkəmləndirilməsi üçün möhkəm təməldir. Onun sözlərinə görə, son dövrlərdə Ermənistanla Aİ arasında münasibətlər daha bir elementlə - təhlükəsizlik sferası ilə tamamlanıb: “Söhbət xüsusilə Aİ-nin Ermənistandakı mülki monitorinq missiyasından gedir”. Bunlar fonunda məsələ ilə bağlı “armenianreport” portalı yazır: “Ermənistanın baş naziri Nikol Paşinyanın Avropa Parlamentinin Strasburqda keçirilən plenar iclasındakı çıxışı sözsüz ki, əlamətdardır. O, rəsmi İrəvanın yeni xarici siyasət kursunu aydın şəkildə müəyyənləşdirdi və hamıya göstərdi. Bu isə bizi sevindirməyə bilməz - bizim gözümüzün qabağında Paşinyan Rusiyadan Qərbə doğru kəskin, lakin çoxdan gözlənilən dönüş etdi. Hansı ki, bu, Paşinyan və Mirzoyanın MDB-nin Bişkek sammitinə getmək və KTMT tədbirlərində iştirak etmək istəməməsindən sonra artıq bəlli olub. Eyni zamanda, vacib olan odur ki, baş nazir nəinki dönüş nümayiş etdirdi, həm də Ermənistanı xarici siyasət istiqamətlərini dəyişməyə məcbur edən səbəbləri açıqladı. Beləliklə, xüsusilə Paşinyan avropalı deputatlara bildirib ki, bizim təhlükəsizlik sahəsindəki “müttəfiqlərimiz” nəinki bizə kömək etməyib, həm də açıq şəkildə hakimiyyətin dəyişdirilməsinə çağırıblar. Ermənistanda demokratik hakimiyyətin devrilməsi üçün cəhd ediblər. Bu “müttəfiqlərin” kim olduğu açıq sirdir. Bu, təbii ki, Rusiya və onun KTMT və Aİİ-dəki peykləridir.
Geosiyasi və daxili təlatümlər dövründə 44 günlük müharibədə acı məğlubiyyət fonunda dövlətçiliyin əsaslarını sarsıtmaq yalnız ölkəmizdə çoxsaylı beşinci kolona malik Moskvaya gərək idi. Artıq 3 ilə yaxındır ki, Ermənistanda baş verən bütün o anti-hökumət mitinqlərinə və aksiyalarına məhz Moskva əmr verib. Və çətin ki, indi ona tabe olmayan Paşinyan hakimiyyətdə olduğu müddətdə və ya gələcəkdə belə hərəkətlərdən imtina etsin. Fransada və ya ABŞ-da kiminsə Ermənistanın demokratik yolla seçilmiş liderini bu qədər həyasızcasına devirməyə cəhd edəcəyini təsəvvür etmək çətindir. Paşinyan bununla da sakitləşməyib və Rusiyanı Qarabağda baş verənlərin qarşısını almaq istəməməkdə ittiham edərək sözün əsl mənasında Kremli “bombalamaqda” davam edib. Və sonda baş nazir Rusiyanın ölkəmizə qarşı çoxəsrlik işğalçılıq siyasətinin tabutuna son mismarını da vurdu. O, açıq şəkildə bildirib ki, Aİ Ermənistanın əsas tərəfdaşıdır və Ermənistan Avropa İttifaqının mümkün hesab etdiyi qədər Avropa İttifaqına daha yaxın olmağa hazırdır. “Bu kontekstdə Hərtərəfli və Genişləndirilmiş Tərəfdaşlıq Sazişinin əhəmiyyətini vurğulamağı zəruri hesab edirəm. Bu ilin fevralından Ermənistanda Avropa İttifaqının uzunmüddətli mülki missiyası fəaliyyət göstərir. Bu, ilk dəfə olaraq Avropa İttifaqını Ermənistanın təhlükəsizlik gündəliyinə cəlb edən böyük hadisədir”. Yəni biz Avropa ilə təkcə xarici siyasət və iqtisadiyyat baxımından deyil, həm də təhlükəsizlik baxımından daha sıx əməkdaşlığa açılmağa hazırıq. Amma Moskvada ən böyük narahatlığa səbəb məhz son məqamdır - bundan sonra Ermənistanın təhlükəsizliyinə Moskva deyil, Aİ cavabdehlik daşıyacaq. Müvafiq olaraq, həm birləşmiş qoşunlar qrupuna, həm də Rusiya hərbçilərinin ərazimizdə mövcudluğuna ehtiyac aradan qalxır. Üstəlik, Ermənistanın KTMT və Aİİ-dən çıxması məsələsi bütün bunlardan irəli gəlir. Əgər təhlükəsizlik baxımından Qərblə əməkdaşlıq ediriksə, o zaman 102-ci baza və rusiyayönlü birliklərə üzvlük kimi bütün bu lazımsız yüklər nəyə lazımdır? Paşinyan Avropa Parlamentinə dəvət olunub və dinlənilib. Bəs ruslar nə vaxtsa Ermənistanın nümayəndələrindən kimisə, məsələn, Dövlət Dumasında və ya Federasiya Şurasında çıxış etməyə dəvət ediblərmi? Ermənistan tərəfinin problem və istəklərinə qulaq asıblarmı? Yox. Rusiya ancaq xarici və daxili düşmənlərimizi dəstəkləyir və öz mediasında üstümüzə çamur atır. Müttəfiqlər, dostlar və tərəfdaşlar bunu etmirlər. Buna görə də Ermənistan çoxdan edilməli olanı etmək qərarına gəldi - Rusiyaya əl qaldırıb, bizi anlayan sivil və ən əsası Avropa limanına doğru sürətlə irəliləməyə qərar verdi”.
Nahid SALAYEV
