Rusiya Prezidenti Vladimir Putin müxbir Semyon Peqovu “İgidliyə görə” ordeni ilə təltif edib. Mükafat Peqova "peşəkar borcunu yerinə yetirərkən göstərdiyi cəsarət, şücaət və fədakarlığa görə" verilib.
Qeyd edək ki, Peqov 44 günlük savaşda erməni təbliğatı aparması və dezinformasiya yayması ilə azərbaycanlılara yaxşı tanışdır. O, indi sözügedən “fəaliyyəti” Ukraynada davam etdirir. Belə mənfi reputasiyaya malik adamın yüksək ali təltifə layiq görülməsi nə dərəcədə doğrudur?
Media məsələləri üzrə ekspert Müşfiq Ələsgərli “Bakı-Xəbər”ə bildirdi ki, sözügedən adamın reputasiyası doğrudan da olduqca mənfidir: “Semyon Peqovun Azərbaycan və Ermənistan arasındakı müharbədə iştirakı, həmçinin bundan sonra Ukrayna ilə Rusiya müharibəsi dövründəki fəaliyyəti, eyni zamanda Rusiyanın qarışdığı digər konfliktli bölgələrdə iştirakı deməyə əsas verir ki, bu adam jurnalist, bloger, ümumiyyətlə informasiya adamı deyil. Əksinə, casusluq və təxribatçılıq əməlləri ilə məşğul olan və bunu jurnalistika, blogerliklə pərdələyən bir şəxsdir. Bu artıq sübut olunmuş bir haldır. Məsələnin pis tərəfi ondan ibarətdir ki, Semyon Peqovun bu fəaliyyəti Rusiya dövləti tərəfindən stimullaşdırılır. Əgər Semyon Peqovun jurnalistika adındam istifadə edib casusluq, təxribatçılıq əməlləri törətməsi bir problemdirsə, onun Rusiya dövləti tərəfindən dəstək alıb bu əməlləri törətməsi məsələnin ən pis tərəfidir. Bu baxımdan bu hadisələr pislənilməlidir. Onsuz da dünya ictimaiyyəti Semyon Peqovun kimliyini və nə işlə məşğul olduğunu bilir. Bu olanlarda Rusiyanın adının hallanması Rusiya dövlətinin də bu məsuliyyəti bölüşdüyü faktını ortalığa qoyur. Məsələnin digər tərəfi də ondan ibarətdir ki, Rusiya təkcə Peqova bu cür münasibət bəsləmir. Rusiyanın media sisteminə, informasiya daşıyıcılarına, jurnalistikaya baxışı ümimilikdə problemlidir. Rusiyada jurnalistikadan sui-istifadə halları, jurnalistlərin təxribatçı və casusluq fəaliyyətinə cəlb olunması adi bir hala çevrilib. Bunu Ukraynada baş vermiş dəhşətli hadisələr də bir daha sübut etmiş oldu. Ukrayna müharibəsinin fonunda Rusiya silahlı qüvvələri tərəfindən Ukraynanın 30-dan artıq jurnalisti qətlə yetirilib. O jurnalistlərdən bir neçəsi Rusiya silahlı qüvvələri tərəfindən qaçırılıb, onlara casusluq fəaliyyəti təklif olunub. Bu təklifi qəbul etmədiklərinə görə də qətlə yetiriliblər. Mənim bildiyim bu informasiya Ukrayna jurnalistlər birliyinin yaydığı informasiyalardandır. Bu nəyi göstərir? Əgər biz bu faktları Semyon Peqov məsələsi ilə müqayisə etsək, görəcəyik ki, Rusiyanın ümumiyyətlə jurnalistikaya baxışı problemlidir. Jurnalistikadan təxribatçı və casusluq əməlləri kimi istifadə olunması ruslarda bir siyasət halına gəlib. Bu, həmçinin, dövlət prinsiplərinə də zidd olan bir əməldir. Hesab edirəm ki, dünya ictimaiyyətinin bu məsələlərə reaksiya verməsindən sonra Rusiya dövləti də bu əməllərindən əl çəkməyə məcbur olacaq. Rusiya tərəfindən sərgilənən belə hərəkətlər təkcə Azərbaycana qarşı deyil, dünyanın əksər ölkələrində sınaqdan çıxarılıb, tətbiq olunub. Artıq bu neqativ, çirkin siyasətin üstü açılır, ifşa olunur”.
Məhəmmədəli QƏRİBLİ
