“Xankəndidəki ofis heç bir zaman Ermənistana bağlı olmayıb”. Bu sözləri BQXK-nın Bakı nümayəndəliyinin ictimaiyyətlə əlaqələr şöbəsinin rəhbəri İlahə Hüseynova deyib. O bildirib ki, hazırda da həmin ofis bağlanmayıb, fəaliyyət göstərir.
Onu da qeyd edək ki, Azərbaycan tərəfi rəsmi şəkildə bildirdi ki, BQXK-nın Xankəndidəki ofisi Ermənistana tabe olub. Müharibənin sonlarına yaxın günlərdə də Azərbaycanın tələbi ondan ibarət idi ki, həmin ofis Bakıya tabe olsun. Ancaq BQXK-nın Bakı nümayəndəliyinin məlum açıqlaması marağa səbəb olub.
Maraqlıdır, BQXK-nın Xankəndidəki ofisi 30 ildə kimə tabe olub?
“Azərbaycan tərəfi də haqlı olaraq Xankəndi Azərbaycan torpağı olduğu üçün oradakı ofisin Bakı üzərindən kommunikasiya olmasını tələb edirdi, indi onların belə bir fikir səsləndirməsi inandırıcı deyil”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, Xankəndidə olan BQXK-nin ofisi bir qayda olaraq bütün fəaliyyətlərini Ermənistan üzərindən həyata keçirib: “Humanitar yardımların gətirilməsi, xəstələrin daşınması, ümumiyyətlə kommunikasiyalar Ermənistan üzərindən həyata keçirilib. Belə olan halda sual yaranır ki, o ofisin bir nömrəli kommunasiya mərkəzi niyə Ermənistanda olub. Beynəlxalq Qırmızı Xaç Komitəsinin fəaliyyət istiqamətinə nəzər yetirəndə onlar haqlı görünə bilər. Çünki BQXK müxtəlif bölgələrdə, coğrafiyada fəaliyyət göstərərkən dövlətlərarası münasibəti diqqətə almır. Bu proseslərdə özləri tərəf kimi çıxış etmir. Onların əsas missiyası həmin bölgədə insanlara humanitar yardımın göstərilməsidir. Bu baxımdan yerli nümayəndəliklər avtonom fəaliyyət göstərirmiş kimi görünürlər. Ancaq təəssüflər olsun ki, biz BQXK Xankəndi ofisi haqqında bunları deyə bilmirik. Çünki bütün dünyanın gözü qarşısında bəyan edildi ki, bu komitənin işçiləri Laçın sərhəd məntəqəsindən qaçaqmalçılıq edib. BQXK-nin logosu altında hərəkət edən böyük nəqliyyat vasitələrində qaçaqmalçılıqla məşğul olunub. Belə hallar olduğuna görə Azərbaycan ictimai rəyində BQXK-nin Xankəndi ofisinin niyə Ermənistanla təmasda olması ilə bağlı suallar yarandı. Azərbaycan tərəfi də haqlı olaraq Xankəndi Azərbaycan torpağı olduğu üçün oradakı ofisin Bakı üzərindən kommunikasiya olmasını tələb edirdi. Indi onların Ermənistanla işləməmişik kimi fikir səsləndirməsi inandırıcı deyil. Düz deyirlərsə bizi qane edə biləcək açıqlama versinlər. Yoxsa sözlə nəsə demək inandırıcı deyil. Ola bilər ki, onlar deyə bilər Cenevrəyə tabedirlər. Beynəlxalq Qırmızı Xaç Komitəsinin bütün təmsilçiləri Cenevrəyə bağlıdır. Ancaq yerdə fəaliyyəti həyata keçirən zaman işləri hansı ofislə əəkdaşlıq ediblərsə onu açıqlasınlar. Biz açıq şəkildə görmüşük ki, Xankəndidəki ofis Ermənistandakı ofislə həmahəng işləyir”.
Günel CƏLİLOVA
