Azərbaycan Prezidenti İlham Əliyevin ADA Universitetində keçirilən “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda 7 dekabrda Brüsseldə nəzərdə tutulan görüşlə bağlı Ermənistan tərəfinin qəbuledilməz şərtinin olması barədə fikirlərinə İrəvan cavab verib. Ermənistan XİN görüşün “Praqa formatında” keçirilməsini məqbul saydıqlarını bir daha təkrarlayıb:
“6 oktyabrda Praqada Makronun da iştirakı ilə dördtərəfli görüş keçirilmişdi və görüşün formatının qalması məntiqlidir. İrəvan “Praqa formatı”nda 7 dekabrda Brüsseldə görüşün keçirilməsinə razıdır”.
Qeyd edək ki, Praqadakı görüş birbaşa görüş deyildi, “Avropa siyasi birliyi” Zirvəsi çərçivəsində keçirilmişdi və AB Şurasının rəhbəri Şarl Mişelin vasitəçiliyi ilə gerçəkləşən növbəti görüşdə Makronun da iştirakına Azərbaycan etiraz etməmişdi. Başqa sözlə desək, “Praqa formatı” deyilən bir platforma yoxdur, bu iddia saxtakarlıqdır. Söhbət ən yaxşı halda AB-nin vasitəçiliyi ilə “Brüssel formatı”nda gedə bilər ki, burda da yeganə vasitəçi tərəf AB və Şarl Mişeldir.
İstər Rusiyada, istər Avropada, istərsə də ABŞ-da keçirilən müxtəlif səviyyələrdəki görüşlərdə “4-cü tərəf” olmayıb və yoxdur: Rusiyadakı görüşlərdə Putin, Avropadakı görüşlərdə Şarl Mişel, digər səviyyələrdə keçirilən görüşlərdə isə Rusiya XİN başçısı Lavrov və yaxud ABŞ Dövlət katibi Blinken iştirak edib.
“Dördtərəfli format” isə yoxdur, olmayıb və olması da məqbul deyil. Əgər vasitəçi kimi Şarl Mişel iştirak edirsə, Paşinyanın Əliyevlə söhbətində daha bir lider niyə iştirak etməlidir? Həm də bu şəxs antiazərbaycan mövqeyini dəfələrlə elan edibsə.
Paşinyanın Makronun görüşdə iştirakı ilə bağlı israrlı tələblərinin arxasında hansı məqsədləri dura bilər?
Politoloq Əhəd Məmmədli “Bakı-Xəbər”ə açıqlamasında bildirdi ki, Paşinyan təklənməkdən qorxur: “Əliyev görüşlərdə: Əliyev-Paşinyan-Putin və başqa konfiquryasılarda Ermənistan baş naziri hər zaman özünü təklənmiş sayıb. Bu səbəbdən də digər “bacısını” köməyə çağırır. Biz bu tələbi yerinə yetirməkdən imtina etmişik. Paşinyanın bu tələbinin bizə xeyir olan tərəfi də var. Bu israr Rusiyanı razı sala bilməz. Rusiya özünün satellitlərinin başqa yerə baxmalarına böyük qısqançlıqla yanaşıb. Ermənistan isə tez-tez ABŞ-a, Fransaya və hətta İran tərəfə boylanır. Paşinyanın özünə köməyə Putini yox, Makronu çağırması İrəvanın Moskva ilə olan münasibətlərində çat yaradacaq. Azərbaycan bu amildən istifadə etməlidir. Necə ki, Paşinyan hakimiyyətə gələndən sonra yaranan İrəvanın Moskva ilə münasibətlərində əmələ gələn çatlardan yaxşıca istifadə edə bilib. Belə olanda biz hədəflərimizə tez çata bilirik. Xankəndi və digər ərazilərdə mövqeyimizi tam bərkitməliyik. Gələn il həlledici olacaq. Azərbaycan erməni əhalimiz üzərində yurisdiksiyamızı tam bərpa etməsə, rus sülhməramlılarını ərazidən çıxarmaq müşkülə çevriləcək. İlin sonunda sülh sazişi imzalanmasa, biz gələn ildən bu istiqamətdə addımlarımızı atmalıyıq. Lazım gəlsə antiterror əməliyyatı keçirib, bu məsələni həll etməliyik”.
Məhəmmədəli QƏRİBLİ
