Azərbaycan paytaxtı mötəbər beynəlxalq tədbirə ev sahibliyi etdi. Qoşulmama Hərəkatının (QH) Əlaqələndirmə Bürosunun Bakıda keçirilən nazirlər görüşü və müzakirəyə çıxarılan məsələlər dünya mediasının, siyasi dairələrin diqqət mərkəzindədir.
Fransada yaşanan son hadisələr, bu ölkənin uzun illərdir apardığı müstəmləkəçilik siyasətinə qarşı mübarizə də müzakirə olunan məsələlər sırasındadır. İlk dəfə olaraq məhz Bakıda rəsmi Parisin müstəmləkə və irqi ayrıseçkilik siyasəti sərt tənqidlərə tuş gəlib - Fransa müstəmləkəçiliyinə qarşı Bakı Təşəbbüs Qrupunun yaradılması barədə razılıq əldə olunub. Tədbirdə iştirakçılar Fransanın müasir müstəmləkəçilik siyasətinin aradan qaldırılması yollarını, Afrika qitəsində və dünyanın müxtəlif regionlarında de-fakto mövcud olan köləliyin kökünün kəsilməsi üçün zəruri addımların atılması istiqamətində fikir mübadiləsi aparıblar. Şübhəsiz ki, Bakı Təşəbbüs Qrupunun yaradılması beynəlxalq mediada və siyasi dairələrdə ciddi rezonans doğuracaq. Məhz Bakıda ilk dəfə Fransanın uzun illər cəzasız qalan mənfur kolonial siyasəti gündəm olub. Beləliklə də, Parisin çirkin müstəmləkə, pozuculuq siyasətinə, cəzasız qalan cinayətinə nəhayət ki, ciddi reaksiya verilir, beynəlxalq müstəvidə yeni və kəsərli mübarizə başlayır. Demək olar ki, Fransa müstəmləkəçiliyi dünya müharibəsindən sonra növbəti ağır zərbəni Qoşulmama Hərəkatından və məhz Bakıda aldı.
Azərbaycanın Fransa müstəmləkəçiliyinə qarşı Qoşulmama Hərəkatı çərçivəsində açdığı mübarizənin tarixi və praktik əhəmiyyəti nə olacaq?
İctimai Siyasi Proseslər Beynəlxalq Əlaqələr Mərkəzinin (İSBAM) rəhbəri Samir Adıgözəlli “Bakı-Xəbər”ə açıqlamasında bildirdi ki, özünü yalandan insan haqlarının və beynəlxalq hüququn müdafiəçisi kimi qələmə verən Fransa hələ də digər ölkələrin daxili işlərinə qarışır: “Fransa qoşunlarının bu yaxınlarda Mali və Burkina-Fasodan çıxarılması onun Afrikadakı amansız neokolonializm siyasətinin uğursuzluğa məhkum olduğunu bir daha göstərdi. Fransanın müstəmləkəçilik siyasəti yalnız keçmişi ifadə etmir, Fransa yeni məzmun və forma biçməyə çalışaraq yenə müstəmləkəçilik etmək, başqa dövlətləri təsir altında saxlamaq istəyir.
Fransa beynəlxalq çağırışlara cavab verməlidir. Fransa başqa coğrafiyalarda - onlara aidiyyəti olmayan mövzularda suyu bulandırmaq cəhdlərindən əl çəkməlidir. Bu deyilənlər Fransanın və daha dörd böyük ölkənin daimi üzv olduğu BMT Təhkükəsizlik Şurasının yenidən şəkillənməsinin zəruriliyini də ifadə edir. Özü müstəmləkəçi olan ölkə Yer üzündə barışı, ədaləti necə təmin edər? Bakının bu təşəbbüsləri ciddi cəsarət tələb edir. Bir çox ölkələr Fransanın nüfuzundan çəkindikləri üçün belə həqiqətləri dilə gətirə bilmir. Görünən budur ki, artıq Azərbaycanın sədrliyi dönəmində Qoşulmama Hərəkatı Fransanın etdiyi haqsızlıqları ifşa etmək və onların həllinə nail olmaq istiqamətində əməli fəaliyyətə keçib”.
Məhəmmədəli QƏRİBLİ
