Maraqlıdır ki, Ermənistan baş naziri Nikol Paşinyan Rusiya prezidenti Vladimir Putinlə telefon danışığından sonra Azərbaycana qarşı ritorikanı sərtləşdirib. Paşinyan hökumətin iclasında Azərbaycanın ünvanına ittihamlarla çıxış edib:
“Həkəri köprüsü yaxınlığında Azərbaycanın təxribatından sonra iyunun 15-dən Dağlıq Qarabağ bütün növ malların təchizatından məhrum edilib. Hətta Dağlıq Qarabağda yerləşən Rusiya sülhməramlılarının yük daşımaq imkanı yoxdur, çünki Laçın dəhlizi tamamilə bağlanıb”.
Paşinyan Ermənistan silahlı qüvvələrinin bölmələrinin Qarabağda olduğunu da inkar etməyə başlayıb. Baxmayaraq ki, bir neçə gün öncə erməni tərəfi Qarabağda hərbi toqquşmalar zamanı öldürülən iki hərbçinin cəsədlərinin Ermənistana aparılmasına icazə verilməsini xahiş edib. Nikol Azərbaycanı “Dağlıq Qarabağ ermənilərinə qarşı etnik təmizləmədə və soyqırımda” ittiham edib. Eyni zamanda Paşinyan Ermənistanın “Zəngəzur dəhlizi”ni açmaq istəmədiyini nümayiş etdirməyib: “Ermənistan heç vaxt heç bir yerdə, nə yazılı, nə də şifahi şəkildə dəhliz öhdəlikləri götürməyib və heç vaxt belə şərhləri qəbul etməyəcək. Regional kommunikasiyaların ölkələrin yurisdiksiyası və suverenliyi altında açılmasına gəlincə, Ermənistan buna hazır olduğunu dəfələrlə təkrarlayıb”.
Maraqlıdır, Putinlə telefon danışığından sonra Paşinyanın belə sərt mövqedən çıxış etməsi təsadüfdürmü?
“Paşinyanın belə danışmasının əsas mahiyyəti vaxtı uzatmaqdan ibarətdir”
Sözügedən məsələ ilə bağlı “Bakı-Xəbər”ə açıqlama verən Demokratik Dəyişim Partiyası Təşkilat Komitəsinin sədri Əli Mustafanın fikrincə, Paşinyanın bu dərəcədə sərt mövqedən çıxış etməsi təsadüfə oxşamır: “Özü də bu, təkcə Putin və Rusiya ilə bağlı məsələ də deyil. Ümumiyyətlə, bu, ermənilərin fitnəkarlığından irəli gələn məsələdir. Paşinyanın belə danışmasının əsas mahiyyəti vaxtı uzatmaqdan ibarətdir. Məqsəd danışıqlar prosesini tamamilə pozmaq olmasa da, prosesi maksimum uzatmaqdır. Paşinyan bir addım irəli, iki addım geri siyasət yeritməklə prosesi uzadır. Məqsədləri çalışıb imkan daxilində çox vaxt qazanmaq və yarana biləcək hansısa fürsətlərdən yararlanmaqdır. Paşinyan bir tərəfdən özünü demokrat, sülh tərəfdarı kimi göstərir, o biri tərəfdən Qarabağda 10 min nəfərlik ordu saxlayır. Məgər onun xəbəri yoxdur ki, Qarabağdakı silahlı birləşmələr Ermənistan ordusudur? Əlbəttə ki, var. Paşinyan sərhədlərin müəyyənləşməsi, sülh müqaviləsinin imzalanması barədə danışır. Ancaq anlamır ki, daim münaqişə, gərginlik şəraitində bunu etmək mümkün deyil. Bunun üçün etimad, inam olmalıdır. Hələ ki, erməni tərəfi buna sağlam zəmin yaratmır. Mümkündür ki, burada Rusiyanın təzyiqləri var və Kreml sülh sazişinin imzalanmasını istəmir. Çünki sülh olsa, hər iki dövlətə Rusiyanın təzyiq imkanı minimuma enəcək. Bütün bunlar öz yerində. Ancaq biz nəzərə almalıyıq ki, erməni xisləti də sülhə imkan vermir. Ermənilər ərazilərimizi işğal etmək niyyətindən əl çəkməyiblər. Hələ də Qarabağın müəyyən hissəsi erməni işğalındadır. Düzdür, Vətən müharibəsindən sonra bu areal çox kiçilib, amma fakt faktlığında qalır. Paşinyan da bu faktı ört-basdır etmək üçün müxtəlif manipulyasiyalar edir. Eyni zamanda Nikol həm də istəmir ki, Zəngəzur dəhlizi hesabına türkdilli dövlətlər arasında inteqrasiya genişlənsin. Zəngəzur dəhlizi ilə bağlı sərt ritorika da bununla bağlıdır. Ancaq reallıq ondan ibarətdir ki, Azərbaycan burada kifayət qədər ciddi zəifliklərə yol verir. Yəni erməni tərəfini ifşa etmək üçün həddən ziyadə arqumentimizin olmasına baxmayaraq, diplomatiyamız ya bunu etmir, ya da edə bilmir. Halbuki, Xarici İşlər Nazirliyi bütün faktorlardan istifadə etməlidir. Ermənistan ərazisində Azərbaycan Ordusu olsaydı, ermənilər bütün dünyanı ayağa qaldırardılar. Qarabağda 10 minlik ordu var, amma biz Ermənistan əleyhinə qərar qəbul etdirə bilmirik”.
Vidadi ORDAHALLI
