Məlum olduğu kimi, Azərbaycanın vətəndaş cəmiyyəti təmsilçiləri Beynəlxalq Qırmızı Xaç Komitəsinə açıq məktubla müraciət ediblər.
Müraciətdə deyilir: “Biz – Azərbaycanın vətəndaş cəmiyyətinin təmsilçiləri Beynəlxalq Qırmızı Xaç Komitəsinin prezidenti xanım Mirjana Spoljariç Eqqerə üz tutaraq, Beynəlxalq Qırmızı Xaç Komitəsinin Azərbaycandakı fəaliyyətindən ciddi narahatlıqlarımızı ifadə edirik. Otuz ildən çoxdur ki, Beynəlxalq Qırmızı Xaç Komitəsi Azərbaycanda fəaliyyət göstərir. Biz bu təşkilatın mandatını və missiyasını çox vacib hesab edirik. Amma təəssüf hissi ilə bildirməliyik ki, 4 min nəfərə yaxın azərbaycanlı Ermənistanın Azərbaycana qarşı təcavüzü nəticəsində itkin düşsə də, ötən 30 illik dövr ərzində onların aqibəti, taleyi barədə Beynəlxalq Qırmızı Xaç Komitəsinin nəzərəçarpacaq uğurları olmayıb. Minlərlə ailə hələ də közərən ümidlə xəbər gözləyir. Beynəlxalq Qırmızı Xaç Komitəsi özünü müstəqil, bitərəf və qərəzsiz təşkilat hesab edir. Ancaq Azərbaycana münasibətdə bu əsas prinsiplərin pozulması başadüşülən deyil. 2000-ci illərdə Beynəlxalq Qırmızı Xaç Komitəsi Azərbaycan hökuməti ilə razılaşdırmadan onun suveren ərazisi olan Xankəndidə ofis təşkil etdi və bu barədə qondarma, separatçı rejimlə “saziş” imzaladı".
Azər Allahverənov: "BQXK Azərbaycana gələndə kifayət qədər qərəzli davranır"
Azərbaycanın vətəndaş cəmiyyəti təmsilçilərinin BQXK-yə açıq məktubu barədə fikir bildirən Avrasiya Miqrasiya Təşəbbüsləri Platforması İctimai Birliyinin sədri Azər Allahverənov "Bakı -Xəbər"ə açıqlamasında qeyd etdi ki, məktubun məzmunu ilə ölkə ictimaiyyəti artıq tanış olub: "Məlumdur ki, Beynəlxalq Qırmızı Xaç Komitəsi 30 ildir Azərbaycanda fəaliyyət göstərir. Bu müddət ərzində komitənin fəaliyyəti ilə bağlı bəzi suallar yaranıb. Təəssüflər olsun ki, komitə hər zaman olduğu kimi suallardan yayınır".
A.Allahverənov xüsusi olaraq vurğuladı ki, Beynəlxalq Qırmızı Xaç Komitəsi müstəqil təşkilatdır. Bu komitənin məqsəd və vəzifəsi qərəzsiz humanitar yardım göstərməkdir. Humanitar yardım dedikdə, hərbi münaqişələrdən əziyyət çəkən insanlara yardım etmək, onları qorumaqdır: "Məlumat üçün deyim ki, 1863-cu ildə yaradılan bu komitənin fəaliyyəti sırf yardım, köməklik göstərmək olmalıdır. Onu da deyim ki, bir ildən çoxdur davam edən Rusiya-Ukrayna müharibəsinə münasibətdə komitə nizamnaməsinə uyğun olaraq fəaliyyət göstərir. Ancaq Azərbaycana gələndə isə, bu təşkilat kifayət qədər qərəzli davranır. Azərbaycanla bağlı hər hansı bir məsələdə komitə ört-basdır etməyə üstünlük verir".
A.Allahverənov onu da əlavə etdi ki, adı humanitar fəaliyyətlə bağlı olan Beynəlxalq Qırmızı Xaç Komitəsinin əməkdaşları qaçaqmalçılıqla məşğul olur. Laçın dəhlizində Beynəlxalq Qırmızı Xaç Komitəsinə aid nəqliyyat vasitələrində qadağan olunan əşyalar aşkar edilib. Həmçinin, zaman-zaman komitənin maşınlarında Xankəndidə qeydiyyatda olmayan ermənilərin və xarici vətəndaşların daşınmasının şahidi olmuşuq. Bu kimi faktlar sübut edir ki, komitə erməni mövqeyindən çıxış edir.
Nailə İsmayılova: "Beynəlxalq Qırmızı Xaç Komitəsinin Bakıdakı nümayəndəliyi Ağdam-Xankəndi yolu vasitəsilə humanitar yükləri daha tez və təhlükəsiz şəraitdə Xankəndiyə çatdıra bilər, nəinki İrəvandan"
"Yeni Həyat” Humanitar və Sosial Dayaq İctimai Birliyinin sədri Nailə İsmayılova "Bakı-Xəbər"ə açıqlamasında qeyd etdi ki, Beynəlxalq Qırmızı Xaç Komitəsi beynəlxalq nüfuza malik olsa da, Ermənistanın cılız manipulyasiya alətinə çevrilib: "Beynəlxalq Qırmızı Xaç Komitəsinin emblemi altında yük və təcili tibbi yardım maşınlarının Laçın postunda yoxlanılması zamanı onların içərisində qaçaqmalçılıqla keçirildiyi aşkar olunan benzin, siqaret, mobil telefon qutularının olması faktdır ki, bunu danmaq mümkün deyil. Hətta bu günlərdə Laçın postunda Beynəlxalq Qırmızı Xaç Komitəsinə məxsus avtomobildə 1991-ci ildə Meşəli soyqırımını törətmiş müharibə cinayətkarlarından biri olan Vaqif Xaçaturyan aşkar edildi. Təbii ki, biz də Meşəli soyqırımı qurbanlarının beynəlxalq ictimaiyyətə açıq məktubunda yer alan fikirləri dəstəkləyirik. Müharibə zamanı soyqırım törədərək əli günahsız insanların qanına batmış cinayətkarları müdafiə edərək ona sığınacaq yeri olan Beynəlxalq Qırmızı Xaç Komitəsinin missiya və fəaliyyətini ciddi qəbul edən biz - vətəndaş cəmiyyətinin üzvləri adıçəkilən komitəyə necə xoşməramlı münasibət bildirə bilərik? Biz açıq məktubdakı bütün tələblərimizi haqlı hesab edirik.
Yeri gəlmişkən, Qarabağ Azərbaycan ərazisidir. Beynəlxalq Qırmızı Xaç Komitəsinin Bakıdakı nümayəndəliyi Ağdam-Xankəndi yolu vasitəsilə humanitar yükləri daha tez və təhlükəsiz şəraitdə Xankəndiyə çatdıra bilər, nəinki İrəvandan".
Günel CƏLİLOVA
