Avropa Parlementinin dünya dövlətlərinə eyni gözlə baxmaması, çox zaman günahkarın, təcavüzkarın yanında yer alması artıq onun üçün “normaya” çevrilib. Son 30 ildə Azərbaycana qarşı kəskin qərəzi ilə seçilən Avroparlament hər zaman təcavüzkar, genosid törədən, terrorçu Ermənistanın yanında yer alıb, bununla da təcavüzü, terroru dəstəklədiyini göstərib.
Avroparlament dünyadakı bir çox proseslərə qeyri-obyektiv mövqe göstərir, o cümlədən də Azərbaycanın hər addımına qərəzlə yanaşır. Ermənilərin Qarabağı könüllü olaraq tərk etməsinə “etnik təmizləmə”, “qaçqın-köçkün” donu geydirməyə həvəskar olan Avroparlamentin növbəti riyakarlığı da gözdən qaçmır, bu təşkilat sanki Ermənistanı, erməniləri müdafiə etmək üçün yaradılıb. Fakt budur ki, o aşkar şəkildə ermənilərin tərəfini tutur. Bu da onun əsl niyyətini ifşa edir.
Bildiyimiz kimi, Ermənistanın baş naziri Nikol Paşinyan Strasburqa gedib və oktyabrın 17-də Avropa Parlamentində çıxış edib, yenə bir-birinə zidd ifadələr işlətməklə özünü dolaşdırıb. Bu öz yerində. İndi də diqqətimizi “erməni sevgisi” aşıb-daşan Avropa Parlamentinin prezidenti Roberta Metsolanın oktyabrın 17-də Strasburqda Nikol Paşinyanla birgə mətbuat konfransı zamanı dediklərinə yönəldək. R.Metsola bütün vicdan hissini, vəzifəsini, məsuliyyətini unudaraq, o ki var, erməni ağzı ilə danışıb. “Avropa Parlamenti siyasi qurumdur və 3 prinsipin həyata keçirilməsini təmin etməkdə ardıcıl olacaq. Avropa Parlamenti aydın qətnamələr və hesabatlar qəbul edib, sülh danışıqlarının erkən bərpa olunmasına çağırıb”-deyə bildirən Metsola vurğulayıb ki, Avropa Parlamenti Qarabağla bağlı üç qətnamə və Azərbaycana qarşı sanksiyaların qəbul edilməsi zərurətini göstərən hesabat qəbul edib. O deyib ki, Avroparlament ermənilərin Qarabağa qayıtmasının beynəlxalq mexanizmləri üzərində işləyir, onu vacib bilir və sair.
Özünü “sülhsevər” kimi qələmə verən Avroparlamentin sədri qərəzə vararaq Azərbaycana qarşı hədyanlar yağdırıb, guya bunlar sülh istəyir, biz yox.
N.Paşinyanı “demokratiya, sülh çarçısı” kimi təqdim edən və onu çox böyük istiliklə qarşılayan sədr deyib ki, Paşinyanın Strasburqda olması onu göstərir ki, Avroparlament Ermənistana sadiqdir. O, “Ermənistan sərhədlərinin müstəqilliyi, suverenliyi, ərazi bütövlüyü və qeyri-qanuniliyinə qeyd-şərtsiz dəstəyimizi bildiririk”-deyib. Sanki bir erməni kimi danışıb. Guya Azərbaycan Qarabağa “hücum edib”, bunlar da “hücumu” pisləyən qətnamə qəbul ediblər. Qarabağ Azərbaycanın suveren ərazisidir və orada antiterror tədbirləri keçirmək onun haqqıdır. Avroparlament bir qayda olaraq Ermənistanın təcavüzkar siyasətini, erməni separatizmini dəstəkləyib, bunu özünün əsas vəzifəsi sayıb.
Avropa Parlamentinin sədri açıq deyir ki, biz ermənilərin Qarabağa qayıtmasının beynəlxalq mexanizmləri üzərində işləyirik, onu vacib bilirik və sair. Özü də “fəxrlə” deyir ki, Qarabağla bağlı üç dəfə qətnamə qəbul etmişik. Bu, Avropa Parlamentinin ikiüzlülüyü, ikili standartı, ermənipərəstliyinin göstəricisi deyilmi? Bu qurumun rəhbərinin Paşinyana qucaq açması, onun belə qarşılanması, belə dəstəklənməsi, Azərbaycanı əsassız yerə ittiham etməsi və sair məsələlər AP-nın ikiüzlü, riyakar siyasətinin nəticəsi kimi özünü göstərir. Bu qurumun rəhbəri Paşinyanla birgə keçirdiyi mətbuat konfransında sülhdən, Ermənistanın ərazi bütövlüyünün müdafiəsindən danışıb, “məcburi köçkün” ermənilərin taleyindən narahat olduğunu dilə gətirib, amma bircə kəlmə deməyib ki, Ermənistan Azərbaycanın torpaqlarını işğal etmişdi, 35 il idi Qarabağda erməni separatizmi tüğyan edirdi, Azərbaycanın 1 milyon vətəndaşı öz ölkəsində məcburi köçkünə çevirilmişdi, 250 mindən artıq azərbaycanlı indiki Ermənistan ərazisindən zorla deportasiya edilmişdi, onlar geri qayıtmalıdır. Azərbaycanın haqq işinə heç bir dəstək verməyən Avroparlament oturub-durub ermənilərin gününə ağlayır. Heç şübhəsiz ki, bu da Avroparlamentin ayrıseçkilik siyasətinin nəticəsidir. Belə görsənir ki, onun kimi təşkilatlar dünya dövlətləri üçün deyil, bir qrup erməninin şər işlərini, saxtakarlığını müdafiə etmək üçündür. Halbuki, Avropa Parlamentinin üzərinə düşən əsas vəzifə ayrıseçkilik etmədən bütün dövlətlərə obyektiv, qərəzsiz yanaşmaqdır, amma təəssüf ki, biz bunu görmürük. Öz vəzifəsini yerinə yetirə bilməyən, öz məsuliyyətini dərk etməyən bir qurum isə çürüməyə doğru gedir və bu halda onun təpədən-dırnağa yenilənməsinə zərurət yaranır.
“Bu, sözügedən qurumun yürütdüyü ayrıseçkilik, tərəfli, ermənipərəst siyasətin növbəti təzahürüdür...”
Siyasi elmlər üzrə fəlsəfə doktoru, Beynəlxalq Münasibətlərin Təhlili Mərkəzinin aparıcı məsləhətçisi Mətin Məmmədli “Bakı-Xəbər”ə şərhində bildirdi ki, Avroparlament ermənipərəstliyindən heç zaman qalmır. “Qeyd edildiyi kimi, həqiqətən də Avropa Parlamentinin sədrinin belə bir açıqlama ilə çıxış etməsi tərəfimizdən qeyri-səmimi qarşılanır. Bu, sözügedən qurumun yürütdüyü ayrı-seçkilik, tərəfli, ermənipərəst siyasətinin növbəti təzahürüdür....
Hesab etmirəm ki, onun belə bir mövqe nümayiş etdirməsi ermənilərin dərdini çəkməsindən və qayğısına qalmasından irəli gəlir. Burada ikili yanaşma özünü aydın şəkildə göstərir. Azərbaycanlılar 1992, 1993-cü illərdən Qarabağdan və ətraf rayonlardan Ermənistanın təcavüzü nəticəsində məcburi köçkünə çevrilib, 100 minlərlə soydaşımız deportasiyaya, etnik təmizləməyə, zorakılığa məruz qalıb. Amma bununla bağlı 27 il ərzində Avropa Parlamenti bir dəfə də olsun mövqe bildirməyib. Yəni torpaqlarımız işğal altında olduğu müddətdə. İndi birdən-birə erməniləri və Ermənistanı dəstəkləyən mövqe nümayiş etdirir. Avropa Parlamenti sədrinin bu mövqeyi riyakarlığın, ikili standartların bariz nümunəsidir”-deyə M.Məmmədli qeyd etdi.
Məsələnin digər tərəfinə gəlincə, M.Məmmədlinin sözlərinə görə, bu məsələ ilə bağlı Azərbaycanın Avropa Parlamentinin, yaxud hansısa bir beynəlxalq strukturun, qurumun mövqeyinə ehtiyacı yoxdur. “Çünki Azərbaycan rəsmiləri dəfələrlə bəyan ediblər ki, Qarabağı tərk etmiş ermənilər yenidən qayıda bilərlər, bu bizim rəsmi mövqeyimizdir. Biz özümüz də maraqlıyıq ki, nəhayət o bölgəni könüllü tərk etmiş ermənilər qayıtsınlar. Azərbaycanın bu mövqeyinin özü sübut edir ki, Qarabağı tərk edən ermənilər hər hansı bir zorakılıq olmadan bu addımı atıblar. Bu baxımdan, bizim kənar məsləhətlərə, məsləhətçilərə, qərarlara ehtiyacımız yoxdur. Bu məsələlər bizim daxili işimizdir, daxili siyasətimizdir, bunu da Azərbaycan dövləti beynəlxalq hüquq normalarına, öz üzərinə götürdüyü beynəlxalq öhtəliklərə və daxili qanunlara uyğun olaraq həll edir və həll edəcək”-deyə M.Məmmədli qeyd etdi.
İradə SARIYEVA
